رامى :محمد انا مخنوق وعايز اتكلم معاك وراك حاجة دلوقتى ولا فاضى
محمد :انا في البيت تعالى بات معايا انا لوحدى في البيت
مراتى عند اهلها علشان ولادتها قربت
رامى :مسافة السكة هكون عندك
فى بيت محمد
محمد :منور يا رامى انا عملتلنا سندوتشات وكوبايتين شاى
كل معايا بقي علشان جعان واحكيلي مالك
رامى :قالتلى حظ سعيد المرة القادمة يا محمد
محمد باستغراب :انت بتتكلم عن مين
رامى بحزن : مريم خطيبتى او اللي كانت خطيبتى
لانها لسه فسخا الخطوبة من كام ساعة
محمد :انا مش فاهم حاجة احكيلى ايه اللي حصل
رامى :طلبت منى اروحلهم البيت واصرت عليا ان الموضوع ضرورى ولما رحت لقيتها جايبة الهدايا اللي جبتهالها والشبكة وحطاهم عالترابيزة علشان تديهملى
فى بيت اهل مريم
مريم :خلاص يا رامى انت فارقلك ايه
حياتك هتختلف في ايه من غيرى ولا حاجة بيا من غيرى حياتك ماشية زى ما هى
رامى :مين قالك انى مش فارق معايا
مريم :افعالك اللى قالت يا رامى
انا اكدت عليك كام مرة في التليفون علشان تيجى النهاردة وميطلعلكش ميعاد مهم مفاجئ يعطلك زى ما حصل كتير قبل كده
او يكون عندك خروجة مع اصحابك وتقولى ناجلها الاسبوع الجاى علشان مشغول وعندى حاجات مهمة
واشوف انا صور الحاجات المهمة دى علي الانستجرام بتاعك حتى مفكرتش انك تراعى شعورى ومتنزلش الصور في يومها علشان معرفش
رامى باحراج :انااا...ااا
مريم قاطعته :انت ايه يا رامى متفكرش في حجة تكدب بيها لان لو فيك حاجة كويسة انا متاكدة منها فهى انك مبتعرفش تكدب وبيبان عليك
انت تعرف عنى ايه يا رامى بتشاركنى ايه في يومى
ايه في حياتى مقدرش اعمله من غيرك
بلاش انا انت طيب انا اعرف ايه عنك
اسرارك ايه بتحب ايه وبتخاف من ايه وبتكره ايه
علاقتك بمين في اهلك قوية وبمين ضعيفة
يا راجل ده انا معرفش مين اعز اصحابك ولا اعرف اسمك الثلاثى ايه
مخطوبين من ست شهور قولى ايه في حياتك اختلف
ايه بقي احلي طب ايه بقي اسوء
ايه اللي اتغير في تفاصيل يومك
الهدايا اللي انت جبتها دى
جايبلي ساعة غالية بصراحة طبعا دخلت المحل وقلتله عايز اغلي ساعة عندك ده فى حالة ان انت اللي جبتها مش منى ولا ياسمين أخواتك
انت عارف انى ملبستهاش ولا مرة لانك لو كنت تعرف عنى اي حاجة كنت عرفت انى مبحبش الساعات ومبلبسهاش نهائى
شنطة بمرتب شهر من مرتبي واو فعلا
بس انا بكره اللون الاسود يا رامى
لون حزين وكئيب مبرتحش فيه ومعنديش اي حاجة سودا مش بس فى لبسى لا في اي حاجة حتى موبايلي وجرابه لونهم مش اسود ومستحيل يكون اسود
انا ملبستهاش برضه لانها متتفعنيش انت بتقدملى حاجات متلزمنيش يا رامى لانك متعرفنيش ومبتحاولش مجرد محاولة انك تعرفنى
وانا مش هقضي بقية عمرى معاك وانا لوحدى من غيرك وانت لوحدك من غيرى ومبقدملكش ولا بتقدملى اي حاجة
وساعة متقدملى حاجة تكون حاجة انا مش محتاجاها لأنك متعرفنيش
ويوم ما احاول انا اقدملك حاجة مقدرش لانى معرفكش ومعرفش انت محتاج ايه
انا محتاجة حد يشاركنى حياته واشاركه حياتى
مش واحد يدخل حياتى وحتى بعد ما يدخلها
حياتى متختلفش فى اى شئ كأنه مدخلهاش
وحياته متختلفش فى شئ كانى مدخلتهاش
مش انت كنت عايز تثبت لنفسك انك تقدر تنجح في حياتك لوحدك ومش محتاجنى جنبك علشان تنجح
مريم بتصقف
برافو يا رامى انا بشهدلك انت نجحت والمكتب الهندسي بتاعك وقف على رجله بمجهوك لوحدك ومن غير ما اشجعك ولا اقف جنبك
عارف انا كمان اترقيت الاسبوع ده فى شغلي وبرضه انت ملكش اي دور فى نجاحى
وانا الوضع ده مينفعنيش انا عايزه حد حياتى متمشيش من غيره وحياته متمشيش من غيرى يا رامى
انت مش الشخص ده فى حياتى ولا انا الشخص ده فى حياتك
سبنى ادور على اللي يدينى اللى محتاجاه ويشاركنى حياتى واشاركه حياته
وروح شوف واحدة تقبل وتتمنى حياة الاغراب اللي انت عايز تعيشها دى
رامى :انا مش هبعد عنك يا مريم ولا هسيبك تسبينى
انت ليا ومش لغيرى بمزاجك او غصب عنك
افتكرى ده كويس
