العميلة 306 -أخوان في عشق إمرأة واحدة - (لهجة جزائرية )

الحلقة 12 بارت 2

تلفت ليه.. وراه زوج من رجالو هازين لي ساشي.. تلفت خزر للميتم و خزرلي
منار؛ حاب نعرفك على جوانب حياتي و هذا واحد منها .. ارواحي .. حكمني من يدي و دخلنا .. كل خطوة نعملها .. قلبي بش يخرج من بلاصتوا.. جات مديرة الميتم و معاها المستشارين .. تبسمت بتمڨعير .. مزالها تاع مظاهر .. قدمت صافحتوت و تلفتت ليا
-مرحبا مرحبا مسيو منار .. مرحبا بيك دوموزال
منار؛ مدام
تلفتت ليه و ضحكت
-مدام هه تفضلوا تفضلوا ..
غمضت عينيا و حليتهم بقوة .. قداشها مرة مقززة .. سنين تعدات مي شخصيتها نفسها بعد .. علامات الكبر و الوقار مي الباطن يعلم بيه غير. اللي عايش فهاد الجحيم .. باقيين نمشيو معاها .. كل مرة نغزر للاولاد .. قلبي يتقسم طراف ... دخلنا معاها للصالة الكبيرة .. جمعو الأولاد .. وقفوا كامل يخزرولنا ..
منار؛ تقدري تخرجي نتي و اللي معاك مرسي
- اه ههه خوذ راحتك سي منار .. خرجت هي و المساعدين الزوز ...
منار؛ شكون توحشني أككككثر
ناضوا يعيطوا أنا أنا ..
منار؛ اممم اللي توحش خوه منار أكثر يعنقوا بالقوة
تنطروا يجريو يعنقوا فيه .. و يضحكوا .. تبسمت بلا ما نحس .. و أنا نغزر لضحكاتهم البريئة .  لهاد الغزرات .. دققت عليه .. و هو يضحك معاهم .. و يفرفشلهم في شعرهم .. يعرف اساميهم بالواحد..  جامي توقعت نشوف جانب هكا عند منار.. للحظة حسيت وقت حابني انو عرف كلش عليا .. مي طلع شي خلاف خلاص..  وقف شاورلي بيدو ... باقية تايهة.  .. فقت على حس لولاد يضحكوا و هو معاهم .. يغزرولي .. ضحكت .. قدم عندي ..حط يدو على كتفي و تلفتلهم ..
منار؛ تعرفوا شكون هادي ؟؟
-حبيبتك
-مرتك
-صديقتك
منار؛ هههه هاذوا كامل .. و دوكا كل واحد جبتلوا الكادو اللي كات حابوا
-يااااي مرسي منار
منار: هيا
قدمنا نمدولهم فلي كادوا لللي بأساميهم  .. كملنا تغدينا معاهم .. حتى وصلت العشية .  تعدينا للبيرو  تاع اللفعة هاديك .. قامت ترحب من جديد.. حابة نتفها .. قعدنا ..
- تشربوا حاجة ؟
منار؛ لا تفضلي هاذي الأمانة و تهلاي فيهم بلا منوصي
-استغفر الله سي منار ..خيرك سبق
حكمت الشاك شافت الرقم .. السعلة حكمتها
ريان؛ اشربي الما .. ظاهر دراهم حصلولك ..
تلفت عندي منار .. و غزرتلي .. و مبعد تبسمت
-لا ڨريپ
وقف وقفت في جرتوا .. صافحها و خرجنا من بيروها .. قبل ما نخرج تلفت ڨحرتلها .. و خرجت .. الليل طاح .. الوقت تعدا يفتق .. أول مرة نحس روحي متفرهدة هكا .. هاذ الخطوة عجزت نعملها .. كنت خايفة .. نضعف .. هنا كبرت عالعجز و السكات و الظلم .. و منقدرش نحكي.. تترصالي نسكت و نبكي .. و من يوم خرجت معادش خممت نرجع .. اما نسيت بلي مزال بزاف ولاد غيري ... عايشين نفس الوجيعة .. خلصة و هاذيك شايبة النحس .. ناوية تخلد مديرة .. مي نكمل مهمتي .. و نوريها النجوم فالنهار...