ياسمين :انتى كنتى خايفة تركبى معانا صح
معاكى حق الخلقة دى يتخاف منها فعلا
على :ده على اساس ان انتى وشك ملائكى مش كده يا بت
ياسمين :اكيد طبعا ملاك برئ بروح حلوة
على :دى ماما هى اللى حلوة
نيفين :انا...الصراحة خوفت لما هو وقف بس لما لقيتك معاه قولت معاه خطيبته ولا مراته فاتطمنت
ياسمين :يا ريتك ما اتطمنتى
نيفين بخوف :ايه
ياسمين :بقى انا ابقى خطيبة ولا مرات ده زعلتينى
على :زعلتك انتى تطولى اصلا
لا هى بنت عمى او بمعنى ادق مصيبة حياتى وبلائى فى الدنيا وعملى الأسود
ياسمين بفخر :حبيبى تسلم
نيفين وهى بتضحك :انتو لُطاف اوى
على :لُطاف ازاى يعنى
ياسمين :دى جمع لطيف يا جاهل هعلم فيك لحد امتى
تسلمى يا جميلة
نيفين :مسميش جميلة
على :اومال اسمك ايه
نيفين :اسمى نيفين
ياسمين :انا بقول جميلة دى كوصف يا حبيبتى مش كأسم
على :مش وقت تطلعى فيه موجه اللغة العربية اللى جواكى خالص
ياسمين :بس ياللى مش عارف الفرق بين اللام الشمسية والقمرية لحد دلوقتى
تشرفنا يا نيفين وانا ياسمين
على :وانا على
نيفين :اتشرفت بيكم
انا هنزل هنا
ياسمين :ليه
نيفين :هركب من هنا ميكروباص
على :احنا ممكن نوصلك
ياسمين :سيبلى انا الطالعة دى يا بحر الجدعنة
احنا ممكن نوصلك يا نيفين
نيفين :مش عايزة اتعبكم
ياسمين :مفيش تعب ولا حاجة
نيفين :صدقينى مش هينفع
ياسمين :على راحتك
طيب ممكن رقمك عايزة نبقى صحاب لو مش هيضايقك
نيفين :لا خالص بالعكس
ومن هنا بدأت حكايتنا احنا التلاتة
من هنا وبسببى بقينا اصحاب
مش انا وهى بس انا وهى وعلى
كانت بتخرج معانا احنا الاتنين او كنا بنخرج انا وهى
وعلى كتير كان بينط فى الخروجة
قليل ما كان بيسبنا نخرج انا وهى بس
على معتبرهاش مجرد صديقة
اعتبرها حبيبة
انا عرفت انه بيحبها قبل ما هى تعرف ويمكن قبل ما هو نفسه يعرف
من اهتمامه بيها وفرحته ولهفته اننا نتقابل وحرصه على انه يكون فى ولو دقايق بيقضوها هو وهى بس من غيرى
على حب نيفين
ولما قالها قالتله ازاى انت مش بتحب ياسمين
قالها ياسمين لا طبعا انا بحبك انتى
وانتى بتحبينى صح
قالتله بس ياسمين بتحبك
قالها طبعا لا
وعلشان يثبتلها سألنى قدامها
ياسمين :انا احب
واحب مين انسان الغاب طويل الناب ده
ازاى بس يا نيفين اعقلو الكلمة
ده انا اعيش واموت سينجل اكرملى
على :هعديلك طولة اللسان دى علشان كلامك عاجبنى وجاى فى مصلحتى
شوفتى مش قولتلك انها مبتحبنيش
ياسمين :ازاى تفكرى انى بحبه
ده انا بثق فى ذكائك يا نيفين صدمتينى بجد
نيفين :معرفش بقى انا بحس علاقتكم حلوة وفيها انسجام وتناغم
على :انسجام وتناغم هى بهتت عليكى بموجه اللغة العربية اللى جواها
كمان تناغم ايه وانسجام ايه ده انا مبطيقهاش
ياسمين :يا روحى القلوب عند بعضيها انا نفسى اولع فيك
على :شوفتى يا ستى التناغم والانسجام اللى على حق ربنا
قولتى ايه بقى انا بحبك وعايز اتقدملك
نيفين :اقول ايه
على :قولى وانا كمان بحبك وموافقة
نيفين :اقوله ايه يا ياسمين
ياسمين وهى بتضحك :قوليله حبتك العافية
قوليله وانا كمان بحبك وموافقة لو انتى فعلا يا نيفين بتحبيه وموافقة
نيفين :قولها تانى
على بسعادة :انا بحبك وعايز اتقدملك
نيفين بابتسامة :وانا كمان بحبك وموافقة
