حنين

بارت ٥٤

وصلات العشية مجموعين هازة تيليفون ماماها كتفرج كالسة حداها نيت مجموعين ورا الغدا كيتجمعوا و حنان كتهضر معا حب قلبها على البارح كيسيفطو لبعضياتهم التصاور فرحانة للي تجمعات بيه على خير و كيعبرو على فرحتهم بطريقتهم ..

هو للي كالس حداهم كيهضرو بيناتهم سامع الكلام ..
نقزات نادية : عيسى امتا غتمشي ؟

- هز راسو فيها : من هنا شويا .. نرتاح غدا فالدار .. شديتو لرغد ثلت ايام بغيتها تبقا معايا هاد الليلة و غدا حتا نجيبها ليكم ..

- هز باه راسو : حتا انا خاصني نمشي .. ثريا و محسن سبقو .. شوف كي دار عطاوه النهار ..

هز فيه راشد راسو : كيزيرو معاهم بزاف ..

- اوا للي خدام فالبنكات شنو كتساين منو .. عاد دايرين معاه مزيان ..

سكت عيسى كيشمع .. ماشي على برجو ..
تحط كاسكروط مجموعين جمعوا حوايجهم حتا وقفوا كيتوادعوا فالباب .. و "الله اوصلكم على خير" كان باش ختموا الكلام ..

- منعم من طوموبيلتو : غدوز نيشان ؟

- داير كاسكيطة قالبها مع هودي و سروال دجين مع سبرديلة : اه نجيبها و نشدو الطريق غا سير .. طريق السلامة ..

حرك ليه اديه واقفين هو و راشد كيشيرو ليهم ميسرين لقنيطرة .. هبط يدو شاف فيه كيضحك ..
- ايوا اسي لعريس !

- كتساين نقوليك لا نتا لعريس و داكشي .. بلا متحلم بيها ...

ضحك راشد حتا تسدو عينيه : اتمشي تجيبها دابا ؟

حرك راسو : عارف اش كتقول الواليدة .. مكتحملش سفر د الليل ...

- اوا اش درتي مع حنين !..

تلف عينيه و توتر جاه منين سمع سميتها .. خوه هانية موالفين كيهضرو مع بعضياتهم .. عمرهم متحسسوا و لا خباو : ولات ديابيتيك .. (شاف فيه بقهرة) اخويا البنت معايا ولات مطلية بالمرض .. اش غندير

شاف فيه راشد طبطب على كتفوا : اكون خير .. بالحق لا علاقة بيك اعيسى درتي للي عليك .. للي داز عليها مساهلش ..

ستذكر منظرها البارح جاتو السخفة .. دار النضاضر على عينيه المفضوحين و جبد شويا التريكو من عنقو انقص الاختناق للي زير تنفسوا .. حول راسو ليه الموضوع باقي جديد عليهم .. باقيا فيه الشمتة و حالتها فالكلينيك مرسخين ..
- غتمشي نتا ؟

- حرك راسو ليه : حتا لغدا .. غا بالشويا

- بصحتك اصاحبي تهلا فالخالة نجية و الدراري حتا نتلاقاو ..

- ضروري تهلا فراسك ..

طلع فطوموبيلتو .. طلق السينيال خارج من دورة و داخل من الطريق الثانية لدارهم .. وقف قدام الباب لقا الباب ديال برا مفتوح و كمل داخل للباب الثاني .. دقة و جوج حتا خرج ولد خالهم .. شافو عرفوا مسلم عليه مخليه ادخل .. حنحن طالق السلام حتا خرجات منى عندو
- عيسى ولدي ..