#للجميلات_حصراً

#للجميلات_حصرا ٥١

دارت وجهي باصابعها عليها وركزت بعيوني ( ديار اني مقتنعه بيك زوج مناسب صبور
وهذا الاختبار عرفت عدم خيانتك وخليتك تحس ان الخيانه مااتقبلها ولا اسكت عليها .. .. هسه صار القرار الك
اذا تريد تتقدم اليه .. اعرف راح تعيش ويه زوجه ذكيه قويه .. الحب مايعمي عينها ولا يدوخها
زوجه تكون بحضنك .. وعقلها يشتغل مو مغيب .. زوجه تحبك وتخلصلك .. ومن تحس بيك تخون .. اتركك بنفس اللحظه .. هاي اني )

وصلتها للمستشفى اثنينا ساكتين وافكر بكلامها
اخذت سيارتها وطلعت للكليه

واخذت ايام .. افكر بقراري ..
مامتردد بقرار الزواج .. بقدر ماخايف ان نور تعتبر الزواج حرب والحب جبهه قتال ..
الدور المرسوم اليه واضح بصعوبته .. وهالصعوبه ماتعني التخلي عن انسانه احبها ..

اشوفها بيتهم واني رايح .. ومرات امر عليها .، وهي ملتزمه بعدم التطرق لموضوع الخيانه
بعد ماتاكدت استعدادي اروح للشرطه واثبت براءتي ...
ولاتسالني عن قراري ..

تركت دنفر ورجعت لنيويورك .. بقى الاتصال بينا. اسبوعيا ..
ولمست تغيير بعلاقتها ويايه ..
كان كافي ان ارجع بشهر السادس من هذا العام .. حسب ماطلبت .. مني .. مگالت مشتاقه
فقط سالتني( اذا تگدر تجي اشوفك ) ومتاخرت سافرت يمها .. وشفتها بشقه ابوها.مره وبالمستشفى مره

والحاح ماما بموضوع الخطوبه بنفس الزياره جاوبتها( بكيفج )

يوم الجمعه قبل سفري بيومين
بالليل طالع مع ميثم واتصلت ماما شذر ..
( ديار روح على نور جيبها وتعال لبيت عمتك )
وبلا معلومات اضافيه رحت جبتها وهي متلقيه نفس الاتصال من امها ( تعالي ويه ديار ) وظلت تسالني ( اكيد متعرف .، وشنو تتوقع راح يصير )
عندي حدس لكن ممتاكد منه
وتاكدت من وصلنا .،
والگعده لامه كل الاطراف المعنيه بزواجنا .. وبتخطيط من ماما شذر وعمه ندى
گعدنا نسمع القرارات تتلوها شذر علينا
( سالفتكم طولت .، واثنينكم متعرفون تتصرفون .، لذلك اني اليوم خطبت نور الك .. وحددنا شهر الثامن خطوبه وعقد )
كملت ندى ( اني اختاريت الشهر الثامن لان عيد .. ونور ماعدها سمستر جديد ) نظرات نور ماشفت بيها رفض فقط اتهام ان اليه علم بالموضوع
( لاتبوعيني ماعندي علم باي شي )
( مصدگتك هو اني حجيت )

واعلنت موافقتي مسبوقه بتقبيل راس ماما وعمه وسط اعتراض نور
( .. وبابا غير تگولوله )
فهمتها ماما ( ابوج يدري اني اتصلت بيه وگال اهم شي نور توافق )
( عندي شروط )
سالتها امها ( شنو شروطج )
( يترك نيويورك قبل الخطوبه ويعيش اهنا .، اني ماعندي وقت اراقب واتقصى )
صارت عيونهن عليه كلهن
( مو سهل انتقل لان شغلي اهناك .. يحتاج وقت بين مالگى شغل اهنا )
( عندك لشهر الثامن .. والشرط الثاني الزواج بعد سنه ..
واسكن بالبيت القريب من ماما )
الشروط الوضعتها واقعيه ومقبوله وقبلت بيها .. وجلستنا كانت صريحه .. وحتى تكون موافقه اكيده اتصلت امام نور بوالدها وشكرته على موافقته واوصاني بيها بكلمه ( دير بالك على نور هذي نور عيوني )
وجاوبته ( ان شاء الله بعيني )

وسعيت لتنفيذ شروطها .. بشهر السادس من هذا العام انتقلت لدنفر .. بعد الحصول على عمل
وسكنت بيت والدي القريب من عمه ندى ..
الخطوبه والعقد تكون بشهر الثامن بالعيد وزواجنا بالسنه القادمه ..
نور تتخرج بشهادة (طب تمهيدي ) بسنة ٢٠٢٣
وهو الجانب النظري والعملي ..
بعدها تبدا بدراسه تلث سنوات الاختصاص .. وبعدها اارزدنت
او طبيب مقيم يسمح الها بممارسه الطب في المستشفيات قبل المرحله الاخيره .، وليس من حقها فتح عياده .. لذلك بعد الزواج .، يكون امامها سبع سنوات دراسه
وماما شذر وعمه ندى وكذلك اني متعهدين بمساعدتها .، لتحقيق حلمها الاصبح حلمنا جميعا كعائله وحده ..

——————-

انتقال ديار لدنفر صار بعد نشر القصه بنهايتها الاولى .. والاتفاق على الخطوبه تم بشهر السادس .. جهاد وخلافه
مع لينا وصلني متاخر ومانذكر بالنهايه الاولى

ندى بصحه جيده وتمارس عملها كمعلمه .. وسعيده بوجود بناتها وتقدمهم للامام
وتتولى تربيه يوسف وتعليمه ..حولها الكثير من الصديقات ..

هدى وزوجها يعيشون حياة طبيعيه بالقرب من امها .. وجدي يعتبر ندى امه الثانيه

منى طالبه حقوق ومدللة والدها وامها

جهاد مستقر مع زوجته مع وجود بعض الثورات من الطرفين ..وعلاقته بندى علاقه طبيعيه باعتبارها ام بناته

ميثم يعمل في مجال الاخراج
وحياته العاطفيه مازالت مغلقه على ذكريات حنين

سلام مستمر في دراسته ..

شذر مع اولادها ومحتفظه بصداقتها مع ندى
وحاولت اصلاح الامور بين اهلها
ومازالت تحاول

نور وديار يستعدون لاتمام الخطوبه .. وحياتهم العاطفيه شان خاص بيهم ...
————————
الى هذا الحد تنتهي قصتنا .. وهذا الحد السمحولي ابطال القصه بنقله عن حياتهم الخاصه .. ادعيلهم بالتوفيق ..
وشكرا اختكم زينب الموسوي