أحمد وهـو يفتح باب شقته قائلا :
ــ: أهلا أهلا سعادة البرنس
نظر له رامي وهو يستند بذراعه على جانب الباب قائلا:
ــ: إيه ياعم الباشا مش باين يعني رحت الفيلا قالولي مش موجود وموبايلك مقفول
أحمد وهو يشير له بالدخول :
ــ: طب ما إنت عارف إني هنا في الشقة عشان خنقة أبويا ..أدخل أدخل
دخل رامي وهو يقول :
ــ: طب ما إنت مزبط نفسك 24 قيراط أهو
أحمد بتعالي وهويشير لرأسه :
ــ: عشان دماغي ديما مفيش زيها ..هو فاهم إني بشتغل وأنا فعلا بشتغل .. بالنسبه لشغل الشركات عصام مش مقصر فيه وشغل المزاج بقى أنا مش مقصر فيه
جلس رامي قائلا:
ــ: طب مش خايف من عصام وإنتا موكله يعمل كل حاجه عنك
أحمد وهو يجلس أمامه قائلا بغرور:
ــ: عصام ميقدرش يخرج عن أمري كنت أخلص عليه
مط رامي شفتيه بعدم رضا ثم قال:
ــ: آه صحيح نسيت أقولك مش أنا بدأت أشتغل
أحمد بلهجة سخريه:
ــ: يا راجل ومن إمتى وإنت بتفهم في الشغل؟
رامي بشيء من الغضب:
ــ: من النهارده يا خفيف.. المهم قولي آخر أخبارك إيه؟
عاد أحمد بظهره للخلف ووضع ساقا فوق الأخرى وهو يقول :
ــ: مفيش عادي.. البت اللي كانت عاملالي فيها عذراء مصر خرجت معايا طول اليوم..ياعم البنات دول أكبر خدعة في الدنيا
رامي بضحك:
ــ: وطبعا إنت مقصرتش
أحمد بخبث:
ــ: طبعا يعني عايزني أسيب البنيه كده.؟ لازم تاخد حقها تالت و متلت ..وإنت عارف أنا راجل حقاني والبت بشوية حنيه إظبطت وإنت عارف حكمتي
رامي بمرح:
ــ: عارفها وحافظها ( بالراحه وبالهداوه تمشي معاك حلاوه) ..
أحمد بغرور:
ــ: إشطه عليك يا برنس
رامي بفضول:
ــ: طب وريهام عملت معاها إيه؟
أحمد بلهجة مليئه بالحقد :
ــ: سودت عيشتها
رامي بإستغراب:
ــ: إزاي؟
أحمد:
ــ: ضحكت عليها وجبتها هنا وصورتها
رامي بدهشه:
ــ: إزاي وإمتى.؟ وريهام وافقت ببساطة كده؟
أحمد بحنق:
ــ: لأ ماهو محصلش اللي في دماغك البت طلعت ناشفه برضو
رامي بتمعن:
ــ: مش فاهم يعني حصل إيه؟
مال بجسده للأمام وهو يقول بحنق:
ــ: أنا كنت مخطط أصلا أوديها في داهيه وهي ساعدتني.. قعدت تقولي اللي بنعمله غلط ومش غلط وكلام مالوش أي تلاتين لازمه..المهم قلتلها تعالي أعرفك على أهلي وكنت مرتب مع واحد من الرجاله يجي الشقه ويحط الكاميرا في الصاله وأوضة النوم وفعلا حصل بس بنت اللذينه لما بوستها ضربتني ألم وطلعت تجري
رامي بفضول:
ــ: وبعدين؟
أحمد بلا مبالاه:
ــ: ولا قبلين بعت الصور لأختها وزمانها دلوقتي مسوده عيشتها
رامي:
ــ: وناوي على إيه؟
أحمد بمكر:
ــ: هسوي البت ريهام على نار هاديه ولما أزهق منها هفضحها
.................................................................................................
صفقت يمنى بسعاده كالأطفال في سيارة شادي وهي تقول:
ــ: الله ياشادي من زمان مفرحتش كده ربنا يخليك ليا
شادي بإبتسامه عذبه:
ــ: ويخليكي ليا يا يمنى ياحبيبتي ..قوليلي بقى نروح ولا لسه في مكان في الإسكنديه مروحتيهوش؟
يمنى:
ــ: أيوه في ممكن توديني عند صحبتي؟
شادي:
ــ: نعم ياختي إحنا مش هنروح النهارده ولا إيه..؟ بقالك خمس ساعات بتلفي؟
يمنى :
ــ: معليش أصل هي عندها مشكله وأنا قلقانه عليها
شادي بتنهيده:
ــ: حاضر يا ستي
يمنى بفرح:
ــ: تسلملي يا برنس
شادي بضحك:
ــ: ولا يهمك يامعلم
أخرجت يمنى هاتفها وإتصلت بساره وعندما سمعت صوتها سارعت قائلة:
ــ: ساره حبيبتي أنا جيالك في الطريق
ساره بفرح:
ــ: بجد يا يمنى أنا فعلا محتجاكي أوي
يمنى:
ــ: شفتي بقى قلب الأم كنت حاسه إنك محتجاني
ساره:
ــ: طب يافالحه مستنياكي
أغلقت يمنى الخط مع ساره وإلتفت لأخيها قائلة :
ــ: طبعا مش هينفع أروح وإيدي فاضيه صح؟
شادي:
ــ: صح هنروح نشتري حاجه بس عارفه يا يمنى لو قلتيلي خرجني تاني هولع فيكي
يمنى ببراءه:
ــ: ليه بس
شادي:
ــ: حرام عليكي لففتيني إسكندريه كعب داير
يمنى بضحك:
ــ: معليش بقى بس ساره دي صحبتي أوي
عاد ينظر للطريق أمامه وهو يقول بشرود:
ــ: ســــاره
يمنى بتمعن:
ــ: قلت حاجه.؟
نظر لها قائلا بغموض:
ــ: هي ساره دي صحبتك من زمان.؟
يمنى:
ــ: أه من سنه كده بس بت زي العسل
شادي:
ــ: طبعا لازم تكون زي العسل مش إسمها ساره
يمنى بضحك:
ــ: إشمعنا يعني
شادي:
ــ: وإنتي مالك يا رخمه
يمنى بعدم فهم:
ــ: مكنتش أعرف إنك بتحب إسم ساره كده
شادي بقوه:
ــ: لا على فكره مش بحبه خالص
يمنى:
ــ: إنت عبيط يله .؟ أنا مش فاهمه منك حاجه
شادي:
ــ: فكك يا يمنى وقوليلي عايزه تشتري إيه
....................................................................................
عند شاطئ البحر تقف سياره سوداء يستند عليها شاب وينظر للقادم نحوه قائلا بإبتسامه:
ــ: وربنا كنت عارف إنك جاي يا معلم
رامي وهو يمط شفتيه متجها نحوه:
ــ: على الله بس أرتاح وألاقي جو جديد
جلال بضحكه عاليه :
ــ: طبعا يابرنس ده أنا جلال والأجرعلى الله يلا تعالى أعرفك على الشله وأوعدك هتنبسط آخر حاجه
رامي بعدم إقتناع:
ــ: لما نشوف
أخذه ودلفوا إلى المركب..كوكــتيــل من الشباب تختلط بهن فتيات ..وخليط من المسكرات والموسيقى الصاخبة والأصوات المتعالية في مركب تشق طريقها في البحر يظن من فوقها أنهم يلهون ويمرحون ليتناسوا أمور الحياة وهمومها ولتملأ الضحكة محياهم ..مخطيئن في تقديرهم لكل شيء حولهم
..............................................................................................
هاله وهي تدخل غرفة والدتها:
ــ: ماما فلوس الجمعيه أهيه جبتهالك من عند خالتو أم سامي
نسرين بإهتمام:
ــ: هاتيها دي جات في وقتها.. بصي هننزل نشتري حاجات قبل السفر
هاله بإنزعاج:
ــ: أنا مش فاهمه لازمته إيه نسافر البلد عشان نبارك لبنت عمي طب ما هو نباركلها بالتيلفون وخلاص
نسرين:
ــ: مينفعش وكمان أبوكي عايز يشوف إخواته
هاله:
ــ: والمشاكل اللي بتحصل بعد ما بنرجع كل مره يا ماما
نسرين:
ــ: والله إنتي اللي بتنشفي دماغك يا هانم
هاله بحنق:
ــ: برضو أنا السبب
نسرين:
ــ: إنتي دايما عنيده كده وعايزه تشليني أنا وأبوكي
هاله بضيق:
ــ: الظاهرمفيش فايده أنا رايحه أزاكر يمكن أفلح في حاجه
...................................................................................................
في شركات الحماد للمقاولات وفي مكتب مديرها علي الحماد يجلس أمامه باسم وهو يتأمل بعض الملفات بتركيز
تنهد باسم بإرهاق قائلا:
ــ: كفايه ياعمي شغل كده يلا نروح
نظر له علي قائلا بحزم:
ــ: لو تعبت روح إنتا أنا لسه قاعد
باسم:
ــ: مش القصد بس كده كثير عليك أوي
نزع علي نظارته وهو يقول:
ــ: يا إبني أنا حياتي في الشغل
باسم:
ــ: طيب قولي بقى إنت مطمن لحكاية الصفقه الجديده دي
علي بإنتباه:
ــ: ليه مش إنت اللي قلتلي إنه عرض مغري
باسم بتفكير :
ــ: هي صح مغريه بس هو ده اللي قلقني.. إيه اللي يخلي رجل أعمال كبير كده يدخل معانا صفقه كبيره وإحنا يعني سامحني ياعمي بس مش منتشرين أوي
شبك علي أصابعه قائلا:
ــ: فاهم قصدك بس ممكن زي ما المهندس بتاعهم قالك تطوير للشغل بطرق جديده
باسم:
ــ: ممكن بس برضو كل خطوه لازم نحسبها كويس
علي بإبتسامه حانية:
ــ: عارف يا باسم رغم إنك صغير ومكنتش مع أبوك في الشغل دايما بس دماغك حلوه وبتعجبني
باسم بضحك:
ــ: أيوه أصلي بسقيها شربات على طول
علي بتبرم:
ــ: إطلع بره ياض
....................................................................................................
في محل حلويات فخم وراقي
شادي وهو يشير لأحد أطباق الحلويات المليء بأصناف رائعة قائلا:
ــ: ها دي كويسه؟
يمنى :
ــ: أيوه حلوه أوووي
شادي:
ــ: طيب هقوله يلفها
وأثناء وجودهم بالمحل رن هاتف شادي فأخرجه من جيبه وألقى عليه نظره ثم أجاب قائلا بإقتضاب:
ــ: ألو سلام عليكم
أتاه صوت داليا بعصبيه قائلة:
ــ: إنتو فين يا شادي الساعه7 المغرب إتأخرتوا؟
شادي بسخريه :
ــ: لا والله؟ يمنى معايا مش مع حد من الشارع ممكن أفهم في إيه ؟
داليا بغضب:
ــ: تعالوا بسرعه عايزاك
شادي وهو يحاول تماسك أعصابه:
ــ: قلتلك في إيه؟
داليا:
ــ: في إن سياتك مش ملتزم بإتفاقنا؟
شادي وهو يبتعد قليلا عن يمنى قائلا:
ــ: إتفاق إيه؟
داليا بحزم:
ــ: ميتقالش في التيلفون تعالى الفيلا يلا
شادي:
ــ: ساعه إلا ربع وأكون عندك
داليا بصوت عالي:
ــ: لأ سيب كل اللي في إيدك وتعالى
شادي بصوت صارم:
ــ: قلتلك ساعه إلا ربع خلاص بقى
ثم أغلق الخط وإلتفت ليمنى وهي تقترب منه قائله بقلق:
ــ: في إيه يا شادي؟
شادي وهو يحاول التظاهر بالهدوء:
ــ: مفيش يا يمنى يلا عشان أوصلك لصاحبتك
يمنى بقلق:
ــ: شادي إنت في حاجه مدايقاك
شادي بحزم:
ــ: لا مفيش يلا بينا
......................................................................................................
كان يجلس على طرف المركب تتصارع أفكاره كأمواج البحر المتلاطمه ..يغوص فيها يحاول إنقاذ نفسه من الغرق فيها ..وهو يفكر ويكاد قلبه يحترق ويحاول النسيان بوجوده هنا ولكن هيهات فهو مسئول عن كل ما حدث وقلبه لن يسامحه وسيظل حبيس بحره الذي لا نهاية له.
إقترب منه جلال قائلا:
ــ: عجبك الجو يا باشا؟
رامي بسخريه:
ــ: باشا
جلال:
ــ: مالك بس مش مبسوط ليه
رامي وهو يترنح:
ــ: صبلي ويسكي
جلال:
ــ: مش كفايه كده شربت كثير
رامي بغضب:
ــ: هو أنا بشرب من جيبك صبلي بقولك
جلال:
ــ: طيب يا عم متزعلش بس إيه رأيك في الجو هنا.. إحنا على طول كده
رامي بملل:
ــ: قولي المركب هترجع إمتى
جلال بإستهزاء :
ــ: ساعتين كده وراجعين.. إيه إنت خايف لا نخطفك متخافش مفيش معاك دلوقتي حاجه نسرقها
رامي بضحكة سخريه:
ــ: يا خفيف.. دمك يلطش يله أصلا هو إنت ..........
وفجأه قطع حديثه ولمعت عيناه ثم ضحك بصوت عالي قائلا:
ــ: هو ده الكلام وربنا إنت اللي باشا يا جلو
جلال بإستغراب:
ــ: أنا مش فاهم حاجه
رامي بمكر :
ــ: مش مهم تفهم.. المهم إني لقيت الحل بس بقولك إيه أنا عايز منك خدمة
.................................................................................................
أمام فيلا *..عـــلـــي الحمـــاد..*
نظرت يمنى لأخيها في سيارته قائلة:
ــ: مش هتدخل معايا كنت عايزه أعرفك على أخوها ؟
شادي بلهجه حازمه:
ــ: لأ أنزلي إنتي وأنا همشي وهاجي أخدك لما تخلصي
يمنى يعدم ارتياح:
ــ: طيب براحتك يلا سلام
شادي:
ــ: سلام
نزلت من السياره ودخلت من باب الفيلا الرئيسي بصحبة الحارس الذي أوصلها إلى الداخل
وعند باب الفيلا الدخلي استقبلتها ساره وهي تقول:
ــ: أهلا أهلا كنت طالعه أجيبك من بره
يمنى وهي تناولها طبق الحلويات قائلة:
ــ: طب يا ستي خدي ده من أرقى محل حلويات فيكي يا أم الدنيا
ساره بإبتسامه:
ــ: تسلمي يا حبيبتي تعالي نطلع فوق
يمنى:
ــ: ريهام وليلي فين؟
ساره:
ــ: ريهام نايمه وليلي فوق مستنيانا
وأكملت بخبث:
ــ: ومش عايزه تسألي عن حد تاني.؟
يمنى وهي تصطك على أسنانها غيظا قائلة:
ــ: بت إنتي مترميش كلام مالوش لازمه
ساره بضحك:
ــ: هو أنا قلت حاجه على العموم هو لسه مجاش لو يعرف إنك هنا كان زمانه هو اللي دخلك مش الحارس..قوليلي هو إنتي جيتي بعربيتك.؟
يمنى:
ــ: لأ..شادي هو اللي وصلني
ساره:
ــ: بجد.؟ طب ومدخلش معاكي ليه على الأقل يتعرف على باسم
يمنى :
ــ: والله قلتله بس هو باين عليه جاله تيلفون ضايقه
ساره:
ــ: خير في حاجه.؟
يمنى بحنق:
ــ: معرفش مش بيرضى يقولي حاجه هو كتوم أوي عارفه الرجل الغامض بسلامته أهو شادي كده
ساره بضحك:
ــ: في رجاله كده بس إنتي أخته يعني المفروض ميخبيش عليكي
يمنى بسخريه:
ــ: ده أنا أكتر وحده في الدنيا دي بيخبي عني حاجات وممكن أعرف عنه معلومات من ناس بره ببقى هتشل منه
