حنين

بارت ٣

فجهة اخرى و بالضبط فمدينة القنيطرة فوحدة من لي الفيلات للي جيهت اسواق السلام .. و هوما دايرين على طبلة العشا ..

الأم : عرضاتنا خالتك نجية ماماين لمياء و محمد السبت الجاي ..

هو : خبار الخير ألواليدة !

(الأم) نادية و هي كتاكل : قالك دايرين حفلة نجحات فالباك ..

هو بتاسم وسط ماكلتو : مبروك عليها .. غتمشيو ؟

(الأخت) ثريا و هي معوجة فمها : اواااا صااافي للي دار شي حاجة انوض اعرض الناس أحقا و الواد حفلة !
غا سمعها اش قالت حبس الماكلة و هز راسو و شاف فيها بعنين كوحل حرشين مهيبين : كون درتي مجهودك و خديتيه ديك ساعة نجاوبك (خنزر فيها) كولي و سكتي ..

نادية للي جات من جيهت ثريا للي حنات راسها محرجة : عندها الحق كون غا تزوجات بعدا، حتا لا دارو شي حاجة نقولوا تستاهل، آخرت البنت #دارها و #راجلها

عيسى حرك راسو بلا حول و كمل الماكلة عارف واخا اهضر حتا يعيا مغتكون حتا نتيجة .. سكت مكمل ماكلتو ..
نادية : المهم غنمشيو نشوفو اش واقع ! السبت و الحد غتكون مسالي ؟

عيسى حرك راسو بإيجاب
- اوا نتحركو فالعشية ديال الجمعة و را العصر نيت نمشيو مبردين، نباتو معاهم و نيت نعاون نجية لا تخصها شي حاجة ..

عيسى مأيد الفكرة : للي بغيتو انا ما عليا غا نوصلكم ..
ثريا للي تقمعات سرط القط لسانها بقات غا كتاكل فالسكات اصلا الري ري مها و الشوار شوار مها .. قرات علاياش قدرات و لكن بلا مبالات من ديما هضرا وحدة فودنيها من جيهت مها "قريتي و لا مقريتيش البنت لدارها و راجلها" فعمرها 24 سنة هي الثالثة بعد 2 خوت، الكبير مزوج و مستقر ففرانسا و عيسى .. كانت طالقة اللعب فالقراية و كتمشي غا باش متحسش بالملل، كانت المتنمرة فقسمها غا باش دوز وقتها و اكون عندها الخاطر تمشي للغد ليه .. دازو اعوام و وصلات الباك غا بالدفيع عييات من تنمرها على البنات و ملاات الجو .. وصل الوطني مشات معرفات متكتب خربقات و رجعات فحالها .. غا وصلات النتيجة و كيفما كانوا متوقعين لقاو بللي سقطات .. بقا فيها الحال ؟ أبدا، جاتها عادي فالأخير بلاصتها #دار_راجلها

سالاو العشا، ناض فحالو متاجه لبيتو الذكوري للي غالب عليه الكري .. تلاح على الناموسية بكوفر كحل بقا كيشوف فالسفق حتا وصلوا ميساج ضار لقاها هي .. وحدة من بزاف، غا مدوز بيها الوقت فحال للي فاتو، و حتا هي نيشات عليه من نهار شافتو جا معاها و عرفاتو ولد منعم الوزاني معروف عندو بزاف د المشاريع و لكن معروف كثر ب فالمدينة بمول الmall الكبير للي جاي على الشارع الكبير فالسونطر .. هز تيلفون و قراه بعينين غير مباليين
Kaouthar "tu me manques trop chéri "
كوثر "حبيبة ديالي توحشتك بزاااف"

عيسى غا شاف الميساج بعينيه المجبدين .. خلاها منشورة تما، هز بيسي رجع اللور كيتفرج .. هو بصح بو بنات و لكن عمرو مكان خلاط حتااااا كطلعلوا وحدة فراس كيفرتك الجقلة و اضبر على اخرى .. دازت واحد نص ساعة هي تصوني عليه ميك شويا عاد جاوب
كوثر بالغوات : علاش مكتجاوبنيش فلي ميساج
عيسى مهااااااااادن موالف السيناريو : مالنا دابا على حريق الراس شنو المشكل