سمر :انت رايح فين
خليفة :نعم
سمر :بيتكم مش من هنا والمفروض كنت تدخل من الشارع ده علشان توصله
خليفة :لا انا هوصلك وهمشى من شارعكم
سمر :بس كده انتى هتمشى كتير اوى والدنيا بتمطر حد يوصل حد فى المطرة دى
خليفة :اه انا ما اكيد مش هسيبك تروحى لوحدك دلوقتى
سمر :الجدعنة والشهامة دى لا تتناسب مع الجو العاصف الممطر اللى احنا فيه ده
انا كلها خمس دقايق وابقى فى بيتنا
خليفة :وانا قولت هوصلك هتمشى وتخلصينا ولا هتفضلى واقفة كده كتير قدام الشارع اللى انا مش همشى منه وموقفانا فى الجو انتى قولتى ايه اه الجو العاصف الممطر اللى لا يتناسب مع وقوفنا ده
سمر وهى بتتحرك :بشوقك بقى انا عملت اللى عليا
خليفة :بشوقى
سمر :قصدى يعنى زى ما تحب انا عملت اللى عليا وخلصت ذمتى
خليفة وهو بيمسك دراعها :حاسبى طيب
سمر بخضة :انت...انت عملت ايه
خليفة :انتى كنتى هتقعى
سمر :تقوم تمسك دراعى
خليفة باستغراب :اومال اسيبك تقعى
سمر :يا سيدى سيبنى اقع انا بحب الوقوع هيجرالى ايه يعنى لما اقع
خليفة :انا بس كنت بحاول اساعدك
سمر :انا مطلبتش منك المساعدة دى
خليفة :انا عملت كده بشكل تلقائى مكنش قصدى حاجة وحشة علشان اللى بتقوليه ده كله
سمر بحرج :انا اسفة على اسلوبى انا بس اتخضيت انت مكنش المفروض تعمل كده
خليفة :واسيبك تقعى
سمر :كنت هسند على عمود نور
خليفة :ما شاء الله عليكى وعلى حلولك العبقرية
هتمسكى عمود نور والدنيا ممطرة بحيث يدخلك كهربا تنور بلد بحالها فتموتى فى لحظتها
سمر :عندك حق عمود النور مش فكرة حلوة
خليفة :عمود النور فكرة قاتلة
سمر :خلاص عرفت انها فكرة غبية
مكنتش همسك حاجة كنت هقع عادى يعنى ما كل الناس بتقع وما يقع الا الشاطر انا قولتلك محدش بيوصل حد فى جو زى ده
خليفة :بدل ما تشكرينى علشان بوصلك
سمر :وكان هيجرالى ايه يعنى لو موصلتنيش لا فى حرامية ولا حتى تجار اعضاء هيخرجو فى الجو ده
خليفة :شايفة انى مكنش ليه لزوم اوصلك
ومحسسانى انى عملت حاجة غلط علشان منعتك تقعى
انتى ملكيش كتالوج على فكرة
سمر :ادينى وصلت وعموما شكرا على مساعدتك
خليفة :اه مساعدتى اللى مطلبتيهاش
سمر :سواء طلبتها او مطلبتهاش شكرا لتعبك
خليفة :العفو
سمر :انت رايح فين
خليفة :هروح
سمر :مش هتسلم على اهلى
خليفة :الجو العاصف الممطر ده ميتناسبش مع زيارات عائلية خالص
خليها مرة تانية
سمر :توصل بالسلامة ربنا يسلم طريقك...وشكرا مرة تانية
خليفة :بتشكرينى على مساعدة مطلبتيهاش
سمر :الله بقى مكنتش كلمة قولتها شكرا وخلاص
خليفة :العفو وخلاص
اتفضلى ادخلى
سمر :ماشى مع السلامة
خليفة :مع السلامة
تانى يوم
جليلة :سمية واللى عندها عاملين ايه
على :كويسين الحمد لله مسكو فيا جامد اتعشى معاهم بس انا مرضيتش انتى عارفة مبحبش اكل بره بيتى
جليلة :عارفة يا اخويا ثوانى والعشاء هيكون قدامك
سمر :هو انت روحتلهم ليه اصلا يا بابا
على :خليفة جبس رجله فقولت اروح اطمن عليه
عمتك سمية اخواتها ساكنين بعيد انتى عارفة ومش هيعرفو يجولها فى الجو ده
فقولت اروحلها انا علشان متحسش انها ملهاش اخوات هنا
انا واخواتها واحد
سمر بابتسامة :ربنا يباركلنا فيك يا حبيبى...طيب هو خليفة جبس رجله ليه حصله ايه
على :قالولى وهو راجع من شغله امبارح وقع فى المطرة دى
سمر :الف سلامة عليه انا هروح احضر العشا مع ماما
شوفتى يا ماما خليفة وقع وهو راجع البيت امبارح بعد ما وصلنى
جليلة :يا بنتى الف سلامة عليه
سمر :حاسة انى السبب
جليلة:وانتى السبب ليه هو انتى اللى وقعتيه ده نصيب واهى الحمد لله جت سليمة تعالى سخنى العيش يلا
سمر :حاضر يا ماما
