هيثم :هو انتى مركبتيش معاهم الساقية ليه بتوجع بطنك زيى
نانسى :لا عادى بس علشان متبقاش لوحدك زى ما كنت لوحدك لما ركبنا الطبق الطاير متبصليش كده احنا مفيش بنا عمار اه بس انا لطيفة بالفطرة وكده كده الخروجة دى علشان ميار ومرام طلبوها وهما ثانوية فحقهم يستمتعو باليوم ويركبو كل الالعاب ومش لازم تفضل لوحدك برضه خصوصا ان مدينة الملاهى زحمة والطابور طويل وبناخد وقت على ما نركب فقولت افضل معاك بدل ما تبقي لوحدك
هيثم :معايا وانتى ماسكة موبايلك
نانسى :ادينى سيبته متوقعتش يضايقك
هيثم :واتكلم معاكى ازاى وانتى ماسكاه
نانسى :ما هو انا متوقعتش انك هتتكلم معايا
هيثم :اومال فضلتى معايا ليه
نانسى :اهو ونس علشان متحسش انك لوحدك اوحش حاجة فى الدنيا ان الواحد يحس انه لوحده هو انت عادى تكون لوحدك مبتضايقش
هيثم :مفكرتش قبل كده فى الحكاية دى
نانسى :اجابة متوقعة اومال يعنى هتقولى اجابة فيها اى احساس او مشاعر
هيثم : ومقولش ليه مبفهمش فيهم
نانسى :لا مبتفكرش فيهم عايز تفهمنى انك عمرك فكرت فى الحب او فى اى مشاعر تانية
هيثم :فكرت كتير فى الحب واكل عقلى اصلا مش فاهم ليه
نانسى :معقول حبيت
هيثم :لا مش انا ده واحد صاحبى بس مبيبطلش كلام عن قصة حبه لما خنقنى
نانسى :قصة حب جامدة بقى
هيثم :قصة حب رخمة
نانسي وهى بتضحك :انا اسمع عن حب من طرف واحد حب يتحدى الظروف حب يتخطى الزمن انما حب رخم جديدة دى وقصة حب صاحبك رخمة ليه
هيثم :اصله مش فاهم هو بيحبها ليه واحدة عكسه فى كل حاجة مفيهاش ولا ميزة بالنسباله كائن عشوائى بوهيمى فوضوى لأقصى درجة مش مخطط هيعمل ايه كمان ساعتين مبالك بقى بتخطيط للمستقبل واخدة الدنيا لعب مبتعرفش تفكر عديمة الطموح
نانسى وهى بتضحك :ما تقول شمبانزى وتخلص ايه ده شحورت البنية يعنى من الاخر بالنسبة لمعيد فى كلية الطب زيك هى انسانة تافهة
هيثم :اه بصراحة
نانسى :مش مهم انت المهم صاحبك شايفها ازاى
هيثم :شايفها زيى هو كان دايما بيقول كده عنها
نانسى :انت شوفتها
هيثم :اه هى قريبته وطالبة فى الجامعة اللى انا هو ومعيدين فيها
نانسى :ما اكيد صاحبك معيد اومال يعنى هتصاحب واحد بتاع كبدة المهم مشكلة صاحبك انه بقى بيحبها وبطل يشوفها تافهة ومش عارف يقولها
هيثم :لا هو لسه شايفها تافهة ومش عايز يقولها هو عايز يبطل يحبها
نانسى :لانها متستاهلش حبه هو شايف كده طب هى ايه
هيثم :يعنى ايه هى ايه
نانسى :بتحبه يعنى
هيثم :لا هى موقعاه فيها وهى ولا على بالها بتمارس نشاطات حياتها بشكل طبيعى ولا هو فى دماغها
نانسى :بتمارس نشاطات حياتها بشكل طبيعى انت قلبت على مذيع النشرة الجوية كده ليه المهم يعنى صاحبك بيموت فيها وهى مش معبراه
هيثم :مش بيموت فيها ولا حاجة هو بس بيحبها
نانسى :يعنى ايه بيحبها قصدى يعنى عرف منين انه بقى بيحبها
هيثم :وجودها لسه بيضايقه وتصرفاتها لسه هبلة فى نظره بس لو مشفهاش بيبقى مضايق وبتوحشه وبيبقى عايز يشوفها كمان..
نانسى :كمان ايه سكت ليه
هيثم :طول الوقت حاسس انه عايز يمسك ايديها بيراهق المغفل دلوقتى بعد ما بقى عنده تسعة وعشرين سنة الا ما عملها لما كان مراهق بجد بيعوض دلوقتى حضرته
نانسى :مين قالك ان دى مراهقة دى ممكن تكون طريقته فى الحب بس لانه محبش قبل كده مكنش يعرف انها طريقته
طريقته فى الحب حلوة يمكن عايز يمسك ايدها علشان يتاكد من وجودها ويتاكد انها معاه ومش هتبعد
هيثم :ياه كل ده هيحسه لما يمسك ايديها
نانسى :مدام مجربتش يبقى متتريقش
هيثم :مجربتش ايه الحب ولا انى امسك ايد بنت
نانسى :الاتنين
هيثم :وعرفتى منين انى مجربتش الاتنين
نانسى :وانت فاضلهم ده انا بيتهيألى انك مولود بالكتاب فى ايدك يا دكتور
طيب هو صاحبك ناوى يعمل ايه
هيثم :هو مش عارف تفتكرى الاحسن يخليها تتغير
نانسى :لا ده مش حل للصراع اللى جواه
هيثم :صراع
نانسى :اه صراع صاحبك بيحب واحدة مش عايز اقول هو بيحتقرها بس على الاقل مبيحترمهاش شايفها انسانة تافهة هيفضل مضايق من تصرفاتها ومش راضى عن حياته معاها ومش من حقه يغيرها ولا اصلا هى هتتغير
قريت بوست على الفيس من فترة كان مكتوب فيه لو عاوز جوافة اشترى جوافة متشتريش مانجة وتقولها خليكى جوافة
بمعنى صاحبك مش عاوزها يبقى يشوف واحدة مناسبة ليه يحبها بقى مش ياخد البت ومفكر انها قماشة هيفصلها على مزاجه
هى مش هتتغير
هيثم :يمكن تغير تصرفاتها
نانسى :لو جبت المانجة قطعتها وعملتها عصير هيطلعلك ايه
هيثم :عصير مانجة طبعا
نانسى :بالظبط عصير مانجة مش عصير جوافة حتى لو المانجة شكلها اختلف وبقت عصير برضه هتفضل مانجة قلبها مانجة ودى مشكلة صاحبك معاها مشكلته اللى مش هتتحل لانها مش هتتغير
هيثم :طيب يعمل ايه
نانسى :هو مش بيحبها اللى بيحب حد مبيعش فى صراع كده هو بس معجب بيها او مشدودلها الحل بقى انه يشوف واحدة من وجهة نظره مناسبة وتستاهل حبه ويهتم بيها ويشغل عقله بيها يشوف جوافة يركز معاها فينسي المانجة
هيثم :وصراعه هينتهى
نانسى :هو لازم يختار انا كنت فى صراع زيه كده
والاختيار كان صعب بس فى الاخر اختارت ودافعت عن اختيارى
لما سيبت كلية صيدلة وحولت لاعلام واقنعت بابا وماما بالعافية وجيت قعدت معاكم انا كنت فى صراع انى اسيب كلية اهلى فرحانين بيها ومستقبلها كويس واضيع سنة من عمرى وابدء فى كلية تانية وابعد عن اهلى بس نهيت صراعى واختارت احول وحولت
هيثم :هو انتى حولتى بمزاجك انا فكرتك شلتى السنة
نانسى :انت ليه بتحكم من غير ما تسال كده
مشلتش السنة لا عديت صافى بس كنت جايبة فى مادة واحدة جيد جدا ومادتين جيد والباقى كله مقبول انا كنت بحارب فى الكلية مكنش المفروض ادخلها لانى مبحبش الكيميا وعلشان كده حولت لانى كنت حاسة انى مش فى مكانى
وده نفس اللى هيحسه صاحبك معاها هيحس انه مش فى مكانه وانه مش مرتاح وفى الاخر اكيد هينهى صراعه ويسيبها
كمان فى حاجة انت وصاحبك ناسينها
هيثم :حاجة ايه دى
نانسى :انها مبتحبش صاحبك ومش شايفاه اصلا وانها حتى لو حبته مش هيبقي سهل تتغير خصوصا لو هى اصلا مش عايزة تتغير ولا مقتنعة انها غلط ويا سلام بقي لو تكون زى ما صاحبك شايفها تافهة هى شايفاه قفل يا نهار صراع متبادل عايشين فيه هما الاتنين
هيثم :والحل
نانسى :زى ما قولتلك صاحبك يسيب المانجة فى حالها لان المانجة عمرها ما هتبقي جوافة مهما عمل ويروح يشوف جوافة يحبها بقى
مرام :مانجة ايه وجوافة ايه
ميار :سوق الفاكهة اللى فتحتيه ده يا حاجة نانسى
نانسى :لا متاخدوش فى بالكم تيجو ناكل
ميار :نركب الشلال الاول
مرام :ايوه عايزه اتغرق
نانسى :ماشى موافقة طبعا
ميار :هتركب معانا يا ابيه انت مركبتش ولا لعبة من ساعة ما جينا
هيثم :لا يا حبيبتى انا مبحبش الملاهى انا جاى علشانكم اركبو انتو واتبسطو
مرام :يبقي يلا علشان الطابور طويل خلونا نلحق نركب
نانسى :هيا بنا يا رجال
