حنين

بارت ٣٠

تم داخل الهضرة بعيدة نوعا ما غا قرب اوصل لصالون الرجال حتا تعرض ليه سي مصطفى مع سي عبد الكريم كيعرفهم على بعضياتهم 
" هادا عيسى الوزاني ولد نادية .. اخت نجية "

بتاسم ليه ببشاشة مسلم عليه و بإحترام بادلوا السلام

سي مصطفى : نهار كبير هذا للي عرفتكم شخصيا للأسف عمرنا تلاقينا فالحادثة للي تعرضات ليه حنان .. شفتك نهار عمليتها فقط .. ههههه المكاتيب .. لا مالين الدار لا سي عبد السلام و عائلتو كيدوي عليكم الحمد لله غا بالخير .. الله احفظكم

عيسى بإبتسامة .. الراجل للي قداموا دخلوا مع العظام رتاح ليه : الشرف ليا ا سيدي ..

ضربو فكتفو : سيدي و سيدك نبي رسول الله .. عيطلي عمي مصطفى (ضحك ممازح) و لا مصطفى باراكا نوليو صحاب

عيسى بإحترام جاه الراجل مهيب : مرحبا نكونو صحاب بالحق حاشا نجي من مقامكم .. شكرا أعمي

- دخللوا مع العظام : هكاك ارضي عليك ..

منى جايا من بعيد غا ورقاتو را هو .. شيرات عليه غادا عندو زربانة تا شنقاتو معنقااه : مرحبااا بييك

غفلاتو السيدة عنقو مشا و جا حرك ايدو طبطب على دراعها حشم من سي مصطفى حاضي الديكور كيضحك : شكرا اخالتي على الدعوة .. مبروك عليكم

- بعدات عليه : الله ابارك فيك .. بالفرحات عليا اولدي نهار كبير عندي .. قريب نوليو عائلة تبارك الله (كحزات لوذنوا كدوي بشويا) راشد زعما

بعد وجهو كيحرك راسو على اساس فهم اش كتقول .. المشكلة معارفش راسو اصلا اش هاد العائلة .. كلها مخلطة و كل واحد فيهم بكراكتيروا و بشخصيتو و لكن مينكرش بللي ناس الخير و العشرة ..

دخل واحد من الدراري لعندهم عالمهم بللي شي عائلة واقفة حدا الباب كيسولوا على مول الدار .. حنحن سي مصطفى مستأذن منهم غادي اتلقا ليهم مع منى .. اما عيسى تنهد هاز النفس و مشا معاه عبد الكريم للصالون فين لقا راشد داير ليهم الحلقة كلشي كيضحك ..
.
.
.
دخلوا الضياف .. العيالات لصالون العيالات و الرجال مع الرجال .. المجموع مفايتش حدود فالعشرين .. القضية خفيفة و منظمة و متولة حتا نادية للي فيها كثرت التمياق و الفيش متنكرش انها تفتنات بيها و بدارها و تاويلها عاد كترجع و كتوقف على هضرة ختها للي دور دور و تشكر .. 
تسلتات منهم منى بعدما خلات نجية و عائلتها مكلفين بالصواب غادا لبيت بنتها تعلمها ..

فتحات الباب و طلات من الفتحة لا تكون مواجداش .. هزات فيها حنين عينيها ..
منى بهيام و بحب هاهية بنتها كبرات ولات عروسة و وصل يوم خطوبتها  : الصلاة على النبي (جاتها البكية شدات راسها عاطياها المهم) بنتي راهم جاو

- ببلاهة : شكون ؟

منى غا سمعات اش قالت بدات كتضحك حتا الدموع للي كانت بغات تخرجهم بكا خرجاتهم ضحك : اولي على شكون ؟ (دخلات كاملة كتشوف فالمرايا كتمسح عينيها و شويا من الكحول للي ساح حتا ضارت عندها) مالك لابسة قفطان ! و لا نرجع نقوليهم مقابلينش !