العميلة 306 -أخوان في عشق إمرأة واحدة - (لهجة جزائرية )

الحلقة 38

الحلقة 38 :
بقيت جامدة فبلاصتي .. الصدمة اللي كنت حاسة بيها .. مكانتش تتوصف .. هدرتو تبين بلي عرف !! ... حطيت يدي على حرف الكرسي .. نحاول نوازن روحي .. اللي عملتوا من سنين .. كلش طاح فالما .. على حساب معريفتي بيه أكيد عرف .. مش شاك كيما أول مرة .. بصح منين عرف !! .. فقت كي تحط الفرد فراسي ..
-وأخيرا وصلتلك
....................................
كيارا؛ كيفن وش راك تقوول !!!!!!!!
كيفن؛ كيارا؛ علابالك منخبي عليك والو .. على هادي صارحتك
خرجت التابل اللي فالريسطورون كامل شافوا معاها .. هزت صاكها و خرجت لحقها .. جبدها من ذراعها ..
كيفن؛ كيارا؛ نظن نتي أكثر وحدة كان لازم تحس بإياد راهو صاحبنا من سنين .. و أنك كنتي تعرفي و مخبية
كيارا؛ نتا آخر واحد ممكن تحكم عليا كيفن .. معشتش الحالة .. زوجها و هو هكاك جامي ننساه .. الجاست اللي درتوا خلاك تنزل من عيني كيفن .. و الرولاسيون اللي مفيهاش كونفيونص منحبش نكون فيها
كيفن؛ كيارا وش تحكي .. كون مشفتيش حالة إياد هاد السنين .. نكذب بلي نتي .. راهو يحبها محال يقيسها ..
كيارا؛ معلابالكش وش درت كي خليتوا يوصلها
كيفن؛ علاه وين راهي دوك !!!
..............................
واقفة ف البيت رايحة جاية ..
ريم؛ اركحي نور دوختيني و نتي تلفي هكا
نور؛ مفهمتش وش الغاية من انو يطلب ريسان عايلة الهاشمي بغض النظر انو الامر مستحيل .. بصح انو يتنقض أمر الهدنة مش نورمال لحكاية هاذي ..
ريم؛ بصح وش مقلقك نتي .. هوما قالت الغي كل الصفقات السوداء حتى .. يعلمونا .. خلاص ..
نور؛ مكش فاهمة ريم .. شفتي كي تفوتي و تحطي رجلك فالتخلاط هذا .. تفوتك حاجة .. تولي تتساقي بيناتهم .. على خاطر الدغف يولي خديم تحت رجلين الأسياد .. و نظن ظروفها اللي رماتنا هنا .. تكفي ملازمش نزيدو نكملوا حياتنا .. نتمرمدوا ..
ريم؛ و الحل
نور؛ لغز تاع تحرك الخط ضد الهاشمي لازم نعرف الغاية الأساسية .. دوك تجي فراسك بلي أمر بالهجوم هكاك برك بسبة أنو باخرة كان فيها كوكايين تابع للخط تهاجمت شكو فعايلة الهاشمي بحكم ... قريبة لمنطقتهم البحرية
ريم؛ قصدك تمويه برك قدام مجلس الخط
نور؛ بالضبط ..
ريم؛ بالاك جهيدة؛ علابالها نعيطولها ؟؟
نور؛ ايه لازم نفهم وش راو يصرا فروسيا و الترك ..سينو غدوة نطلع ..
ريم؛ اوكي ..
...................
فلاش باك :
ريكي؛ ريان زعما كون يدوك هادوك اللي عندهم الدراهم تروحي !!
ريان؛ شكون قصدك !
جاكي؛ هاداك السي يزيد و مرتوا ..
ريان؛ كولو كولو بركاو ما تتمهبلوا
جاكي؛ تتهناي من ميزيرية الميتم .. و العقابات .. أصلا بقالنا عامين و نخرجو من الميتم . نكملوا الليسي .. تعيشي في دار خير ما تتمرمدي زيد تولي عندك عايلة
خرجت المعرفة.
ريان؛ جاااكي .. منحبش قلتلكم نتومت عايلتي .. و نتو ما كلش .. حي نخرجوغ .. نخرجوا كامل كيف كيف .. سنين و حنا هنا فاللخر تهدر هكا .. نحس بلي راك تفرط في ختك ..
ناضت من فوق التابل راحت ..
..................................
منار؛ إيااااااد الباب السري يخي مأمن !!!!
إياد؛ معلاباليييييش ...
منار؛ يااااا********** .. أمن ظهري تروح نتأكد ..
إياد؛ أوك ليه ليه ..
...................
تلفت جات عيني فعينوا .. تصدمت .. نظرة وحدة كانت كافية بش تخليني نرجع سنين .. تفاصيل العمر واضحة.. مي هذا العينين جامي ننساهم .. تهزيت كي اخترقت كتفي الرصاصة .. غزرتلوا  و صورتو تتهز و تتحط قدامي .. رجال وراه قاعدين يقدموا .. حاولت نتمسك باي حاجة بصح المخدر مشا فيا كامل ..
#يسرى_أمجوج
#العميلة306