Ang Buhay ay isang Tula

Bituin

O, kabigha-bighaning bituin sa langit,

Na sa kalawakan ay kay kirit,

Puwede ba sa'yo, ako'y pumalit

Upang sa akin sila ri'y maakit?

Ibig kong maging katulad mo,

Tinitingala at hinahangaan ng tao

Kumikislap at nagniningning sa buong mundo,

Tumatanglaw sa nasasakupan mo.

Kung ako'y maging bituin, ulap ay hahawiin,

Angkin kong liwanag sa tao, ibabahagi rin

Upang magsilbing ilaw sa mundong madilim

At ang pag-asa nila ay muling kamtin.

Tunay na ito ang gusto ko--

Ang magningning sa puso ng tao,

Sa pamamagitan ng mga tula ko,

Na tatak sa kanilang mga puso.

Umaasa akong ito'y magkatotoo,

Hindi lamang maging pangarap ito

Na magsisilbing bituin na kikislap ako,

Magbibigay liwanag at niningning sa kapwa ko.

Maaaring ito lang ay ilusyon

Sa tulad ko, na nagdilim ang kahapon,

Ngunit sisikaping magsilbing inspirasyon

Sa mundong pinapasok ko ngayon.

Kaya, sana sa aking mambabasa...

Liwanag sa puso, sana'y inyong madama.

Sa lahat ng aking akdang ginagawa,

Aral sa buhay ang nais kong iwanang alaala.