Unicode
အမေက မျက်ရည်လည်ရွဲနဲ့ ကလေးတစ်ယောက်လိုမျိုး ငိုနေခဲ့ပြီး ကူကယ်ရာမဲ့နေတဲ့ အမေ့ပုံစံလေးက သနားစရာ ။ ကျွန်တော် အမေ့ဆီ ခြေကုန်သုတ်ပြီးပြေးနေပေမဲ့ လိုရာခရီးဆီကိုမရောက်ခဲ့ ။ အမေ့ကိုဖက်ထားပေးချင်သလို မျက်ရည်တွေကိုလဲ သုတ်ပေးချင်တာပါ ။
ကျရာမရတဲ့အဆုံး " အမေ "ဆိုပြီး အကျယ်ကြီးအော်ခေါ်လိုက်မိတယ် ။ အမေ့မှာ ကျွန်တော်တစ်ယောက်လုံးရှိသေးကြောင်း သိသွားစေချင်တာ ။
ဒါပေမဲ့ ကျွန်တော့်ခေါ်သံကို ကြားဟန်မရဘဲ အမေကငိုမြဲငိုဆဲ ။" အမေ...အမေ့..."
ကျွန်တော် အမေ့ကိုထပ်ခေါ်လိုက်ပေမဲ့ အခြေအနေကထူးခြားမလာပါ ။ ကျွန်တော် အမေ့ဆီကိုသွားချင်တယ် ။ အမေ့ဆီကို သွားမှဖြစ်မယ် ။
ဖိနှိပ်ထားတဲ့အရာတွေဆီက လွတ်မြောက်အောင်ရုန်းကန်ပြီးရင် အမေ့ဆီကိုရောက်အောင်သွားတော့မယ် ။" မြေးလေး...မြေးလေး...ဘွားဘွားရှိတယ်နော် ၊ ဆေးထိုးပြီးပြီဆိုတော့ ခဏနေရင် အဖျားကျသွားလိမ့်မယ် "
ရင်းနှီးနေတဲ့ ဘွားဘွားအသံက ကျွန်တော့်ကိုလှုပ်နှိုးနေသလိုပါပဲ ။ ကျွန်တော် မနိုးထချင်ဘူး ။ မျက်လုံးတွေကိုဖွင့်လိုက်ရင် အမေ့ကိုတွေ့ရတော့မှာ မဟုတ်ဘူးလေ ။
နဖူးပေါ်ကိုရောက်ရှိလာတဲ့ လက်လေးတစ်ဖက် ။ အဲဒီလက်လေးက နဖူးပေါ်ကနေ ပါးပြင်ဆီရောက်ရှိလာပြီး လည်ပင်းအောက်မှာအဆုံးသတ်သွားတယ် ။
" မြေးလေး...သတိရှိတယ်မို့လား ၊ ခဏနေရင်အဖျားကျသွားလိမ့်မယ်နော် ဘွားမြေးလေး ၊ ကလေးလေးကလိမ္မာပါတယ် ၊ ဘွားဘွားကိုမျက်လုံးလေးဖွင့်ကြည့်နော် "
အမေ့ကိုဆက်ပြီးမြင်ချင်စိတ်နဲ့ ဘွားဘွားကိုသနားတဲ့စိတ်က စွန်လေးနဲ့ စွန်ကြိုးလိုမျိုး အပြိုင်အဆိုင်ဆွဲရစ်နေတယ် ။
" အဲဒီလိုမလုပ်ပါနဲ့ မြေးလေးရယ် ၊ ဘွားဘွားမှာက မြေးလေးပဲရှိတော့တာပါကွယ် "
ရှိုက်သံရောစွက်နေတဲ့ ဘွားဘွားရဲ့စကားပြောသံက ကျွန်တော့်ကိုအနိုင်ယူသွားခဲ့တယ် ။ မျက်လုံးဖွင့်ပြီး ကျွန်တော့်ဘေးမှာထိုင်နေတဲ့ ဘွားဘွားကိုကြည့်လိုက်မိတော့ ဘွားဘွားကမျက်ရည်တွေသုတ်ရင်း ယဲ့ယဲ့လေးပြုံးပြလာပါကော ။
YOU ARE READING
ထင်း (Ongoing)
Romanceပျော်စရာကောင်းတဲ့ အဖြစ်အပျက်တွေ မပါဝင်ပါ ေပ်ာ္စရာေကာင္းတဲ့ အျဖစ္အပ်က္ေတြ မပါဝငပါ 8/7/2023