مساء الخير اعضاء جروب احكى
النهاردة الخميس والساعة قربت على اتناشر بالليل
يعنى ده وقت البوستات الأسبوعية اللى بنحكى فيها
هنحكى عن ايه الاسبوع ده
هنحكى عن حاجة غريبة شوفناها او اتحكتلنا
كل واحد فيكم ينزل بوست يحكى فيه حاجة غريبة حصلت قدامه او حصلت لحد هو يعرفه
حاجة حلوة او حاجة وحشة الفكرة فى انها تكون حاجة غريبة وغير مألوفة ومبتحصلش كتير
وكمان متكنش حصلت للى بيحكى نفسه لا تكون حصلت لحد تانى غيره
احنا قولنا كده الموضوع يبقى مختلف ومميز اكتر
ومتنسوش فى اول البوست تكتبو #احكى
البوست اللى هيتبعت من غير الهاشتاج مش هيتقبل
فى انتظار حكاياتكم الغريبة😍
#احكى
صاحبى مسمى ابنه على اسم الديلر بتاعه اعتقد دى اغرب حاجة ممكن حد يعملها فى حياته
وهو فى الجامعة كان بيحب بنت ومرتبط بيها وهى خانته مع اعز اصحابه
وقتها هو من صدمته فيهم وزعله من اللى عملوه فيه اتلم على شباب صايعة بتشرب مخدرات وبدء يشرب معاهم
وفى يوم كان بيحكى للديلر اللى كانو بيقضو منه
هما كانو بيشترو من الديلر ويشربو عنده فى شقته هو علشان عايش لوحده وكده امان اكتر ليتقبض عليهم ولا حاجة
المهم يعنى هو كان قاعد يحكى للديلر ان امه لما عرفت انه بيشرب مخدرات بدل ما تضربه ولا تزعق فيه فضلت تعيط وتبوس ايده وتقوله علشان خاطرى يا ابنى ارجع عن السكة دى انت بعد ابوك راجلى انا واخواتك انت سندنا متكسرش ضهرنا احنا معدلناش غيرك
كان بيحكيله وهو بيعيط وبيقوله انا مش عايز اكسر ضهرها بس انا قلبى اتكسر من حبيبتى اللى خانتنى وسابتنى علشان صاحبى
ومش عايز افوق مش عايز افتكر اللى عملوه فيا
وقتها الديلر اتعصب عليه وفضل يقوله بتضيع نفسك علشان اتنين زبالة وفضل يشتم فى حبيبته وصاحبه
وقاله ايه يعنى واحدة حبيتها وخانتك ما فى داهية بكرة تحب تانى وتالت
وايه يعنى صاحبك طلع واطى بكرة تصاحب واحد واتنين وتلاتة احسن منه وارجل منه
احمد ربنا انك عندك ام واخوات بيحبوك ومعتمدين عليك فى حياتهم وبيخافو عليك
وعندك مستقبل كويس بكرة تتخرج وتشتغل وتبقى راجل محترم
انا لو عندى نص اللى عندك مكنتش بقيت كده
انما انا معنديش مستقبل ولا عندى اهل ومليش طريق غير اللى انا ماشى فيه ده معرفش طريق غيره
انما انت عندك طريق انضف من ده بكتير وعندك اهل وعندك مستقبل متضيعش كل ده علشان شوية رمم متستاهلش
وقاله لو جتلى تانى انا مش هبيعلك مش عايز اشوفك تانى
احمد ربنا على نعمه عليك ومتخلينيش اشوفك تانى
انت احسن منى ومن صحابك اللى جابوك هنا
دول اصلا مش صحابك لو كانو صحابك بجد مكانوش جابوك هنا
انت انضف منى ومنهم والطريق ده مش طريقك ابعد عنه وعنا
وروح بوس ايد امك وعيش تحت رجليها هى واخواتك متزعلش ابوك فى تربته ومتضيعش نفسك على الفاضى
وفعلا كلامه خلى صاحبى يبطل شرب مخدرات وركز فى كليته واتخرج واشتغل واتجوز وخلف
انا عرفته فى الشغل ومن وقتها واحنا اصحاب
وهو اللى حكالى حكايته دى
قالى انه بعد سنين سأل على الديلر ده لقى ان المعلم اللى هو كان بيشتغل لحسابه قتله علشان كان عليه فلوس لبضاعة اخدها منه ومعرفش يسددله تمنها
صاحبى زعل عليه اوى ولحد النهاردة بيخرج على روحه صدقات وبيدعيله ربنا يرحمه ويجعل اللى عمله معاه شفيع ليه عند ربنا
وسمى ابنه على اسمه لأنه شايف انه لولاه كان زمانه مات اوفر دوز ولا اتجنن ولا اتشل ولا انتحر زى ما حصل لكتير من اصحابه اللى كانو بيشربو مخدرات
انا مستغرب ان صاحبى بيحب الديلر بتاعه وبيترحم عليه
بس اتمنى لما اموت يكون فى حد بيحبنى وبيدعيلى بالرحمة وبيخرج على روحى صدقات ويسمى ابنه على اسمى زى ما صاحبى عمل مع الديلر بتاعه
