امير :بس انتى غلطتى فى حقى كتير يا بسنت
بسنت :صح وانت كمان غلطت فى حقى كتير انا خبطت فيك وانت خبط فيا فكفاية
امير :كفاية ايه
بسنت :كفايانا تخبيط فى بعض
امير :انا بحبك
بسنت :لو كنت قولتهالى فى اول مرة كنت مضايقة وطلعت ضيقى فيك يمكن مكناش وصلنا للحظة دى
عارف انا كان كفاية عليا تقولى مالك وقتها كنت هعيط وانا بقولك مالى انا كنت بحاول معيطش قدامك فبدل ما اعيط عليت صوتى بدل ما اتكلم بحزن اتكلمت بغضب
وانت بدل ما تحاول تحتوينى خدت الموضوع على كرامتك وردتلى كل اللى طلعته عليك حبك ليا مكنش كفاية يخليك تتحملنى وتعديلى مشفعليش عندك
امير :يعنى بقيت انا الغلطان لوحدى
بسنت :لا احنا الاتنين غلطانين
الغلط غلطنا احنا الاتنين
واللى حصل ده عرفنى اننا مننفعش بعض
امير :بس انتى بتحبينى
بسنت :ده حقيقى انا بحبك
بحبك بس مبعرفش ابين قدامك ضعفى بحسك هتستقوى عليا مش هتقوينى
مش هينفع اكمل عمرى مع واحد ببينله دايما انى قوية حتى فى الاوقات اللى بكون فيها ضعيفة لازم امثل انى قوية
مش هينفع فى كل مرة اكون محتاجة اعيط فيها بدل ما اعيط اعلى صوتى وانفعل واتعصب
امير :بس انا بحبك
بسنت :بتحبنى بس عايزنى دايما قوية وبلمع وعندى طاقة اديهالك بتحبنى بس لو لقتنى متغيرة مش هتقولى مالك بتحبنى بس كان نفسك اكون دكتورة مش هينفع تعيش عمرك مع واحدة مش هتعرف تتعامل معاها فى لحظات ضعفها مش هينفع تفضل ندمان انك مش مع دكتورة
المرة الجاية نقى واحدة دكتورة من الاول
امير :انا مش فرقالى الحتة دى
بسنت :انت عارف كام مرة وسط خناقنا تقولى اومال لو كنتى دكتورة كنتى عملتى ايه او تقولى شايفة نفسك على ايه منتيش دكتورة يعنى
الموضوع فارق معاك لدرجة ان حبك ليا مكنش كفاية يخليك مش فارق معاك انى مش دكتورة مع انك بتحبنى تخيل بقى ممكن تعمل ايه فى واحدة مش دكتورة ومبتحبهاش
من الاول خدها دكتورة افضل
امير :انا مش عايز اسيبك
بسنت :علشان بتحبنى بس فى نفس الوقت بتتمنى لو كنت حبيت واحدة غيرى انا مش كفاية ليك يا امير مالية قلبك بس مش مالية عينك
امير :انتى ليه مصرة تحسسينى انى شيطان ومفياش حاجة عدلة
بسنت :وانت لو شيطان ومفيكش حاجة عدلة كنت هحبك ليه
انت انسان فيك مميزات وعيوب بس انا مش قادرة اتقبل العيوب دى
زى ما انا انسانة فيا مميزات وعيوب بس انت مش عارف تتعامل مع العيوب دى
والناس لما بتتجوز مبتتجوزش مميزات بعض بس لا بيتجوزو مميزات وعيوب بعض ولو متحملوش عيوب بعض بيطلقو
مش نسيب بعض دلوقتى احسن ما نطلق على الاقل دلوقتى احنا بنبعد واحنا مبنكرهش بعض لو كملنا هنكره بعض
امير :بس احنا بنحب بعض
بسنت :بس الحب لوحده مش كفاية...انت عارف انك هتوحشنى
امير :ولما انا هوحشك يبقى ليه البعد
بسنت :علشان قربنا لا مريحنى ولا مريحك
نبعد دلوقتى وانت هتوحشنى واوحشك احسن ما نبعد بعدين واحنا بنحمد ربنا ان كل واحد فينا غار من حياة التانى
امير :طيب ما نحاول تانى
بسنت :هنفشل صدقنى
انا مش هعرف انسى انك برغم انك بتحبنى شايف انك تستاهل واحدة احسن منى تستاهل دكتورة
وانت مش هتعرف تنسى انى شايفاك انانى وعايزنى وانا فى احسن حالاتى بس
لو فى حاجة مشتركة بنا غير ان احنا الاتنين بنحب بعض هى ان احنا الاتنين مبننساش
امير :مكنتش اتمنى يحصلنا كده كان نفسى ننجح سوا
بسنت :وانا كمان بس مش كل اللى بنتمناه بنحققه
انا همشى بس قبل ما امشى عايزاك تقولى انك بتحبنى
امير :ليه
بسنت :علشان فى وسط كل التخبيط اللى انت خبطته فيا وكل الحاجات الوحشة اللى قولتهالى افتكرك وانت بتقولى انك بتحبنى عايزاها تبقى اخر حاجة افتكرك بيها
امير :انا بحبك رغم اى حاجة وحشة قولتهالك او حسستك بيها بس والله العظيم انا بحبك
بسنت :وانا اسفة على كل حاجة وحشة قولتها بس صدقنى معرفتش مقولهاش معرفتش اعمل غير كده مقدرتش
وانا كمان بحبك
