دخلت كليتها وهي خايفة ومترددة وبتفكر ترجع بس قالت لنفسها بقالي اسبوع هربانة من المواجهة كفاية هروب
في نظرات بتتوجه لها من اول ما دخلت بس لما دخلت المدرج بتاعها النظرات زادت وبقا في تعليقات كمان هي سامعاها
بنت :يخربيت البجاحة هي ليها عين تيجي
بنت تانية :صحيح الادب فضلوه عن العلم ايه فايدة انها تكون الاولي علي الدفعة وهي مقضياها كده ربنا يعافينا
وبنت تالتة ورابعة وخامسة سمعاهم هي وكلامهم بيدبحها راحت قعدت في اخر بنج لاول مرة من يوم ما دخلت الكلية
التعليقات زادت والغمز واللمز ونظرات الاحتقار ليها حست انها مش قادرة تتحمل قامت علشان تمشي لقت بنت قاعدة جنبها قالتها لو سمحتي عديني
يمنى :لا
ايمان :نعم
يمني :زي ما سمعتي لا
بقالك اسبوع هربانة مش كفاية هروب وبعد ما تمشي هتعملي ايه هتفضلي هربانة ومستخبية لحد الامتحانات انتي شايفة ان ده الحل
بصي عليها بصى شايفة هي فرحانة ازاي وشمتانة فيكي هتشمتيها فيكي اكتر هتعمللها اللي هي عايزاه وتسبيهالها مخضرة هتسيبها تهدلك كل اللي بنتيه
ايمان :هي عملت فيا كده ليه احنا كنا اصحاب انا عمرى ماذيتها ليه تعمل فيا كده دي كانت اعز اصحابي
يمني :نور عمرها ما كانت صاحبتك ولا تنفع تبقي صاحبة لاي حد طول التلت السنين اللي فاتت كانت بتغير منك وبتتكلم عنك وحش لما متكونيش موجودة لو بصيتي في وشها وقت ما كان اي دكتور بيشكر فيكي كنتي هتشوفي كره الدنيا جواهم
بس هى زودت العيار شويتين تلاتة وسمعتك كانت بتقول ايه وانتي مش موجودة وانتي مدافعتيش عن نفسك فالناس افتكروها صادقة وانتي اكدتي صدق كلامها اكتر بهروبك
ايمان: كنتي عايزاني اعمل ايه لما اعز اصحابي تقول عني اني عاملة فيها شريفة وانا زبالة ومقضياها وبتدلع عالدكاترة والمعيدين علشان يدوني تقديرات عالية وبكلم ولاد من كليات تانية علشان محدش يعرف وانها شافت صور زبالة ليا بعتهالهم وشات قذرة بيني وبينهم علي موبايلي وهنا عاملة فيها مؤدبة ومبكلمش حد وانها ميشرفهاش تعرف واحدة زيي
انا اتصدمت مكنتش مصدقة انها تعمل فيا كده صوتي اتخنق جوايا محستش غير بنفسي بجرى وانا ببكي لحد ما وصلت البيت مخرجتش منه الا النهاردة
يمني :تقوليلها ايه الدليل علي كل اللي بتقوله ده تاخدى حقك منها بايدك مش تهربي ولما تقررى تواجهي تضعفى وعايزة تهربي تاني
ايمان :انا نفسي اعرف هي عملت كل ده ليه
يمنى :زي ما قلتلك غيرة من نجاحك وحقد كمان بصي شايفة اللي واقفة معاه ده تعرفيه
ايمان :اه نور قالتلي انها معجبة بيه
يمني :بالظبط اهو هو بقي ساب الدنيا كلها وراح قال لنور انه عايزها تعرفه عليكي مش خطوبة وحب ولا حاجة هو كان هيشقطك شهرين تلاتة بس عادى هو تقريبا مظبط مع نص الدفعة قبل كده اغبية مش عارفة عاجبهم فيه ايه دكر البط ده
المهم نور بقي دي كانت بالنسبالها القشة اللي قطمت ظهر البعير وقالت انها لازم تتصرف واتصرفت
ايمان :وانتي عرفتي منين
يمني :نور قالت لهاجر صاحبتها وهاجرقالت لسلمى وسلمى قالت لسارة وسارة قالت لاحمد واحمد قال لمحمد نص الناس اللي انتي مجروحة من كلامهم دول ومش عارفة تحطي عينك في عينهم دول عارفين ان نور كدابة
التظبيط مع الدكاترة ميخلكيش الاولي عالدفعة
ده بالكتير يخليكي تنجحي وتفضلي مع الدفعة
وعارفين انك محترمة فعلا ومش معقول تمثلي الاحترام يعني تلت سنين بحالهم وكتير منهم عارفين ان نور بتكرهك وبتغير منك الصراحة نور بتغير من اي تاء تانيث في الدنيا عندها احساس بالنقص مش طبيعي والله
ايمان :ولما هما عارفين بيتكلمو عليا ليه صدقوها ليه
يمني :علشان يلاقو حاجة يتكلمو فيها فضيحة جديدةيضيعو فيها وقتهم علشان بيكرهوكي لانك الاولي عالدفعة واشطر منهم كلهم علشان يطلعو النقص اللي فيهم عليكي والوحش اللي فيهم يجبو فيكي علشان سكتي وسبتيهم يتكلمو اسبابهم كتير
نور بصوت عالي:يمني انتي ايه اللي مخليكي بتتكلمى مع الزبالة دى ده مش مكانك
يمني :ايه يا نور انتي هتكدبي الكدبة وتصدقيها الزبالة اللي بجد عارفة نفسها ومعاكي حق انا مكانى مش هنا تعالي يا ايمان نقعد في الاول مكانك الطبيعي
ومسكت ايد ايمان وزقت نور من كتفها وعدت بمنتهي الثقة ونور واقفة هتطلع نار من كتر الغيظ
يمني :انا دافعت عنك المرة دى بس عايزاكي انتي اللي تردى عليها المرة الجاية متسبيش حقك يا ايمان
لو مخدتيهوش انتي بايدك محدش هيديهولك وللاسف اللي زي نور ومستعدين ياخدو حق غيرهم وبيعوضو احساسهم بالنقص عن طريق كسر اللي حواليهم كتير في الدنيا مينفعش تهربي وتسبيلهم حقك وتعمللهم اللي هما عايزينه
ايمان :هو انتي بتساعديني ليه
يمني :علشان متبقيش زيي ومتعمليش اللي عملته
ايمان :زيك ازاي بس ده انتي قوية جدا
دخل الدكتور المحاضرة
يمني :هحكيلك الدكتور يخلص المحاضرة وهحكيلك
خلصت المحاضرة وخرجت يمني وايمان للكافيتريا
يمني :بصي يا ستي انا طول عمرى كان نفسي ادخل اعلام ومجموعي في الثانوية كان مناسب دخلت اعلام القاهرة وقعدت في السكن الجامعي هناك وكنت برجع لاهلي هنا في اسكندرية كل اسبوعين تلاتة مكنش سهل عليا ابعد عنهم بس علشان اعلام كانت حلمي استحملت
في اول سنة ليا في الكلية كان في ولد مركز معايا وبيحاول يكلمني باي طريقة فضل الترم الاول يحاول وانا مش معبراه ولما رجعنا من اجازة نص السنة قلت زمانه زهق ونسيني بس رفضى ليه كان مخليه يتمسك بيا زيادة وواخد الموضوع علي كرامته قبل امتحانات اخر السنة باسبوعين رحت الكلية لقيت صور زبالة ليا
متركب وشي علي جسم بنات تانية في ايد كل اللي في الكلية وانا بدل ما اواجهه اضربه اشتكيه للعميد حتي عملت زي ما انتي عملتي بالظبط هربت مرحتش الكلية تاني بس فضلت في السكن الجامعي في القاهرة لحد ما الامتحانات خلصت وبعدين رجعت ووقت النتيجة فهمت اهلي اني شلت تلت مواد وانى هعيد السنة واني تعبانة في اعلام ومش عارفة امشي فيها واهلي صدقونى وحولت معاكم هنا في تجارة اسكندرية خسرت حلمى وضيعت سنة من عمرى والاسوء من كده اني خسرت احترامي لنفسي بقيت شايفانى ضعيفة وعاجزة مهما داريت بس ده احساسي اللي جوايا
لما نور عملت فيكي اللي عملته وانتي هربتي ومدافعتيش عن نفسك شفت نفسي فيكى وقررت اصلح غلطى واعمل معاكي اللي معملتوش لما كنت مكانك استنيتك تجي مكنتش عارفة هساعدك ازاي بس كنت واخدة القرار ومصرة عليه لما مجتيش طول الاسبوع خفت تكونى قررتى تعملي زيى كنت هجيلك البيت هحاول اجيب عنوانك واجيلك
متخسريش نفسك يا ايمان علشان واحدة متستاهلش وشوية ناس فاضية بكرة ينسو موضوعك ويلاقو حاجة جديد يتلهو فيها انما انتي اللي هتخسرى وحياتك هتدمر متسيبيهاش تدمر حياتك وتطلع عقد نقصها عليكي اتفوقي واطلعى الاولي واتعيني معيدة حققى حلمك واتفرجي عليها وربنا بياخدلك حقك منها واستني عوضه ليكي
ايمان :معاكي حق
ورجعت تاني اروح الكلية وواحدة واحدة قدرت ارجع اركز في شرح الدكاترة ومشوفش غير حلمى ومشوفي نور واللي عملته بقيت بتجاهلها وده خلا شوية ناس يشوفو ان اكيد كلامها غلط بدليل اني متاثرتش و رجعت الكلية تاني ومبتعاملش مع نور خالص والباقين نظراتهم وكلامهم قل مع الوقت واختفي اول ما لقو فضيحة جديدة ضحية جديدة يطلعو فيها نقصهم ويمني معايا بتشجعني وبقينا صحاب جدا
يوم التخرج حضنتها وانا فرحانة بنفسي اوي
ايمان : انا طلعت الاولي يا يمني هبقي معيدة حلمى هيتحقق وهفرح قلب اهلي انا مش مصدقة نفسي الحمد لله الف وحمد وشكر ليك يا رب
يمني :مبروك يا حبيبتي مليون مبروك انتي تستاهلي يا ايمان وتستاهلي اكتر من كده كمان
انا بقيت معيدة وحققت حلمي ويمني لما ساعدتني ثقتها بنفسها رجعت وسامحت نفسها علي اللي عملته في نفسها زمان وحاولت تاني في حلمها القديم والحمد لله قدرت تحققه وبقت مذيعة راديو بسمعها كل يوم وانا رايحة الكلية
نور سقطت تلت سنين ورا بعض
بتعيد نفس السنة اخر سنة ليها في الكلية انا مشمتش فيها ولا حسيت بتشفي هي فعلا مبقتش فارقة معايا لما بشوفها بس بفتكر انى كنت قوية وخدت حقي ومسبتش حلمى يضيع
يمني كان عندها حق عوض ربنا كان حلو اوى وكتير عليا ربنا عوضني بيمني صاحبة عمرى مصدر قوتي وسعادتي عن صداقة وهمية نور كانت اختبار حقيقي ليا في الدنيا اختبار لقوتي وشجاعتي وتمسكى باحلامي والحمد لله انا نجحت في الاختبار وبحاول وهفضل احاول انجح في اي اختبار هتحط فيه 💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
