اميرة :انا هروح اغضب عند ماما يومين فى اكل يكفيك لحد ما ارجع وهدومك مغسولة وقمصانك مكوية متشربش القهوة بتاعتى وارجع الاقيها خلصانة
حمزة :وانا اشرب قهوتك ليه انا مبشربهاش
اميرة :اومال امى اللى بتشربها ولا عايش معانا عفريت كييف وصاحب مزاج بيحب القهوة حمزة انا بجيب القهوة دى بيجى ربع مرتبى اتق الله
حمزة :خلاص مش هاجى يمتها الخناقة المرة دى على ايه لقتينى ماسك موبايلك بفتش فيه
اميرة :لا عملنا الفيلم ده المرة اللى فاتت
حمزة :اومال مضغوط وبطلع ضغط الشغل فيكى وبتخانق معاكى طول الوقت ومش عاجبنى اى حاجة بتعمليها
اميرة :لا الفيلم ده عملناه المرة قبل اللى فاتت والمرة اللى قبلها قولنا جيتلى الشغل وشوفتنى واقفة مع زميل ليا واتخانقت معاه وسببتلى مشكلة كبيرة فى شغلى
حمزة :كده هتقولى ايه المرة دى
اميرة :مش عارفة هفكر فى حاجة تنفع وانا فى الطريق وهبقى اكلمك اقولك وصلت لايه وانت كمان فكر ولو لقيت حاجة تنفع خناقة ابقى قولى
حمزة وهو بيضحك :قصدك لو عرفت تألف فيلم جديد
اميرة :جرب يمكن تعرف انا همشى بقى
حمزة :اجى اوصلك
اميرة :ده على اساس انى رايحة لماما اوديلها هدية عيد الام
انا رايحة غضبانة المفروض يا حمزة واكيد مش هنقنعهم اننا متخانقين وانت بكل رومانسية واهتمام موصلنى لحد هناك
حمزة وهو بيضحك :يا ستى خليهم يقولو ما صدقت اخلص منك
اميرة :لا علشان انت يومين كده وتقول مستحملتش البيت من غيرى وتيجى تصالحنى واه هات معاك هدية وانت جاى
حمزة وهو بيضحك :اجيبلك شامبووو
اميرة :لا هاتلى دبادشيب احنا هنهزر يا حمزة هاتلى برفان ولا سلسلة فضة ولا حتى بوكية ورد انا همشى
حمزة :خلى بالك من نفسك
اميرة :وانت كمان حمزة متشربش القهوة بتاعتى
بعد يومين
حمزة :اميرة...اميرة كفاياكى نوم
اميرة :نص ساعة كمان يا ماما
حمزة :لا يا قلب ماما كفاية نوم...ده صوت ماما برضه
اميرة وهى بتقوم بخضة :حمزة...انت بتعمل ايه فى اوضتى
حمزة :طنط جيلان قالتلى انك نايمة قولتلها تصحيكى قالتلى وانت غريب يا حمزة ده بيتك ودى اوضة مراتك اضرب الباب برجلك وخش صحيها
اميرة :بقى انا امى قالتلك اضرب الباب برجلك وخش صحيها
حمزة وهو بيضحك :لا الصراحة هى قالت خش صحيها بس الباقى ده التاتش بتاعى
جيلان وهى بتدخل الاوضة :شكلكم اتصالحتم ده شيطان ودخل بينكم اكيد محسودين ربنا يهدى سركم وما تفترقو عن بعض ابدا
حمزة وهو بيحط ايده على كتف اميرة وبيبوس راسها :اللهم امين يا طنط انا اصلا مستغناش عن ميرو دى روح قلبى
جيلان :ربنا يسعدكم تعالى طيب يا اميرة ساعدينى نحط الغدا
اميرة :حاضر يا ماما هغسل وشى واغير هدومى واجى وراكى على طول
جيلان باستغراب :هتغيرى هدومك ليه مفيش حد غريب هنا
حمزة بابتسامة :ايوه يا قلبى مفيش هنا غير طنط واخواتك وانا جوزك حبيبك
اميرة :لا انا اصلى حسيت انى سقعانة مرة واحدة كده
جيلان وهى بتخرج من الاوضة :خلاص يا حبيبتى على راحتك بسرعة بس وحصلينى
اميرة وهى بتشيل ايد حمزة من على كتفها :انت استحليتها ولا ايه
حمزة :الصراحة اه كمان ايه القمر ده ما انتى طلع عندك هدوم بنات اهو اومال لبسالى بكم صيف شتا ليه
اميرة :وطى صوتك هتفضحنا كمان انا هنا فى بيتنا مع امى واخواتى البنات يعنى البس اللى انا عايزاه انما فى شقتنا سيادتك عايش معايا تسمح تطلع بره علشان اغير
حمزة :لا مسمحش مش هخرج الدكتور قالى اقف فى حتة طراوة
اميرة وهى بتقوم تطلع جاكيت خفيف بكم تلبسه :هاهاها دمك مش خفيف على فكرة
حمزة :وايش فهمك انتى فى خفة الدم روحى حطى الغدا مع طنط لحسن انا جعان اوى
