هابطو فالدروج و عينيها فرحانين بشوفتو لابس كوستيم فالأسود واقف كيهضر معا واحد من صحابو محس غا بالناس كيشوفو للفوق مع اغنية خفيفة مطلوقة .. هز راسو شافها نازلة بكسوتها البيضاء البراقة للي زعجاتو شويا قصتها .. عريانة .. و لكن فضل اميك را كيبقا نهارها ..
تعرض ليها بيديه للي مطلوقين جيهتها تقبط فيها حتا تنزل .. و تحت تصفيقات الجميع و هتاف الدراري صحابو سلم عليها و رجع كيشوف كاميرات التيليفونات للي تجبدو كيفيلميو فيهم .. كتضحك من قلبها و يشوفو فبعضياتهم .. من منهار غلطات معاه و هي مقابلة تيست حتا خرج بوزيتيف واخا بجوج سيمانات و هاهية دات رضات واليديها و حيدات اللومة على حسب تفكيرها و زيد حتا حب حياتها للي غيكونو مستقبل بجوج ..
عيسى شاف فيها مبتاسم كيرد ليها شعرها على درعانها : جيتي زوينة
كوثر بعينين متوهجين بالفرحة : نتا دايما زوين
.. فواحد القنت واقفة حنان بحدها كدور عينيها فوسط الدار .. ختها تخلطات مع معارف من الكلينيك و نجية مع العيالات للي جماعتهم بيناتهم .. بقات واقفة بوحدها حتا وقف حداها الزعر للي من صباح حاط عليها العين .. جذباتو بقفطانها بيج مرصع و خفيف مبين زعوريتها و قوامها الملفت و اناقتها بمكياج خفيف لحد ما ممزوج مع بشرتها عطاها نعومة خطيرة ..
راشد كحاز حداها كيهضر معاها شاد كاس د اتاي فيديه و كيشوف فخوه للي مفتاخر بيه اخيرا ولا عريس : مالك واقفة هنا بحدك فحال المتخلى عنهم !
هزات حنان راسها تشوف شكون كيهضر معاها .. غافشعاتو حمارو خدودها و رجعات كتشوف قدامها : مكنعرف حد هنا .. كل واحد مدهي بشغالاتو
راشد : و انا اش كندير
حنان ببتسامة خفيفة : ههه معرفتش !
راشد سكت شويا معرف ميقول : العقبة ليك ! (شافت فيه حنان شير ليها لجيهة العرسان بصبعو) نحضر ليك ان شاء الله
حنان ممازحة : ضروري تحضر ليا .. ان شاء الله كالس حدايا فالبرزة (غمزاتو)
دار عندها هاز حاجب : و تقبلي عليا ؟ (هزهزات راسها بالإيجاب) زعما ؟
حنان مقادات تشوف فيه حسات فنبرت صوتو نوع من المعقول مخبية ورا كاسها كترشف من العصير : الحلال زين .. شوف نتا واش تقبل عليا !
غا سمع اش قالت دار عندها كامل بلاضحك بلا والو : كنهضر بصح واش تقبلي تزوجي بيا ؟ (كمل طانز هاز كتافو) منلقاش فحالك .. خت تيتيزة د الكلينيك .. نتناسب بعدا مع الزين
حنان متوقعاتش منو هاد الطلب : ههههه اول مرة نسمع شي حد بغا شي وحدة على قبل ختها ..(حانية عينيها لكاس و هو حاضيها) حم انا مكنعرف عليك والو بالحق مرحبا باللي دخل من الباب .. الزمان اخلينا نتعارفو .. (بخجل) عطيني تيليفونك (خداتو كدير مبغات خلاها على خاطرها و رداتو ليه) هادي نمرت تيليفون بابا و هادي نمرتي .. فاش تنوي دق الباب علمنا (بإبتسامة)
YOU ARE READING
حنين
Romance" مـــن أنــــت؟ يا من تنشر سحرها كالغبار بين الأعين والجفون وتنثر من شعرها المجنون مــــن أنــــت؟ يا من تبحثين عني وعن جراحي وجنوني أقتربي أكثر.. واجعلي من شعركِ جسراً تسير فوقه روحي إليك •• هي قصة بالدارجة المغربية و ان شاء الله تكون خفيفة عل...
