الى احداهن
حكاية عن الامل اتمنى تجدد املك وطاقتك اتمنى تساعدك واتمنى تحبيها وتنفذى اللي فيها💖
#حكايات_منار
حكاية "الامل قرار"
ملك :اتاخرنا على المحاضرة واهو الباب اتقفل هنعمل ايه
رانيا :ندخل ونحاول نحضر يمكن يسيبنا ندخل
ملك :مش هيرضى يعنى هو انتى مش عارفة دكتور سليمان
رانيا :يعنى خلاص كده المحاضرة راحت هنعمل ايه دلوقتى
نيفين :انا همشي
ملك :هتمشى
نيفين :اه همشي المحاضرة وراحت علينا والسكشن المعيدة شرحها زى الزفت وملوش لازمة وانا تعبانة ومش قادرة وهمشي
ملك :انتى بقيتى كده طول الوقت اتغيرتى يا نيفين اتغيرتى اوى
نيفين :انا اتغيرت
ملك :ايوه اتغيرتى بقيتى بتسكتى كتير كلامك قل معانا ومبقاش فارقلك حاجة ولا فارقلك حد عايزة تمشي بعد ما كنتى انتى اللي بتقولي حتى لو مش فاهمين من المعيدة دى حاجة ادينا بنعمل اللي علينا ونحضر انتى اتغيرتى مبقتيش بتهزرى معانا ولا بتسمعينا انتى متعرفيش عنى حاجة بقالك مدة نيفين اللي انا اعرفها كان زمانها بتخبط علشان تدخل المحاضرة حتى لو الدكتور هيطردنا نيفين صاحبتى اللي بحبها بتتكلم معايا وبتضحكنى وبتحللي مشاكلى وبتهون عليا انما نيفين اللي قدامى دى انا معرفهاش ولا عايزة اعرفها
نيفين :ايه
ملك :زى ما قولتلك كده لو فضلتى كده ومرجعتيش زى الاول انا مش عايزة اعرفك انا مش قادرة اتحمل تغييرك ده
نيفين :ولا انا عايزة اعرفك يا ملك خلاص امشي..بقولك امشي
ساكنة ليه انتى كمان عايزة تمشى زيها شايفانى اتغيرت انتى كمان مش قادرة تتحملينى
رانيا :انا مش عارفة اقولك ايه
نيفين :انا همشي وانتى لما يبقي عندك حاجة تقوليها ابقى تعالي قوليها
رقية :حمزة لحد دلوقتى مرجعش البيت بيلعب ومش مقدر انه خلاص بقي ثانوية عامة ومحتاج يشد حيله فى المذاكرة
نيفين :وانتى عايزة منى ايه
رقية :عايزاكى...عايزاكى تكلميه زى كل مرة لما بتكلميه بيحترم نفسه ويذاكر
نيفين :وبعد اسبوع تأثير كلامى عليه يروح ويرجع يهمل
رقية :يعنى ايه
نيفين :يعنى انا مش هكلم حد كلميه انتى
رقية :مش هعرف انتى اقربله منى كمان انا مش هعرف اقوله اللي انتى بتقوليه
نيفين :ولا انا دلوقتى هعرف اقوله
وهو مش صغير وده مستقبله لو مش هيتعب دلوقتى علشان يبنيه صح ميجيش يزعل قدام بقي لما يفشل
رقية :قوليله كده فكريه بده
نيفين :قولتلك مش هعرف
بعد يومين
مروان :يومى النهاردة كان متعب اوى في الشغل واتخانقت مع محمد صاحبى كمان يوم غريب مش فاهم في ايه
نيفين :معلش
مروان :بس كده مش هتقولى حاجة تانية
نيفين :معنديش حاجة اقولها
مروان :نعم يعنى مش هتسالينى حصل معايا ايه فى الشغل مش هتقوليلي اتخانقت مع محمد ليه مش هتقوليلي انا غلطت فى حقه ولا لا مش هتقوليلي ان انا وهو ملناش غير بعض زى كل مرة وان خيركم من بدء بالصلح
نيفين :لا
مروان :بالبساطة دى لا سهلة كده انتى مالك يا نيفين فيه ايه اتغيرتى ليه
نيفين بغضب :اتغيرتى..اتغيرتى..اتغيرتى ..كلكم بتقولولى اتغيرتى انا متغيرتش
مروان :لا اتغيرتى مبقتيش بتتكلمى معايا زى الاول بقيتى تسكتى كتير بطلع الكلام منك بالعافية انتى حتى مبقتيش تسالينى حصل معايا ايه في يومى زى ما عودتينى
وبقيت انا بحكيلك من نفسي وانتى مبتهمتيش باللي بقوله لا بتهزرى وتضحكى على كلامى ولا بتحلى معايا مشاكلي انتى اتغيرتى انتى مش نيفين اللي انا اعرفها مش نيفين اللي انا خطبتها
نيفين :انا متغيرتش انا تعبت روحى هلكانة قلبى بيوجعنى تعبت ومعنديش طاقة لاى حاجة ولا لاى حد حتى لنفسي معنديش طاقة فكرت انت تسمعنى فكرت انت تضحكنى فكرت انت تحللي مشاكلي فكرت انت تتكلم معايا
مروان :انا مبعرفش اعمل ده وخطبتك لانك بتعرفى تعمليه وانتى وافقتى وانتى عارفة انى مبعرفش اتكلم اوى
نيفين :مش عارف تتكلم معايا ومش عارف تحس بيا كمان
انا وافقت عليك بس ده مش معناه انك تفضل كده دايما ومتحاولش تتغير شوية علشانى
وانت خطبتنى وانا بعرف احتوى واهون واسمع واحل مشاكل واهتم بس انا ممضتلكش تعهد ان ده هيكون حالي دايما
انا انسانة وليا طاقة وطاقتى دى ليها اخر وانا جبت اخرى
انا متغيرتش انا تعبت حالي اتبدل بس دى انا
حالة من ضم حالاتى اللي لو اتجوزنا هتشوفنى عليها زى ما هتشوفنى وانا حزينة ووانا ضعيفة ووانا غلطانة كمان
لو فاهم انى دايما هيكون عندى طاقة ودايما بلمع ومنورة تبقي فاهم غلط طاقتى هتخلص وهتيجى عليا اوقات وانطفي زى دلوقتى كده ولو انت منورتنيش وشحنتلي طاقتى ولو محصلش حاجة من عند ربنا تنورنى من تانى وتشحنلى طاقتى يبقي هفضل مطفية اعمل حسابك على كده يعنى
مفيش حد ثابت على حال ومفيش حد مهما كان مين هيفضل يدى من غير ما ياخد خصوصا في حالتك دى وانت عايز طول العمر تاخد من غير ما تدى مستحيل تلاقي اللي انت عايزه ده مش بس فيا في الدنيا كلها مش هتلاقيه
مروان :انتى عايزة تسبينى
نيفين :انا عارفة انى مينفعش اخد اي قرارات وانا في حالتى دى لانها في الغالب هتكون قرارات غلط
القرار قرارك انت يا مروان شوف انت عايز ايه
انا حاسة انى معنديش طاقة حتى افكر واخد قرار انت متخيل حالتى عاملة ازاى
مروان :
نيفين :شكلك مش متخيل بس صدقنى هى حالة صعبة اوى
فكر براحتك وكلمنى وقت ما تحب
بس لو عايز تكلم نيفين اللي بتسمع وبتهون عليك وبتديك طاقة يبقي متكلمنيش لانى مستنفذة دلوقتى ومعنديش طاقة اديهالك ولا اديها لاى حد
مروان :
نيفين :شكلك معندكش حاجة تقولها طيب انا هقفل بقي مع السلامة
