تلفت نغزرلوا .. هو يسوق .. ملامحوا هادية .. المخلوق هذا كل نهار بوجه و مزاج .. مي حبيت هاذ الجانب منو .. زعما انا ظلمتوا .. وقت دخلتوا فاللعبة تاعي .. تلفت ليا .. غزرلي ندرا كيف .. فقت على روحي و دورت .. نغزر للطريق ..
منار؛ ريان ؟
ريان؛ ممم
منار؛ نعرف مستغربة ..
حبس الطاكسي على حنب و تلفتلي
منار؛ الشي اللي عرفتيه عليا للدوك .. غير الخايب.. ديجا معندكش بزاف تعرفيني .. صح راني خايب .. و داخل فالمافيا .. و حياتي كلها تخلاط ... منيش انسان مليح صح .. مي كاين جانب نحب غير أنا اللي نعرفوا برك .. و اللي ليوم شفتيه .. الجانب هذا نتي أول وحدة و آخر وحدة تشوفو .. الجانب المليح مني يا ريان مينفعش .. فالميليو اللي عايش فيه .. تغفاي دقيقة .. يمحيوك .. جبدني من يدي .. جا وجهوا مع وجهي .. حط جبهتوا على جبهتوا .. كرشي تقلبت عليا ..
منار؛ حابك نخليك فالجانب المليح من حياتي .. حابك تكوني هاذيك الحاجة المليحة فحياتي كامل .. تبانلك متسرع وبالاك شايخ عليك .. مي أنا هكا منأمنش بتضييع الوقت .. و جامي غلطت فقراراتي .. على هاذي كوني معايا و اللي يخمم يقيسك بنسمة هوا .. والله يا ريان والله .. خبروا يلحقك قبل ما ترمشي .. أوكي ؟؟
هزيتلوا براسي ايه .. تبسم و باسني على جبهتي ..فرفشلي شعري .. و رجع عدل روحو في بلاصتوا .. و ديمارا .. خذيت نفس و زوج و ثلاثة ..حاسة بالضيق فسدري .. كلماتو خلاوني نتخض .. حبس قدام ريسطورون ..
منار؛ هيا
ريان؛ منحبش ناكل هنا
منار؛ وين ؟
ريان؛ النادي
منار؛ آ بش تشايخي مع هاذاك السارفور
ريان؛ كي خويا هاذاك
منار؛ مام يكون معاك فالليڤري تاع لافامي .. منستعرفش
تلفت ڨحرتلوا .. و تلفت نغزر للناس من الكارو .. نزل و جا جيهتي حللي الباب ..طبقت يديا .. و تكيت راسي للتالي تاع منيش نازلة .. هز حاجبوا و مبعد خبط الباب طربقوا .. تهزيت و تحطيت .. ركب و زاد خبط بابو .. طيروا .. و ديمارا .. بنفس الجنون تاع البارح ... محبيتش نزيد معاه الهدرة .. شوي و وصل منين النادي تلفت ليه .. دوكا هادا بنادم .. هز تيليفونو و نزل .. مستنانيش مامپا و مشا .. نزلت خلطت عليه .. مد المفاتح للعساس .. و دخل .. البنات الكل .. يغزرولوا .. وحدة تروح و وحدة تجي يسلموا عليه بلا الذكور.. تحسب دخل ليوناردو ديكاپريو ... جات عيني على جاكي .. غمزتو فهمني .. بلي اني معاه ميغلطش فالهدرة .. قدمت للكونتوار و خليتوا يسلم و يشايخ .. ضربت يدي فيد ريكي و سلمت عليه ..قعدت
ريكي؛ ههه واش كاين تطورات ..
ريان؛ ههه اغفل برك تخلطت لازمنا قعدة ..
طلعت راسي درت لجاكي باي باي .. هزلي حواجبوا و عمل رياكسيون تاع هذا وين و دارلي باي باي .. تبسمت و تلفت لريكي .. وصلك لميساج مالا
ريكي؛ ابقاي برك تخلطي .. ديريها كحلة ومبعد ابعثيلي ميساج متخافوش اني بخير مع منار .. شكون هجموا على دارك ؟؟
ريان؛ حكاية طويلة .. المفيد دوك راني فدارو ..
حطلي الكوكتال جيت نهزوا .. خطفوا من يدي .. رشف منو ..
منار؛ ممم سپيسيال تاني ..
جبدني من يدي
ريان؛ ويين
منار؛ نشطحوا
ريان؛ لالا
منار؛ مش على كيفك .. لكان عليا .. اسخايليني مش موجود ..
ريان؛ روح تشطح مع العريانات هادوك تقول نتا اللي كمت خاب تجي مش أنا ..
غزرلي ندرا كيف
ريان؛ واش
تبسم .. و تلفت .. مبعد عاود دور ليا .. حط يدوا على وسطي و جيدني عندوا .. عينيا تحلوا .. رجعلي بيدو الثانية شعري ورا ..
منار؛ هه غيرة ؟
ريان؛ كيفاش ؟
عاودت خممت وش قلت .. يعطيني قصة للساني وش دخلني فجدوا .. عضيت شفتي .. عينيه ترشقوا عليهم .. طلع صبعوا فك شفتي من بين سنيا ..
منار؛ غير فوتك من اللقطة هادي .. نتخلط كامل ..
بدينا نسوطيو و نشطحوا على الموسيقى التيكنو ... و أنا نتمايل و نسوطي و نلف في شعري عالجوانب الكل..
YOU ARE READING
العميلة 306 -أخوان في عشق إمرأة واحدة - (لهجة جزائرية )
Actionالعودة بكرونيك جديدة 💥 ستيل مافيا تعرفوني مع الأكشن 🤷🏻😂.. المهم باش نخليكم تدمنوها 😎.. و من دوك أصحاب القلوب الضعيفة متقراوش .. اختصارا قسحوا قلبكم باش تنجموا تعيشوا أحداثي 💥.. الاحداث تبدا تبانلكم بالشوي .. نحب ماكس تفاعل .. الكل تكونوا حاض...
