#للجميلات_حصراً

#للجميلات_حصراً ٢٦

المكسيكان موجودين بيها بكثره واللغه الاسبانيه الي يتحدثوها تقريبا تستخدم لغه بديله عن الانگليزيه .. والمدينه  اقتصادها يشجع على الاستثمار .
خلص التجوال بالمدينه .. مع جودي  والجوله كانت مفيده اليه ايضا  عرفت بيها محلات رخيصه واسواق عربيه
وتجمعات ثقافيه
سافروا الخطار ..وبعد اسبوع طلع جهاد  للشقه مع بقاء الكيس وعدم التام العمليه
الاطباء نصحوه يطلع ويكمل علاجه بالبيت افضل ما تزداد تكاليفه على التامين ويقطعوه عنه او ميدفعوه ..
اوكلت مهمة رعايته اليه
ويستخدم كرسي متحرك .. رجليه ممنوع نهائيا يستخدمها او حتى يحاول يدوس عليها
اني صرت العكازه  اله ..
اتحملت وماشكيت وحتى لو اريد اشكي لمنو .. ماشكيت من التعب وانما من الاهانات  الي اسمعها .. واسكت واقدر  صعوبة الحال وهو يشوفني اغير الكيس يوميا اله
واصعب مامر عليه وعليه
هوه من اسمعه يدعي على نفسه .. بالموت
جهاد فدوه لاتدعي هالدعاء وقت الغروب الله يخليك اني وبنتك منو النا

تنزل دموعه جزع ويجاوبني
: لج اذا اموت احسن الج ولبنتي بشنو فايدكم اني
: كافي صوتك بالبيت  ياعيني والله مابقى الا القليل
الامر الثاني الصعب هو اخذه للمستشفى يوميه للعلاج
لمتابعته عمليته   وعلاج الطبيعي   .. بصعوبه احمله من الكرسي للسياره
والشباب الي يتجمعون بالشارع .. يساعدوني هالامر يخليه عصبي طول الطريق
وياويلي اذا  ارتكبت خطا بالسياقه واحد دگلي هورن
تنفتح فوهة البركان
: ثوله متشوفين  السياره وگفت قبلج
: اسفه جهاد تعرف ممتعوده على الشوارع بعد
: ممتعوده  لو حضرتج صافنه  بيمن تفكرين

اوصله للمستشفى انزل بالباب  واستدعي المسعفين يساعدوني  يخلوه على الكرسي ويگلي روحي انتي
اروح اخلي بنتي بالحضانه  .. وبعدها للدراسه ... وارجع للمستشفى ...اتابع  حالة زوجي وهيه في تطور بعد ونرجع اني وياه اخذ بنتي وبطريقي اتسوگ احتياجتنا وارجع
تبدي بالبيت  دوري كممرضه  وام لطفله رضيعه .. وطالبه عندها فروض دراسيه

استمر الحال شهر ونص رفعوا الكيس
.. .. واخذ خطوات  اوليه بالمشي  بمساعده مشرفين رياضيين ..
داخل المستشفى ..
وسمحوله  يوگف باليوم  عشر دقايق  .. وزادت بعد الخمسين يوم الي ساعه .. وبدا يمشي بمساعده عكاز ..
والعصبيه بدت تخف  ويحل محلها التفائل  والامل

اما دراستي. فكل سمستر انهيه  اكون من المتفوقين الا هذا السمستر تعثرت بدراسة الحاسوب   بدرجه ضعيفه   ... واخذت العطله  وبقى   على حصولي على الشهاده   تلث سمسترات  ..، العطله استغليتها باخذ دروس لغه اسبانيه لكون المدينه معظم اطفالها مهاجرين ولايتحدثون الانگليزيه بالاضافه للعربيه الي اعرفها حتى
تكون ميزه اليه في التعيين

الطموح  متعب .. لكن عوضني عن التفكير باشياء سلبيه كثيره حدثت بحياتي .. وتركت كسر  احاول اسدل عليه الستار .. وامضي للامام ..
صار عمر نور ١١ شهر
  من انتهت رحله . العلاج  بصباح السبت وصلته للمستشفى ورجعت للبيت
دخل عليه  جهاد بعد ساعتين    واني العب مع نور   مكعبات بالارض ..
وگف بالباب يتاملنا .. بيده  عصى يتكأ عليها .. يبدو اضعف
مماكان  .. دنگت على نور  الي تعرفه وتميزه بس مشايفته وهوه واگف
: نور بابا  اجى  روحي عليه
وگفت تخطو خطوات متعثره وصلت يمه وصل يمها ..
وتاشر يشيلها وتگله ببا 
شمر العصى وشالها  .. وتبعتها اني حضنتهم اثنينهم وابجي