العميلة 306 -أخوان في عشق إمرأة واحدة - (لهجة جزائرية )

الحلقة 20

الحلقة 20 :
حليت عينيا .. راسي رزين عاللخر ..تقعدت .. حطيت يديا على راسي.. نستوعب وين راني و واش صرا .. تفكرت كل شي .. تنطرت رميت الغطا من فوقي و نضت .. جيت نحل الباب مقفول .. للحظة تعاود فمخي واش صرا من قبل .. رجعت بكلي .. رحت نجري للطاقة.. غزرت للبرا .. دار فوسط غابة ..  جيت نحلها مقدرتش .. تحل الباب تلفت .. لصقت فالطاقة من التالي ...
غزرتلوا كي دخل يتبسم .. في يدو سينية تاع فطور ..
إياد؛ بونجور حبيبي
حط السينية عالسرير .. باقية نغزر للباب .. باز دوك يدخل باباه هذا الشي مخوفني عاللخر .. قدم عندي .. تنطرت لصقت فالطاقة ..
إياد؛وليتي تخافي مني ريان
ريان؛ و وش تتوقع مني .. رميت عليا رصاااااصة راك .. كنت راح تقتلني .. و زيد خاطفني هنا .. جايبني بالسيف
حكمني من ذرعيا في زوج .. و غزرلي .. باقية نڨحرلوا ... بش نموت من الخوف مي قاعدة نتقاوى على روحي
إياد؛  ريان افهمي لقاوك .. كان لازم نبان مع بابا .. ياخي علته مسقسيتينيش واش صرا كي خليتك و ديت معايا هاذيك الطفلة للتمويه .. نتي شفتي غير جانب أني قوصت عليك.. في بالك أنا دغف لدرجة منجيبش رصاصة لنص راسك..ولا قلبك .. سع نديرها جانبية فكرشك.. علابالي نية .. مي خممي شوية .. كون جا عيني فالمنكر .. منخرجكش أصلا و نخليك بين يديه .. يعدي عليك ويزيدو رجالو كامل تموتي و هوما ********* فيك
ريان؛ ا اسسكت خلاااص ... خلاااص
إياد؛ لالا منسكتش لخق الوقت بش تتوعاي راكي فلعب تاع مافيا .. مش  غميضة .. الحاجة اللي تشوفيها هاديك هي .. صدقيني كون نطلقك دوك.. والله يا ريان... والله تختاري الجحيم تاعي ولا تاعهم .. هاذاك النهار بابا شك بلي نتي .. و التمويه متعداش عليه .. بابا تخنامو خايب و متقدريش تتوقعي وش يقدر يدير.. انا ولدو .. و محال يرحمني .. وين ياوحدة دخلت لخدمتوا و شافت صفقاتو ..مكانش نسا فخدمتنا .. كانوا راح يحكموك و انا وعدتوا نلقاك و نقوصك بش يتهنا و هاذاك اللي صرا .. دوك واحد ما راح يحوس عليك .. و جبتك بالسيف من  عند الخالة آمنة بش نقدر نحميك ..و اي علابالها بكلش .. في بالك اللي هي تلاقاتك صدفة و داتك لدارها بمحض الصدفة .. انا اللي بعثتها .. خاطرها أكثر وحدة نوثق فيها محال توصلك لبابا
ريان؛ ع علاش تعمل فهذا الكل .. ماكش محتم توقف في وجه باباك .. اصلا حياتي معادش تف ق عندي يعن
قص عليا كي حط شفافو على شفافي و باسني !!!
~~~~~~~~~~~~~~~~~~
صوت آلة يتردد فوذني .. حاجة تنغزر فيدي .. عينيا يتحلوا و يتقفلوا .. أصوات بعيييدة عليا.. حاسة روحي فدنيا خلاف منعرفش ويني .. قاعدة نقاوم بش نفيق.. حليت عينيا بالشوي صو قوي ضرب فيهم .. عاودت غمضتهم
الطبيب؛ دوموزال ريان صافا !!
حليت عينيا غزرتلوا ..
ريان؛ و وين راني !!
الطبيب؛ عملتي حادث .. قوليلي واش تحسي ؟
طلعت يدي حطيتها على راسي .. يوجع عاللخر ..نحاول نخمم في آخر  حاجة نتفكرها .. وقت ،يقلت المراية تاع الطروفيسور .. و ريت القناص اللي مصوب سلاح  تحلوا عينيا كي شفتو cheytac m200 يقوص على بعد 2 كيلومتر و يقيس الأهداف بدقة عالية.. لازم نتفاداه و إلا أكيد هنا تكون نهايتي..باقية نتموج فالسوقان بش مينجمش يحكم هدفو .. و نغزر فالمرايات نفس الوقت .. دخلت لطريق فيه طاكسيات وين ما نقدرش نتموج .. جيت ندور .. و يقوص الرصاصات اخترقوا الروض .. كبست عالفولون بكل قوتي .. و اووب تتقلب بيا الطوموبيل منعرفش قداه من مرة و انا نتقلب فالسما .. راسي تخبط قداه من مرة .. و كلشي وراها كان ظلمة .. جيت نحرك يدي .. مقدرتش .. و رجلي تاني .. راسي رزين و يسطر ..و جسمي نحسو مدقدق ..
الطبيب؛ دوموزال ؟؟
ريان ؛ راسي يوجع عاللخر و و جسمي حاستوا يسطر تاني
الطبيب؛ هي معجزة أنك تنجاي من حادث هكاك .. خاطر طوموبيلتك طبزت كامل ..كون تأخر عليك ثواني كانت تتفلق بيك.. دخل حديد فكرشك .. و كنتي محظوظة انو مقاسش اعضاء حساسة لداخل .. و صرالك كسر فالمرفق و الرجل .. جروح فالرأس و في جسمك .. الأهم من هذا الشي أنو فقتي من الغيبوبة
ريان؛ قداه عندي و أنا  هكا !!
الطبيب؛ 8 أيام
ريان؛ شكون جابني
الطبيب؛ مسيو إياد الهاشمي ...