يسعد صباحكم
عايزة اقولكم كلمتين عن الندم اوقات بنندم على حاجات ضيعناها من ايدينا بسكوتنا او باننا معملناش حاجة علشان تبقى من نصيبنا بنندم ونضايق وممكن نعيط حتى بس مبنفكرش ان الحاجات دى مش نصيبنا يعنى ممكن تكون من نصيب اللى راحتله اللى اتكلم اللى خد خطوة احنا مخدنهاش لان الحاجات دى مش نصيبنا هى نصيب اللى راحتله متجلدوش روحكم بالقوى وعدو لو ملكوش نصيب فى الحاجات اللى راحت منكم فاكيد ليكم نصيب فى حاجات تانية اتفقنا🌷
على السلم
عمرو :صباح الخير يا دينا ولا اقولك يسعد صباحك احسن
دينا :صباح النور يا عمرو
عمرو :هو اللى يكتشف ان جارته بتكتب كلام حلو جدا بقالها كتير وهو مكنش يعرف يعمل ايه
دينا :يتجوزها ههههه بهزر قصدى يبعتلها طلب صداقة عادى ويعمل لايكات كتير لبوستاتها بقى ويشجعها
عمرو :ايه ده هتقبلى طلب الصداقة لو بعته ايه التواضع الجامد ده
دينا :خلاص ابعته وانا علشان ابقى مغرورة هسيبه يومين متعلق وبعدين اقبله
عمرو وهو بيضحك :قشطا هبعتلك مع السلامة
دينا :مع السلامة
فى الجامعة
دينا :كملى يا دورا كملى
دعاء :انتى بتقوليلى يا دورا ليه
دينا :علشان شبهها مبتشوفيش حاجات واضحة وضوح الشمس فى عز الضهر
يا دعاء الواد ده بيلعب بيكى بقاله تلت سنين بيكلمك
وكل سنة بحجة شكل اول سنة هتخرج الاول ربنا كرمه واتخرج تانى سنة بقت هخلص الجيش ربنا كرمه تانى وخلص جيشه على خير تالت سنة بقى معلش اصلى مينفعش اخطب قبل اخويا الكبير ليه مش فاهمة هيجرا ايه لاخوه الكبير لو خطب قبله كمان هو ليه كلهم بيبقى عندهم اخ كبير مينفعش يخطبو قبله ولما هما عارفين انهم مش هينفع يخطبو قبله بيحبو ويعلقو بنات الناس بيهم ليه ما يستنو لما اخوهم الكبير يحب والموضوع يمشى بالدور كده
دعاء :انتى حاسة انه بيكدب
دينا :لا مش حاسة انا متأكدة الواد ده بيكدب وبيشتغلك
دعاء :بس هو عنده اخ اكبر منه بسنتين فعلا
دينا :واخوه قلبه هيتكسر لو هو خطب قبله ايه ده دلوقتى البنات اللى هما بنات ومشاعرهم رهيفة ودماغهم صغيرة بقى عادى عندهم اخواتهم اللى اصغر منهم تتخطب قبلهم
هو ممكن يكون مقالش لاهله اصلا يا دعاء
دعاء :وهيكدب عليا ليه
دينا :لانه مش واخد الموضوع جد يا دورا لانه بيضيع وقت مش اكتر
دعاء :لا انتى متعرفيش نبيل
دينا :ولا انتى تعرفيه تلت سنين كلام على الفيس ميخلكيش تعرفيه ولو كلمتيه عمرك كله على الفيس برضه مش هتعرفيه علشان تعرفى حد لازم تكونى بتتعاملى معاه لحم ودم
دعاء :اه زى عمرو كده
دينا :اسكتى شوفته النهاردة على السلم وانا جاية الجامعة طلع بيقرالى تخيلى
دعاء :عادى اخواته عندك فى الاصدقاء تلاقى حد فيهم عمل لبوست من بتاعك مشاركة ولا حاجة
دينا :ممكن بس فرحت اوى اتكلم معايا كتير
يسعد صباحكم
كلامى النهاردة هيكون عن الضعف عن الجملة الشهيرة بتاعت عدى علشان المركب تمشى الحقيقة ان اللى عدو علشان المركب تمشى المركب بتاعتهم غرقت وموصلتهمش لبر الامان واول ناس وقعو من على المركب كانو هما
المركب اللى مش هيقدف بيها كل اللى عليها وهيبقى شخص واحد فيهم بيقدف لحد ما ايده توجعه والتانى ولا فارقله ولا تاعب نفسه هتغرق بالاتنين متفضلوش على مركب بتقدفولها لوحدكم وبتتعبو علشان حد مش مقدر تعبكم ولا مستعد يتعب علشانكم
خليكم فاكرين علشان المركب تمشى لازم كل اللى عليها يتعبو ويقدفو والا هتغرق اتفقنا🌷
