العميلة 306 -أخوان في عشق إمرأة واحدة - (لهجة جزائرية )

الحلقة 25

الحلقة 25 :
حط يديه على يديها .. نزلهم .. للحظة حست بخيبة أمل كبيرة .. تلفت ليها .. عدا عينيه على وجهها .. للحظة دخلها لحضنوا.. كبس عليها بكل قوتو .. لفت يديها عليه ..
ريان؛ حطيتك رايح تعيط عليا
إياد ؛ معاشش اللي يعيط عليك و أنا عايش ..
ريان؛ بش تروح معايا مش هكا ؟؟
إياد؛ ممم هيا
تنطرت عنقتوا .. عينيا يلمعوا .. قلبي يخبط بزربة .. فرحانة عللخر .. عالأقل قدرت نتجاوز فكرة الخوف .. بحبي ليه ..حطيت راسي على كتافو .. الوجهة إيطاليا .. حياة جديدة في بلاد جديدة..
~~~~~~~الحاضر~~~~~~~
هزيت راسي كي دخلت الفرملية
الفرملية؛ مدام صافا؟؟؟
تقعدت من لرض .. قدمت بش تعاوني ..
ريان؛ صافا صافا 
الفرملية؛ ليوم آخر نهار خبرت مسيو منار بلي الطبيب عاين كلشي و التحاليل كلها سليمة .. يعني تعافيتي مية بالمية
ريان؛ مرسي
الفرملية؛ واجبنا ..
جات تخرج مبعد عاودت تلفتت غزرتلي .. و عاودت قدمت عندي ..
الفرملية؛ رايحة نقولك هدرة بصفتي مرا مش فرمليتك .. صح كنا نراقبو فتطورات حالتك كامل .. مي درجة اهتمامنا موصلتش ليه .. كان ساعات يروح ميت بالعيا .. تكوني نتي ديجا رقدتي.. بالسيف ما يلوح الخطوة .. يجي يطمن عليك .. يبوس جبهتك بش يرقد ميتعشاش مامپا ..نظن تاني ملاحظتيش مي عندو .. ضربة فظهرو .. لدوك مزال مرتاحش مزال التشنج فالعضلات من الداخل  خبرني الطبيب اللي طببلوا الجرح .. هكاك و كنت نىاه ساعات يهزك .. انتي تتبسمي برك .. معلابالكش الوجيعة كيفاه .  و جامي شكا قدامك ..منعرف اذا تحبيه ولا لالا .. و نعرف مش من حقي ندخل .. بصح صدقيني  كل مرا تحلم بواحد يحبها و يلتها بيها هكا .. انا زوجوني صغيرة و ديتو ما نعرفوا ما يعرفني .. بقيت معاه 4 سنين .. كل يوم نمني روحي بلي غدوة يحبني غدوة يلتها بيا .. مش فراش و برك .. ميوصلت للحد اللي تأكدت بلي محال .. الحب ميجيش للناس كامل .. و قلال اللي عندهم الزهر فهاد الشي ...و فاللخر انتي أدرى
ريان؛ مرسي
تبسمت و خرجت ..تلفت للطاقة .  قلبي راح يخرج من بلاصتو .. تحل الباب ... حسيت بخطواتو من ورايا .. متلفتش أصلا .. مع وصل حط دقنونتو على كتفي.. يغزر معايا لبرا ..
منار؛ مجعتيش ؟؟
تلفت غزرتلوا على جنب .. شوية و تلفتلي خاطر بقيت ساكتة
منار؛ شبيك ؟
ريان؛ وصال معارضتش كي جبتني هنا.. فاللخر هي خطيبتك و من حقها تغير
هز راسو .. غزرلي ندرا كيف .. و مبعد طلع يدو ..
منار؛ راااكي تشوفي فخااااتم !!.. راكي تشوفي فيا نحكي فالتيليفون!!!..  قاعد نخرج معاها!!!!..  خطبها بابا .. كي عارضت قالي اتعرف عليها و مبعد كيما تحب ..صح لقيتها واقفة معايا كي..
سكت
ريان؛ كي واش ؟؟
منار؛ والو .. واجدة ؟ .. حابة تروحي ؟؟  عدا يدو على وجهو .. و حط يدو عالكارو يغزر لبرا
ريان؛ منااار ..
منار؛ حابة تعرفي بالسيييف .. من غير شي ماكش حابتني .. خلي مالت نعتلك بش تكرهيني قد قد ..
جبدني من يدي يجر فيا .. حسيت ذراعي بش يطير من بللصتو .. مي حابة نعرف واش .. فضول داخلي ..
........................................
كيارا؛ تخيلات برك إياد
إياد؛ منعرف .. كل مرة نشوف فعينيها ... ولا نكون قريب ليها .. نحس قلبي يخبط.. نحسها قريبة .. معلاباليش كيفاه ..آخر مرة هزيتها كي صرالها الحادث .. مع تحط راسها على رقبتي .. حسيت كلش عاود تجسد قدامي ..حياتي معاها كامل ..
كيارا؛ كنت غالط إياد .. صح راك عشيري .. مي ذنب ريان .. مام كون جات عايشة محال تسامحك
إياد؛ (تحلو عينيه ) كون جات عايشة !! .. كيارا كشما تعرفي !!! .. ريان عاااايشة .. غير نتي اللي تجي تحكيلك .. كيارا ربي يعيشك .. قوليلي .. كيما تعرفي بلي غلطت .. تعرفي بلي ندمت .. و كنتي شاهدة واش صرا فيا ..كل يوم نعاقب روحي .. ديجا كي ماراهيش معايا ..نموت ألف موتة فالنهار ..
عينيه زغللوا بالدموع .. نزلت راسي .. منقدرش نشوفو فالحالة هاذي .. أنا كنت شاهدة على قصة حبهم من اللي جاو لإيطاليا ... كل واحد فيهم خذا عذاب .. الواحد ميتحملوش ..و سبابهم توفيق .. تنهد .. غزرتلوا
إياد؛ هي كلمة وحدة ريان مزالت عايشة ولا ماتت هاداك النهار ؟
هزتني الذاكرة .. لاخر هدرة بيني و بينها ..
ريان؛ ههه واش كيارا وجهي باشع لدرجة وليتي متقدريش تشوفي معايا ؟
تنطرت قدمت عندها
كيارا؛ لالا حبيبتي نتي زينة كيف ماكان ..
ضحكت بقهرة .. فيها بحة تاع بكا
ريان؛ ش شفت روحي فالمراية .. ههه وليت وحدة مشوهة ..
قدمت حكمتها من يدها .. منعرف كيفاه نصبرها .. منظر يقشعر ليه الواحد وين يا هي ..
ريان؛ ريان قتلوها .. ريان ماتت تحت النار ..