#للجميلات_حصراً

وگفنا اثنينا .. هوه اخذ ايدي ..،
ومشينا  بين الموجودين واسمع هوساتهم وهلاهلهم تمنيت
عندي باب ثاني واطلع منه ... صوت الطبل اكيد اخترق مسامع جهاد وشگ گلبه ...
صعدت السياره  ومازن يصعد طرف فستاني .. سمحت لنفسي بنص التفاته على باب بيتهم
ماكو ولاحتى طفل طالع
تنهدت بالخفيه ... وعيت على صفگه وهلهوله من ام مازن الي اخذت المقعد الامامي وتردد
(اخذنا شمعة بيتكم والفلوس متفيدكم )
گعد يمي مازن  ومشت السياره
اول جمله سمعتها منه بحياتي الزوجيه

: باوعيني لاتندارين للخلف 
ابتسمت ودنگت راسي...
كاسيت السياره بيه اغنيه عبرت الشط  لكاظم الساهر ... وام مازن تردد الاغنيه بصوت  جميل فيه نبرة سعاده ... والسايق مشاركها الغناء وهز الاكتاف  كل ماتتوقف  الزفه ...
وتتوقف بقية السيارات ... لحد وصلنا لفندق المنصور ... اخذتني امه واخته ميسون  للغرفه المحجوزه النا ... وهوه واخوه باسل بقوا جوى عند الرسبشن
بالمصعد اعتراني خوف  ...
ولاحظت ام مازن متحجي  وميسون متسكت تحجي وامها ترد بكلمه كافي اسكتي
واثنينهن  ما وجهولي  كلمه وحده .. ولاحتى لاتخافين
او مبروك
طلعنا من المصعد للغرفه فتحت الباب امه. ودخلت وياها ميسون واني بالباب  اسحب بدلتي دخلت بعدهم ... ميسون فتحت الشباك  وتتفرج
وامها افترت بالغرفه ...
وخلت جنطه زغيره اليه كانت بايدها  على الارض  ... مافهمت نظرتها اليه ولا كلامها الي وجهته بعد ماگعدت على كرسي مقايبل ميز المرايه

: امج ليش مااجتي للزفه
صوتي يرجف وخايفه جاوبت

: تعبانه شويه خطيه صار ١٤ يوم تركض ويايه على جهاز العرس

ردت بصوت ناصي

(خطيه  )  وسكتت

اخذت  گلاص مي  موجود بالغرفه  اشرب منه  واديه ترجف  وريگي ناشف
شافت حالتي  ام مازن .. انقهرت عليه
: اگعدي ماما  ارتاحي  الخوف الزايد  ماله داعي

اعترضت ميسون
وتركت الشباك وتباوعلي باستصغار

: ماما شنو ..
اقتربت من امها وحضنتها
؛ انتي ماماي اني وبس  هيه گوليلها  سهير
افتهمت الام  وباوعتني
: هذي تغار عليه .. تعرفين الوحيده ومدللة
ابتسمت
: الله يخليكم لبعض يارب 
وبين نفسي اخذت حذر من  ميسون
ويمكن هيه افتهمت حديث العيون وردت عليه

:  مكياجح محلو   .. ستايله قديم
: انداريت على ام مازن  وسالتها
: صدوك ماما مكياجي محلو
ههه العفو اقصد خاله
ردت هيه
:  ميسون شفهمها بالمكياج ،، بالعكس حلو ونازك

صديت اول محاوله لميسون بالتعدي عليه .. واي محاوله ثانيه مستعده اردها 

دخل مازن  للغرفه اني واگفه بوسط الغرفه وامه گاعده
شافته وگفت وباسته
وبعدها دخل اخوه باسل
وبيده كاميرا  اخذنا صور
مازن بجهتي وايده خلف كتفي وامه لازمه ايدي  وميسون بجانب امها ..

بقينا واگفين متگابلين .. وساكتين
بين ماامه سدت الشباك والبردات  
طلع باسل بعد مابوس اخوه
وباركلي
وامه سألتنا
: محتاجين شي  .. لو اروح
جاوبها
:الله وياج يمه روحي