دازو ايام قلال على نفس الحال .. عيسى ولا كيقدر اوقف و اتمشي .. حالو و لا مزيان و قدرة شفائه كان احسن من المتوقع .. الحديدة باش شدو العظام المهرسين قاضيين غراض و هاد الساعة غا السمطة كافياه و موفياه
اليوم كان آخر كونطرول عندهم .. مدا بيه غا امتى اخرج .. كيجمع فصاكو الصغير كالس على السرير جامع رجل و طالق لوخرى .. عينيه صفاو و رجعوا لطبيعتهم حتا من الدم مبقاش كيكحو .. دار هز راسو شافيها كالسة قدامو منفخة .. منين صاقت الخبار و هي عندو و لكن معفرة عليه ..
عيسى طانز : هادي هي ديال يخ منو عيني فيه ..قالبة وجهها عليه : حتا دازت يوماين عاد صقت الخبار . هادشي غا انا للي عيطت كنسول فيكم
- سموحات .. شحال بقالك تسالي ؟
- بعد غذا غنديرو essai على لي مانكين .. و المشكلة مزال ملقيت حتا وحدة
- حابس الضحكة : جربي فالواليدة ..
هي كتشوف فيه و هو كيشوف فيها حتا طرطقو بدقة بالضحك حتا دمعوا عينيهم : اياياااي .. الله اعطيك شي عقل ..
- حرك راسو كيضحك على حالو : راني مزال عند وعدي .. خودي ديبلومك و المحل عليا (جات تدوي حبسها) مقتليكش كولوا ديالك .. حسبيني شريك .. منخليكش مبرعة بوحدك
- شافت فيه بنص عين ملوية فمها : شنو كنت غنتوقع كثر ..
خرجوا من البيت كيدويو و سبارادرا شفافة على الجبهة جامعاليه اللحم مبينة الدقة للي كلاها .. معارفو للي تلاقاهم فطريقو كانوا بعاد و لا قراب كيباركوليه خروجو .. وقف فالسانسور هز النفس كيتفكر داك النهار .. شافت فيه ثريا و بركات بيديها .. حتا خلط عليهم راشد داخل فيه من اللور ..
"صاااااا حباااااااي .. ختي ثريا لاباس"- دار عندو مشير عليه بالصاك : مال حسك مالك ؟
- كيفرنس معنقو بالجنب : فين غادي ؟؟
- تفتح الباب داخلين و برك على الطاج : طالع عند بنتي نديها سوقك ؟
- طلق منو : وايلي !! شكون غيقابلها ؟
- طالع لقنيطرة نرتاح شويا تما ندوز كونجي د مالادي .. غيجي الواليد ادينا ..
حرك راسو متفهم معندو ميزيد باراكا غا صدمتهم نهار عرفوا اش طاري .. تفتح الباب خرجو و الوجهة بيروها ...
كالسة دايرة نظاظرها كتسني على الوراق ديال الخروج و لا الدخول مرة مرة كتلوح عينيها لرغد فالبلاصة للي قداتهاليها لابسة بيجامتها مرتاحة .. الجو حداها كأنها فدارها ..
تدق الباب هزات راسها و دخلات ثريا متقدماهم غادا لجيهتها فاتحة دراعها : حنينة ..ناضت عندها تلقات ليها بتعنيقة .. هزات راسها حتا شافتهم داخلين تمات خارجة من جيهت بيروها لعندهم جاراها معاها : اهلا (سلمات على راشد و دازت لعيسى) على سلامتك ..
YOU ARE READING
حنين
Romance" مـــن أنــــت؟ يا من تنشر سحرها كالغبار بين الأعين والجفون وتنثر من شعرها المجنون مــــن أنــــت؟ يا من تبحثين عني وعن جراحي وجنوني أقتربي أكثر.. واجعلي من شعركِ جسراً تسير فوقه روحي إليك •• هي قصة بالدارجة المغربية و ان شاء الله تكون خفيفة عل...