حنين

بارت ١٢

مع الخمسة و نص جا عندهم عيسى لقاهم واجدات .. ماماه بقفطان و فولارها اما ثريا لبسات غا عباية بشالها و طالون متوسط هازين فيديهم بلاطويات د الحنة و التمر للي وجدو .. حطو كلشي فالكوفر و غاديين فإتجاه دار العروسة .. هبطو وصلهم و ودعهم فالباب مبغاش ادخل تفاديا لشي احراج مع المجمع

غا دخلو مع الباب لقاو بيفي صغير فيه التمر معمر بالشكال و الحليب و العصير و بنت كتسربيهم عاد عاد كتزيد للقدام كاين صالون عامر بنسا د العائلة و صحابهم و قدامهم كلسة د العروسة جاية بحدها قدامها كاع داكشي للي غيحتاجو لهاد الطقوس .. غا قربو للوسط هي تجي أم كوثر كتزرب لعكوزة و لوست بيتها مستقبلا بتكشيطة منبتة بالحجر و الشعر مبوكلي و مكياج مصروع تحلفي عليها هي العروسة .. خلطات عليهم و سلمات

فاطمة بترحيب : مغحبا و الف مغحبا زارغتنا البغكة

نادية : الله ياودي الالة فاطمة ماحنا غراب دابا وليتو منا و حنا ولينا منكم .. اولا ؟

فاطمة بضحكة بلهاء : هيهيهي بصح بصح بالحق الواجب نديغوه

نادية : ربي اخليك اختي

فاطمة : يالله نكلسو لهيه منبقاوشي واقفين ..

تقدماتهم للصالة فين كاينين العيالات شي كيهضر مع شي، الدنيا كاااالم مكاينة طيابة للي تغوت من وسط الدار مكاين روينة البنات تحلفي غا رشقات ليها و دازت عندها .. كلسو و كلسات معاهم تعطيهم صوابهم على ميعيط ليها شي حد ديك الساعة تستأذن
فاطمة : ياك لاباس عليكم ؟ و نتي ابنتي يا ثغيا اش خباغك ؟

نادية : حمدلله اسول فيك الخير (دارت عندك ثريا دايرة اديها على كتفها) الى مكانتش دابا بيخير هي امتا غتكون هيهيهيهيههيه

فاطمة متبعا معاهم : اييه علاه خباغ الخيغ

نادية : غا اليوما تاحنا للي عرفنا  .. مبينا معلينا حتا سخفات، عيطت لمالين الدار حتا جا باها و راجلها بالزربة و عيطو على واحد الطبيبة تشوفها .. (بإفتخار) اوا يا لالة هي تبْشرنا بللي حاملة .. بالحق غير ايسالي هاد الشي ديال الدراري و تمشي خاصها ضروري دير لي زاناليز

فاطمة : اواااا مبغوووك عليك احبيبة بالصوغة الحسنة و اتغبى فعزكم يا مولانا

ثريا بثبات : آمين اخالتي شكرا

كملوا العيالات هضرتهم و هي غا كتشوف هاد الجو طلع ليها فراسها لاسقة فمها و هضرة الكبار المملة و خاطرها مرون من أول د النهار و هي تجبد تيليفونها و بدات كتكتب ليه ميساج ..
- Vous : ach kadir ??
... (ساينات على بضع دقائق حتا وصلها الجواب)
- Mon mari : galsin kant9hwaw ana w khuk w rachid .. Rak cheftina

- Vous : oui cheftkoum

- Mon mari : bghiti chi haja ?

- Vous : la mabghit walou .. Walakin bghit nswlek