حنين

بارت ٦٠

فتح الباب داخل لقى الصقيل فالبيت .. مشا نصل الجلابة و لبس عليه .. قضى غراضو و توضى من جديد صلى العشا و الشفع و الوتر ..
رجع طل على ولدو شافو ناعس حط يدو على صدرو و هزها باسها بكل عفوية عاجبو ..
دور وجهو لحنين و رغد .. اكذب لمكالش للدابا شاد شويا فخاطرو من جيهتها و لكن على ولادو معندو لاش اكبر الدراما و ادير فيها جرحتيني يا كَلبي .. خدم عقلوا هاد المرة وليداتو خاص اتجمعوا حداه و السماحة طلباتها بلاش من التبوزيق الخاوي و كرامتي سر سعادتي .. الندم شافو و حتا هي مدازش عليها قليل ..
فرحة ديال الحياة البسيطة للي كانو راسمينها و عاشو فيها بداو علاماتو كيبانو من جديد ...
صحيح و هو كيشوف فيهم ميرجعلوا فعقلوا غا اللقطة فاش قالت "موحال" على شغلها و جهدها .. مخداش الأمور بحساسية عكسها .. فالأول و الأخير قرار قرارها و هو قاد بيهم كمعيل و كأب .. و لو اجيو دراري اخرين .. و لله الحمد قاد و مزال .. الواحد مكيبني عائلة حتا كيوجد الساس ..
ماديا و معنويا ..

دار لجيهتو .. جاه الصهد من الجو حيد البودي و دخل للفراش عريان من الفوق .. دار على جنبو حاضيهم .. رغد داخلة فماماها و لو وسع البلاصة الا انها لقات راحتها عندها .. جاتو الضحكة .. بريئة بالجهد و طبيعتها الهادية و الحنينة معمرالو خاطرو بالجهد .. داز شاف فيها هي للي مكانش عندها اعتراض معنقاها عندها بيديها المحنيين و خاتموا وسط يديها .. غا البارح كانت بعيدة و هاهية اليوم حداه .. اش هاد الدنيا .. اكذب لمقالش بللي فرحان .. معلش كلشي غيتصلح مع الوقت ..
سمع والدو بدا ابكي و هو انوض يسكتو قبل متنوض هي .. ترتاح شويا كتقيل مقابلاهم .. اعدي هو حدما فايق ..
خداه و مشا لكوافوز حداه كاينين البيبرونات فالما دافيو كتخليهم سوكور فلليل .. هز قريعة و مسحها بفواطة حداها و على صوتو فاقت حتا هي ..
- بغات تحيد الغطا : فاق ؟ رجع تنعس انا نرضعو نيشان

- خليك خليك .. دابا للي دخلت الفراش .. كاع منعست غا رجعي تنعسي ..

- خرجات من الفراش واقفة : واخا خللي نوقف معاك

ضحك ليها : للي بغيتي ..

وقفات حداه هو للي كان هازو عندو خلط البيبرونة موقفوا شويا و عطاه ارضع .. كلس فالفراش و كلسات حداه حاضيينو بجوج حتا حطات راسها على كتفو باقيين عينيهم عليه ...
طال السكات و هرسو فالوسط ..
- علاش قلتي قبيلة مبغيتيش ترجعي تخدمي ؟

- الى معندكش مشكل كنت بغيت نفتح هاد الموضوع من بعد .. الوليدات علاياش كنحماق و السبب الاول و الأخير هاهوما عندي .. الخدمة صعيبة و انا باغا نعطي الوقت لوليداتي .. الهوى هو الأخير ميدخلش بيناتنا .. رغد كتكبر تبارك الله خاصني نعيش معاها طفولتها و نوجدها للمراهقة و للكبر .. هي بنيتة فحال شي الماسة زوينة و الزنقة صعيبة .. هي حنينة بزاف .. و ها صخر خاصو العناية باقي بيبي .. مولدتهمش اعيسى نخليهم للمربية و لا نعطيهم لشي كخيش .. و حتا نتا اعيسى خاصني ندير جهدي معاك و واجبي و كثر .. راك راجلي ..