مالك :خلود...خلود...خلوووود
خلود بخضة :بسم الله الرحمن الرحيم
مالك :مكنش قصدى اخضك
خلود :استنى مش سمعاك هثبت الأغانى اللى فى ودانى...مش هعرف ايدى مبلولة ممكن تثبتها انت
مالك :انا
خلود :ايوه طلع الموبايل من جيبى وثبتهم ولا اقولك فى زرار فى السماعة انا نسيته هضغط عليه ادينى ثبت الأغانى كنت بتقول ايه
مالك :كنت بقولك معلش مكنش قصدى اخضك بس ندهت كتير وانتى مش سمعانى
خلود :معلش السماعات اللى فى ودنى وصوت المياة كمان خلونى مسمعش
انت ليه لسه صاحى ولا انت نمت وصوتى صحاك
مالك :لا انا كنت صاحى قولت اجى المطبخ اشوف حاجة اكولها علشان جعان
خلود :تحب تاكل ايه انا خلاص اهو خلصت المواعين
مالك :اعمللنا اى سندويتشات
خلود باستغراب :اعملنا
مالك :ايه مستغربة ليه تحبى اعملهم انا
خلود :لا انا مستغربة انك قولت اعملنا يعنى عايزنى اكل معاك
مالك :عادى يعنى لو انتى مش عايزة خلاص
خلود :لا انا جعانة وكده كده كنت هتعشى بعد ما اخلص المواعين
مالك :بتتعشى متأخر كده
خلود وهى بتعمل السندوتشات :اه
مالك :وعلى كده بتتغدى امتى
خلود :لما انت بتنزل لصحابك
مالك :وبتفطرى وانا فى الشغل
خلود :اه
مالك :ليه قلبتى يومك كده
خلود :انا كده كده قاعدة فى البيت
وبعدين لقيت انك مبتحبش تاكل معايا فقولت علشان تاكل براحتك يعنى
مالك :وعلشان كده بتغسلى المواعين دلوقتى وانا المفروض نايم
انتى بتتجنبينى
خلود :لا بالعكس انت اللى بتتجنبنى فانا بقيت بحاول مخرجش من اوضتى كتير وانت موجود علشان مقيدش راحتك وتخرج من اوضتك براحتك لو عايز
مش انا اللى بتجنبك يا مالك انت اللى بتتجنبنى
تحب اعملك معايا حاجة سخنة تشربها مع السندوتشات
مالك :انتى هتشربى ايه
خلود :كاكاو باللبن
مالك :ماشى اعمليلى معاكى سكر قليل
خلود :عارفة...طيب انت ممكن تخرج الصالة او اوضتك وانا هجبلك الاكل والكاكاو لحد عندك
مالك :انتى مش هتتعشى معايا
خلود :انت عايزنى اتعشى معاك
متتحرجش لو مش عايز بس مش قادر تقولها علشان انا كده كده هاكل وانا اللى عملت العشا
قول عادى مش مشكلة
مالك :لا مش محروج ولا حاجة انا عايز نتعشى سوا
لو انتى مش عايزة متتحرجيش وقولى
خلود وهى بتقلب الكاكاو باللبن :لا تمام نتعشى سوا بقالى كتير باكل لوحدى فكويس اننا ناكل سوا
مالك وهو بيشيل الصنية اللى عليها السندوتشات :تمام هاتى الكاكاو وتعالى
مالك :ايه الصمت ده انتى بتحبى تاكلى فى هدوء
خلود :لا خالص بالعكس انا حتى بتفرج على التلفزيون او على موبايلى وانا باكل
مالك :ومشغلتيش التلفزيون ليه دلوقتى
خلود :قولت يمكن انت بتحب تاكل فى هدوء تحب اشغله
مالك :لا نتكلم احسن
قولى حاجة
خلود :هو انا ممكن اسألك سؤال
مالك :ممكن طبعا
خلود :هو انت بتحب واحدة تانية
مالك :ايه
خلود :السؤال غريب فعلا واحدة تانية دى على اساس انك بتحبنى
طيب هغير الصيغة هو انت بتحب واحدة
مالك :ليه بتقولى كده
خلود :انت من يوم ما اتجوزنا وانت بتنام فى اوضة تانية
قولت يمكن علشان مش واخد عليا واحنا خطوبتنا كانت تقليدية ومطولناش واتجوزنا بسرعة
يمكن محتاج تاخد عليا وتحس تجاهى مشاعر الاول
بس ما علشان ده يحصل انت لازم تكون بتقرب منى اكتر وانت مبتتعاملش معايا اصلا
فكرت كتير ليه ممكن تكون بتعمل كده
مالك :وتفكيرك هداكى لأنى بحب واحدة تانية
خلود :الصراحة اه
مالك :ولو ده حقيقى هتعملى ايه
خلود :مش عارفة هو انا المفروض اعمل ايه وقتها
مالك :مش المفروض تعملى حاجة لأن اصلا مفيش واحدة تانية
وانا مش بتجنبك قصدى يعنى انى مش قاصد اتجنبك انا بس مش عارف اتعامل معاكى ازاى
خلود :هما قالولى انك ملكش فى التعامل مع البنات خالص بس متوقعتش انك تكون للدرجة دى
عموما اتعامل معايا عادى متفكرش وانت بتتعامل معايا اتعامل بطبيعتك
مالك :تمام ان شاء الله
تسلم ايدك على الاكل
خلود :تسلم من كل سوء يا رب
مالك :تصبحى على خير
خلود :وانت من اهل الخير
