جرس البيت بيرن
سمية بتفتح:يا اهلا يا اهلا استاذة امل ودكتور المستقبل رامى اشرقت الانوار في بيتى المتواضع
امل :اذيك يا عمتو وحشتيني
رامى:سوما وحشتيني جدا
سمية :انتو كمان وحشتوني رامي يابن اخويا مش ناوي تسمعني كلمة عمتى ولو مرة قبل ما اموت
رامى :اعملك ايه بس يا سوما شكلك ميديش علي عمتى والله دى امل اختي دى تنفع عمتى اكتر منك
سمية بضحك :ايوه كل بعقلي حلاوة ماشى يا دكتور رامى المهم ايه سر الزيارة السعيدة دى ادخلو في الموضوع خصوصا انت يا رامى ومن غير مقدمات
رامى :فقسانى دايما كده ماشي يا سوما
انا جبت مجموع طب بالظبط مش اعلي منها بكتير يدوب زيادة واحد من عشرة
سمية:طيب يا حبيبي دى حاجة حلوة ما شاء الله
رامى :بابا عايزنى ادخل طب ومصر علي كده
سمية :ما ده كان حلمك تكون دكتور والحمد لله بيتحقق اهوه
رامى :وقت ما بقي فعلا ممكن ادخل طب بقيت خايف دراسة الطب صعبة وطويلة اذا كان محمود ابن عمتى لبنى حول لصيدلة بعد اول سنة وهو اشطر منى ما بالك انا بقي
سمية :محمود حول من طب لانه اصلا طب مكنش حلمه بس عمتك استخسرت المجموع الكبير بتاعه وهو مكنش محدد هدف ليه بس بعد اول سنة حس انه مش عايز يدرس طب والمواد اللي بياخدوها صحابه في صيدلة كانت احسن بالنسباله فخد قرار التحويل ونفذه رغم اعتراض الكل واديه اهو ما شاء الله ناجح جدا في شغله وكان ناجح قبلها في كليته لانه كان بيدرس الحاجة اللي هو عايز يدرسها
انما انت طب حلمك هتخاف وتبعد عن حلمك ليه وبتقارن نفسك بمحمود ليه كل واحد فيكم ليه قدراته الخاصة بيه ومش شرط انت كمان تفشل في اللي هو فشل فيه ولا شرط تنجح في اللي هو نجح فيه انت رامي مش محمود اتعامل عالاساس ده ومتضيعش حلمك من ايدك
رامي :معاكى حق اخلع انا بقي
سمية :علي فين استني نتغدى سوا
رامى :لا انا هروح اجيب البالطو بقي مش مصدق نفسي واخيرا هجيب البالطو الابيض يا جدعان
سمية :اقتنعت بسرعة كده
رامى :يا سوما انا اصلا كنت مقتنع انا بس كنت خايف وانتى كالعادة طمنتيني علشان كده جيتلك
سمية :ماشي يا دكتور الحق جيب البالطو بقي
رامى :سلام
سمية :وانتى يا امل مالك ايه مشكلتك
امل :محمود اتقدملي
سمية :نعم
امل :عمتو متعمليش متفاجاة انتى اكيد عارفة من قبل ما يقول لعمتو لبنى ولجوزها عمى جمال انه عايز يتقدملي اصلا
سمية :انا عارفة ومش ده اللي مفاجانى انا مستغربة فين المشكلة في ان محمود يتقدملك
امل :محمود ابن عمتى وجواز القرايب ده بيبقي كله مشاكل كذا واحدة في اصحابي اتخطبو واتجوزو ناس قرايبهم والموضوع ياما مكملش وخسرو بعض ومرجعوش زي الاول يانا كمل بس مشاكلهم كتير وبرضه التعامل بينهم مبقاش زى الاول وعمتو صعبة وانتى عارفة بابا بيحبها ازاي الوضع هيبقي صعب لو حصل مشاكل يا عمتو
سمية :عارفة انا قبل متجوز عمك ابراهيم بسنة اتقدملي واحد جارنا انا كنت في الكلية وهو كان معاه ثانوية عامة بس كان محترم واخلاقه عالية وده اللي خلا جدك يقبل ويخليه يجى البيت اقعد معاه انا بقي عملت زيك كده ساعتها
امل :عملتى زيي ازاي
سمية :جبت الموضوع من اخره فكرت لما نتجوز وانا اعلي منه في حتة التعليم وانه اكيد هيحصل مشاكل وحطيت في دماغي كل اللي اتجوزو كده والحياة بينهم قد ايه كانت صعبة لان الزوج دايما بيبقي حاسس بالنقص وسمعت لكام واحدة من صحابي قالولي انه اقل منى وانى اعلي منه واستاهل حد احسن منه
امل :ورفضتيه
سمية :قعدت معاه بس وانا واخدة قرار ان الموضوع مش هيكمل قعدت علشان جدك كان اداله كلمة وجابه البيت بس
مسمعتش كان بيقول ايه مسالتش في اي حاجة مستخرتش ربنا حتي وقلت لجدك انى فكرت ومش موافقة
امل :وهو عمل ايه لما جدى بلغه ردك طلب يقعد معاكى تاني
سمية :لا طبعا كرامته وعزة نفسه مسمحتلوش يعمل حاجة زى كده هو اكيد فهم انى واخدة قرار من قبل مشوفه وفهم ايه سبب قرارى
بعد كده عرفت انه مكملش تعليمه لان والده اتوفي وهو مسك محلات والده مع عمه لانه اكبر اخواته وان اخواته واحدة بقت مهندسة وواحد محامى والصغير دكتور وان هو نفسه قدم في كلية تجارة في الجامعة المفتوحة وكبر محلات والده وبقا ليهم اسمهم في السوق
امل :ندمتى انك رفضتيه
سمية :لا مندمتش لانه مش نصيبي وعمك ابراهيم هو اللي نصيبي بس زعلت من نفسي وندمت لانى رفضته للاسباب الغلط ومديتلوش فرصة اعرفه واحدد اذا كنا مناسبين لبعض ولا لا سمعت كلام الناس ومفكرتش ان مش لازم اللي حصل معاهم يحصل معايا وان كل واحد بيكون ليه تجاربه الخاصة بيه
تفكيرى كان قاصر وسطحي
امل :يعنى انتى شايفة انى اقبل محمود
سمية :لا انتى كده مفهمتنيش
انا رايي انك تدى نفسك فرصة تقعدى معاه وتتكلمى وتاخدى قرارك بنفسك متخليش حد يفكرلك ولا يختارلك ارفضيه وانتى مقتنعة برفضك او اقبليه وانتى برضه مقتنعة بقبولك وانك عملتي الصح المهم انتى اللي تقررى مش حد تانى ومش تجارب الاخرين هي اللي تقررلك مش لازم يحصل معاكى اللي حصل معاهم وابوكى مش هيجبرك علي حاجة ومش هيبدى اخته عليكي انتى بنته وسعادتك وراحتك اهم حاجة بالنسباله في الدنيا
امل بابتسامة :الواد رامى معاه حق الكلام معاكى بجد بيطمن
تمام يا عمتو انا هقعد معاه وهفكر كويس وهستخير واللي ربنا عايزه هيكون
انا هروح اجهز علشان المفروض انهم جاين النهاردة باليل هكلمك احكيلك اللي حصل بعد ما يمشو
في بيت امل وهي ومحمود قاعدين سوا لوحدهم
محمود :طبعا احنا متربين سوا ومش محتاجين نتكلم في السن والدراسة والشغل والحاجات دى عارفينها عن بعض خلاص
امل :معاك حق
محمود :يبقي ننتقل بقي للمرحلة التانية اللي بعد مرحلة التعارف دى
مبدايا كده الجواز بيمثلك ايه وايه مواصفات زوجك المستقبلي
امل : سنة الحياة واحد اسباب وجودنا علي الارض اعمارها بالخلف الصالح
مشاركة ورحمة ومودة شراكة بين اتنين مختارين بعض وعايزين شركتهم تنجح
بالنسبة لمواصفات زوج المستقبل حاجات كتير مش واضحة بالنسبالي بس اللي اعرفه ومتاكده انه مفيش عنه غنى
انه يتقي ربنا فيا ويبقي عايز يشاركنى حياته بكل تفاصيلها همومه تبقي همومي ونجاحه نجاحى والعكس طبعا
ميبقاش مهمشني ومعتبر وجودى تحصيل حاصل في حياته ولا وجوده يبقي كده في حياتى
وطبعا في حاجات معرفهاش زى مقلتلك الصورة مش واضحة بس دى الخطوط العريضة اللي مفيهاش نقاش بالنسبالي
محمود :تمام جدا افكار كتير من افكارك تشبه لافكارى الاختلافات بينا بسيطة
امل :بالنسبة لشغلي انا مش عايزة اسيبه
محمود :انا متقدملك وعارف انك بتشتغلي لو كنت عايز واحدة مبتشغلش مكنتش اتقدمتلك بس لازم يكون بيتنا بالنسبالك اهم من شغلك مش العكس يعنى لو الظروف اضطرتك تختارى بين الاتنين هيكون اختيارك لبيتنا
امل :اكيد طبعا
نجاحي في شغلي لو تمنه هيكون فشلي في حياتى الزوجية ابقي منجحتش متقلقش من الناحية دى
محمود :تمام مش قلتلك ان افكار كتير بينا متشابهة
بصي يا امل انا عارف ان في اسئلة عندك مش عارفة تساليها وخوف مش عارفة تعبرى عنه
فانا هكلمك بصراحة
انا عارف انك خايفة من فكرة اننا قرايب خصوصا بعد طلاق منى ووليد برغم من قصة حبهم الكبيرة بسبب مشاكلهم مع بعض وتدخل اهلهم وانهم قرايب ودلوقتي مبيدخلوش لبعض بيت خلاص
بس انا مش وليد وانتى مش منى مشاكلنا هتخلص بينا ومحدش لا من اهلك ولا من اهلي يعرف عنها حاجة لان لو انتى نسيتى زعلك منى خالي مش هينسالى انى زعلتك
وانا لو نسيت ضيقي منك ماما مش هتنسالك انك ضايقتينى يبقي اللي بينا يفضل بينا وبس
امل :معاك حق وانا موافقاك في كل كلامك
بس بما انك فتحت الموضوع الوضع بينى وبين عمتو هيبقي عامل ازاى انت عارف اننا مبنتفقش اوى
محمود :امى خط احمر هي ووالدى زى ما خالي ومرات خالي برضه خطوط حمر وانا عارف انك مش هتعملي حاجة غلط في حق ماما وان اللي مخوفك ان هي الي تعمل كده
انا ياستى بطمنك انتى هتبقي مراتى وملزومة منى وكرامتك من كرامتى وحقوقك عندى محفوظة ومش ممكن تتهانى في بيتي
امى ميهمهاش غير سعادتى ولما تلاقينى مبسوط ومرتاح معاكى اكيد هتقدر ده كمان ماما بتحبك انتى بنت اخوها يعني وانتى عارفة هي بتحب خالي بالذات ازاي
وبرضه لو لا قدر الله حصل حاجة حقك انا اللي هجيبه مش انتى انا اللي هجيبه وانتى هتسبيني اتصرف اتفقنا
امل :اتفقنا
محمود بابتسامة:لو حصل نصيب وان شاء الله قلبي بيقلي انه هيحصل نصيب عايزك تعرفي ان زى ما انتى قلتي الجواز شراكة بين اتنين بيتقاسمو الفرح والحزن مع بعض
ومحدش فيهم هيبقي وحيد والتانى جنبه وبيحاول ان شركتهم تنجح وتكبر وانا عايزك شريكتى يا امل شركتى في حياتى الجاية كلها ومستعد كل الاستعداد انى اعمل اى حاجة علشان ده يحصل
امل بخجل:طيب انا هقوم دلوقتي وبابا هيبقي يبلغك رايي
بعد اذنك
محمود :اتفضلي
فى التليفون
امل :كان معاكى حق يا عمتو كنت هخسر كتير لو مكنتش اديت لنفسي فرصة اتكلم مع محمود واحكم بنفسي
سمية :طمنيني حصل ايه
امل :اتكلمنا كتير وبصراحة ووضوح
افكار كتير بينا متشابهة وكلامه طمنى
ومتمسك بيا كده تمسك زود ثقتي في نفسي
وثقتي فيه وخلانى حسا انى مرتاحة للجاى مدام انا اختياره ومصر عليا يبقي هيدافع عن الاختيار ده ويستاهل اديله فرصة
سمية :خدتى قرار ولا لسه طيب
امل :انا استخرت قبل ما يجى واستخرت بعد ما مشي علي طول وحسا براحة بس برضه هستخير تانى وهفكر تانى ده جواز يا عمتو يعنى اهم قرار هاخده في حياتى ولازم اكون واثقة منه مية في المية
سمية :تمام يا حبيبتي خدى قرارك وفكرى براحتك
بعد تلت ايام في بيت امل
امل :بابا لو سمحت كلم محمود وقوله انى موافقة💖
#حكايات_منار
فضلا تدعو تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر
