العميلة 306 -أخوان في عشق إمرأة واحدة - (لهجة جزائرية )

الحلقة 1 بعنوان الخيانة

الحلقة 1 : بعنوان #الخيانة
كون يخيروك بين زوج حوايج .. تحبهم بزاف .. كيما حياتك و حياة أغلى شخص في حياتك .. انتا واش تختار ؟..
اممم لكان كنت وفي بزاف راح تختار حياة اللي تحب .. و لكان عدت أناني باش تختار حياتك .. عالأغلب الوفاء و الانانية.. مجرد مقاييس .. خاطر كل واحد يحب روحو مهما كان..
تلفت نحيت السكوتش اللي على فمهم للزوج .. شافوا معايا ..
-ربي يعيشك .. ن ن نقدر نمدلك الد دراهم اللي تحبي .. جيست خلينا نروحو أنا و مرتي ..
ريان؛ جواب غلط دوك وين كنت نقولك عالأنانية .. و مفهمتش الدرس ..
صونا تيليفوني ..
ريان؛ آ دووماج منقدرش نعلمك دروس أكثر
- ت ت ت عيششششي اقتليها هيا و أنا لا و
ريان؛ هههههههه برافو نحب الناس اللي تظهر على طبيعتها ..درس تاني و الأخير هو كيفاش تموت بالسم اللي قاعد تقتل بيه ولاد بلادك
- لا لااااا ربي يعيشششششك
-متنجميش تعمليها .. دزاير كامل تعرف شكون حنا.. يعني نقدروا نخرجوا منها كيف الشعرة من العجين ..
ريان؛ هههههه هاي نطقت مرتك و تهدد ضربة وحدة
قدمت ليها.. غرزت ظفاري في فكها .. و خبطت راسها فالحيط اللي وراها ..
ريان؛ كي نكون أنا مكانش قانون فوقي و لاتحتي .. كاين قانون ريانو برك ..
فلتها .. رحت هزيت البراوات متاع الدوا .. و رشقتهم في يديهم .. خاطر مثبتتهم فالحيط .. باقيين يعيطوا .. شفت مع يديهم كي ترخفوا. ..نحيت الحبال اللي كانوا مربوطين بيهم  تبسمت .. و تلفت حطيت يديا ورا راسي .. تكسلت .. و نزلتوا .. شفت معاهم ..
ريان؛ و هكا تكون حصة اليوم خلصت فهمتوا الدرس ؟ .. اممم سكوتكم يعني فهمتوا.. اوكي
طبست هزيت الفاست .. السلاح .. و نواظري .. لبستهم و خرجت .. ديجا الليل طاح .. ركبت الطوموبيل.. ديراكسيون النادي .. حبست بالوقت فالپارك .. صونا تيليفوني .. شفت مع النومرو و نسفت
ريان؛ وي
- علاااااش قتلتيهم !!!
ريان؛ شكون سع ؟
- الميلياردير جاسم و مرتووووا .. المهمة كانت انك تكشفيهم و مبعد العدالة تاخذ مجراها مكانش لازم تديري لي فراسك كيما كل مرة
ريان؛ نسمع مليح مكلاه العياط ..
-معلابالكش شكون ورااااهم يا بنتي يروحوك راهم
ريان ؛ هههههه جنرال ليا الهدرة هاذي منحتاجش نذكرك بلي منستعرف بحتى واحد .. و كي عاد وراه وزير الصناعة .. اللي قتلتهم نعرف بلي الپوليس ميقدرو يديرو والو .. كلش يمشي كيما يحبو هوما
-عميييل 306 حذرتك ألف مرة من تهوراتك
ريان؛ ههه طمن تو تتمركا بلي خذاو دوزة زايدة تاع لادروڨ و تتقفل القضية .. كعملية انتحار.. امم داخلة نسهر دوكا بونوي
كوپيت عليه .. أصلا عمبالي دوك يبقى يحكي للصباح.. بصح من لي خذيت القضية هاذي شرطت ندير اللي نحب ..
طفيت التيليفون طيشتوا.. جبدت الفرد من تحتي .. حطيتو تحت الكرسي .. عدلت المراية .. رميت يدي حليت شعري فرفشتوا .. هزيت روج بوردو درت فشواربي .. ريقلت الفاست و نزلت .. باقية نمشي لين .. دخلت موسيقى عالية .. مي ماش الستيل اللي نحب .. تخطيت اللي قاعدين يشطحوا.. و رحت للديجي .. جيست مع شافني نحا الكاسك ..
جاكي؛ ريااانوو هنا
ضربت يدي فيدو ..
ريان؛ ههه بلا ما نوصي جاكي..
ضحك و غمزني .. عطيتوا بالظهر .. تبدل الغنا ولا trance و house ... تبسمت .. و بديت نشطح مع الغنا .. معرف قداه و انا نشطح .. ننسا كلشي وقت نجي هنا.. هنا نكون ريان  .. مش العميل 306 ... قدمت للكونتوار ..تبسملي بالوقت .. ضربت يدي فيدو ... حطلي ال  smoothy تاع فراز كيما العادة
ريكي؛ طولتي الغيبة ريان ..
ريان؛ ههه تعرف الخدمة كيفاش ..
ريكي؛ إيه نخمم نجي ندير كورس تاع بوكس عندك
ريان؛ دخل سع كرشك اللي بدات تخرج مبعد ساهل ههه
ريكي؛ هههههه من الكوكا
ريان؛ كوكا ولا ليريكا
ريكي؛ ههه بعدت عالميليو ميرو صاحبي ..
ريان؛ اممم ڨولي كشما تخلاط راو يدور
ريكي؛ حتى لدورك دعوة راكحة .. مي علاه تسقسي دوك راكي مدربة لياقة مش حاجة خلاف
ريان؛ ريكي مزالني
ريكي؛ ماش قلتي صاي خلصتيو حا تولي مع النادي تاع السپور.. واش رجعك للجوسسة و التحقيييق !!
ريان؛ برررح بررح مليح.. خاصك الميكروفون تاع جاكي بالاك!! 😏
ريكي؛ ياكي نتي رايحة تهبلي **** .. قلتي صاي كانت آخر مهمة ليك .. و تجيني ورا شهر .. تقولي مزلتي .. مستغنية على حياتك نتي !!
ريان؛ مكنتش رايحة نرفض و انا نشوف فالدروڨ اللي قاعد يدخل للبلاد ..
ريكي؛ و كي جيتي هنا تسما كملتي الميسيون كي العادة
ريان؛ وي
ريكي؛ و يلا منسقسي كيفاه كملت.. معريفتي تكفي ...
راح يشوف طلبيات لخرين .. رشفت من السموثي...عندو حق يقلق .. باسكوا حياتي قداش من خطرة تتحط عالموت .. و نسلك .. و آخر مهمة .. معجزة أني نجيت.. ريكي  و جاكي أصدقاء طفولتي .. خاطر من الصغر منصاحبش البنات هه .. وما خاوتي و عايلتي و كلش. . منخبي عليهم والو ..حطيت الكاس و رحت نشطح.. كي تحطت غناية تعجبني .. باقية نتمايل .. جيست مع تلفت .. جات عيني عليه .. منار الهاشمي ...قاعد مع وحدة فالبلاصة تاع ال VIP ...  دورت .. مهنة التحقيق تخليك تعرف العباد بالسيف عليك .. كملت نشطح .. هكا كلشي ننساه...
..باقية نسوطي ... و نلعب بشعري ..نحب ننسا شكون انا جيست نشطح و برك
..........
وصال؛ منار رايح تبقا هكا كل ليلة .. تشرب برك .. لدوك محكيتليش واش صرالك علاه تحولت هكا
منار؛ لكان رايحة تبقاي تهدري غير روحي منا ..
سكتت باقية غير تشوف معاه ..أصلا متقدرش تزيد فوق هدرتوا .. شكون يتجرأ يزيد هدرة ورا منار الهاشمي ..صونا تيليفونو .. شاف معاه ..
ناض خرج.... 
...........
مطار هواري بومدين :
نزل من الطيارة.. باقي يمشي بخطوات ثابتة .. حتى وصل للطاكسي تاعو .. حلوا واحد من رجالو الباب ... ركب و ديمارا ..يسوق بجنون .. طريق فارغة .. الثلاثة تاع الصباح .. رما يدو هز القرعة يشرب و يخبط فالفولون ..
إياد؛ أوووكي دوك نشوفو شكون يا أنا يا نتا الليلة .. و راس ما نخليك درس و لا منتسماش إياد ..
.....ً..........
خرجت من النادي .. ضربت في وجهي نسمة خفيفة ... خلاتني ندي نفس طويييل .. ركبت فالطاكسي تاعي و ديماريت .. نحب نرقد .. باقية نسوق .. هزيت تيليفوني كي وصلني ميساج من المخبر تاعي .. عينيا تحلوووا ..دورت الطاكسي فيسع و زدت فالفيتاس
ريان؛ مسسسستحيييييييل .. متوقعتش تصرا بالسرعة هاذي ..
زدت فالفيتاس .. ملازمش  نوصل متاخرة .. كلش يتخلط ... صونا تيليفوني .. هزيت و أنا نسوق ..
الجنرال؛ عميلة 306 تووولهي تدخلي فاللي رايح يصيير
ريان؛ جنررااال قضية 5 أشههههر و أنا نخدم عليها فالتالي نسمحلوا يفسد كلش
الجنرال؛ عميييييل
كوپيت عليه بالوقت .. و زدت فالفيتاس ... كون يقتلوا منقدرش نعرف الريسان اللخرين اللي مشاركيين فتوريد الأسلحةهو المفتاح لكلشي ...وصلت قدام القصر تاعو .. هدوء مش نورمال.. حتى الحراس اللي على برا مكانش .. الباب الكبير مفتوح .. جيت ندخل أما جبدوني من التالي .. تلفت نغزر للجنرال و الپوليس ... جيت نعيط .. اما تهزينا وطحنا التالي ..  وقت تفجر القصر بكلوا!!!!!!!  ... هزيت راسي من اللرض نغزرلوا كيفاش تاكل فيه النيران ..وقفت  نغزر للبوليس و الحماية المدنية كي طوقوا البلاصة .. مخي حبس من اللي نشوف فيه .. سمعت صوتو من التالي ..
الجنرال؛ كنتي رايحة تكوني ميتة بسبة تهورك
طلعت راسي نشوف مع النار ... عندو الحق ..أما كيفاش عملها .. وكتاش لحق يفجر قصر قد هكا .. تلفت غزرتلوا
ريان؛ علاش عمل هكا.. ياك شريكو فالخدمة .. المخبر جيست قالي اللي إياد فطريقو باش يقتل ضياء
الجنرال؛ خانوا مع مرتو ..
ريان؛ كيفااش !؟
الجنرال؛ الجواسيس تاعنا اللي كانوا يراقبوا فيهم قالوا بلي مرت إياد عندها علاقة سرية مع ضياء و الليلة هاذي كانت فهاد القصر
ريان؛ مرتو خانتو ياخي حامل منو !! و كي خانتوا يحرق قصر كامل و ولدو في كرشها !!!
الجنرال؛ هه مزال متعرفيش عايلة الهاشمي مليح .. على. هادي قتلك بعدي .. شفتي جهنم على وجه الدنيا إياد
................
تكا راسو للتالي يتبسم .. نفخ السيڨارو فالهوا .. تيليفونو باقي يصوني .. هز الفرد ضرب فيه .. و هز الفرد يغزرلوا .. جات صورتها بين عينيه .. كبس عالفرد بكل قوتوا ورماه عالكرسي اللي قدامو .. جبد تيليفون خلاف ..
إياد؛ عاود احجزلي تذكرة لإيطاليا
كوپا عليه و ديمارا بالطاكسي .. يسوق و يرحي فالدخان .. للحظة سرح فالتفكير .. فاق على صوت صون بالقاوي .. هز راسو شاف فالكاميوا اللي فوجهوا .. جا يلف بالطاكسي أما ملحقش ... آخر صورة كانت بين عينيه مرتوا و هي فحضن أنتيموا ....
#الخيانة
#العميلة306
#يسرى_أمجوج