#للجميلات_حصراً

#للجميلات_حصراً ١٩

كنت غاطه بنوم عميق وحسيت ديار صار يمي بالزحف
تمدد ويايه وردد كلمه ( ما ) ويجر بالطرف. افتهمت جوعان ويريد اكل ... جاوبته ( ان شاء الله )
بعدني مصاحيه ... حسيت ايد خطف شالته .،، وركضت وهوه يصرخ ( ما ... ما )
باوعت رغد تستشيط غضب
وحرگه
تگأت على اديه وكمت اجيبه

: رغد الولد جوعان شبيج وياه

وهيه تسد باب غرفته عليه
تخصرت بوجهي
: معليج انتي هذا ابني واني اربيه
اسمعه يصرخ ويريد يطلع

: الولد ديصرخ رغد اذا اجى نجيب وسمعه يبجي تدرين شيسووي بيج

: طبعا. نجيب يصير ضدي ويكتلني اذا انتي تارسه راسه
والولد يصيحلج ماما
ولج هنيالج على هالحظ .. من حورج .. من طولج من عرضج

هيه تعد وتصف والولد محبوس جوه يبجي
كمت ارتكز على الارض والجدران

افتحي الباب رغد وانتي وكليه ولج يموت هيجي

دخلت وقفلت الباب ..، بقيت اني واكفه انتظر تسكته
لكن صوته مستمر يبجي ويگطع گلبي وتضربه
وتصيح عليه( اني امك )
يشهك ويفز من الضربه احس بفزته من البجي ينگطع ويرد يبجي

رحت جبتله اكل بصحن ودگيت الباب

: رغد افتحي الباب واخذي وكليه انتي
صاحت بعلو صوتها

: اسكتي انتي من يسمع صوتج يزيد
: زين شيليه خليه يسكت وج گطعتي گلبه حرام عليج

مردت وصراخه ازداد
ظليت اضرب بالباب وهو يبجي
واتوسل لحد وگعت من القهر واني اسمعه يصيح ( ما )
اتجمع بگلبي قهر ... وصرت احجي وياه من خلف الباب حتى يسكت
: ديار حبيبي هاي اني خلف الباب .. اسكت حبيبي هسه يجي بابا ويجيبك يمي

ردت هيه عليه بكل غضبها

: لو تموتين انتي ونجيب بعد متاخذين ابني ...

فتحت الباب وكملت هجموها عليه
: وج تتلوگين لنجيب گوليله لا مره وحده

: رغد ديار طفل ماله دخل
فدوه بس سكتيه

اني على الارض وديار يبجي وهيه حاجز بيني وبين الباب وتحجي عليه

: مو انتي تصلين وتسوين نفسج خيره ليش تاخذينه مني

: ولج اني مااخذته نجيب فرض علينا هالشي .، كافي ولج الطفل راح يموت من البجي

نص ساعه اني اتوسل والطفل يشهگ من البجي .. لحد نام بمكانه
وعادت نفس التصرف بالليل. من راد ينام عندي
وهيه متقبل. .، وقفلت الباب
عليه. وتصيح للطفل ( تنام اهنا .. اني ماما مو شذر )
دگ نجيب الباب يريد يطلع الولد ..، وهيه متقبل
والضرب على الباب وصراخها
جنن. ديار. وصار يصرخ
نجيب بكل قوته. ضرب الباب وكسره ... ويه دخلته هيه شالت ديار وخلته بينه وبينها ...
حتى ميضربها ... اني اجيت اقترب على الطفل اخذه