ود :مالك يا بت انس مضايقك
جميلة :لا
ود :متخانقين زعلانين طيب
جميلة :برضه لا
ود :مش معقول اتغرغر بيكى سألك انتى لابسة ايه ونسى ان بنات الناس مش لعبة وعنده اخت ومخافش يتردله فيها
جميلة :اخوكى كاتب كتابه عليا يا برج الجاموسة فمش هتبقى محاولة تحرش يعنى لو سألنى السؤال ده
ود وهى بتضحك :اه صحيح ده بقى جوزك وهو يعنى لو سألك هتجاوبيه
جميلة وهى بتضحك :الصراحة لا مش علشان هتكسف وهتخض علشان هيبقى شكلى زى الزفت وانا بقوله انى لابسه تيشرت من بتوع زياد اخويا على بنطلون بيجاما بتاعتى جاكيتها ضايع من سنتين ولا لابسة اكتر بيجاما بحبها عندى اللى ماما جبتهالى وانا فى تانية ثانوى دى
ود وهى بتضحك :عارفاها البيجاما اللبنى اللى عليها قطة كيتى يا بنت المحظوظة ياللى وزنك مزادش اوى من واحنا فى ثانوى انما انا مبعرفنيش لما ببص فى صورى القديمة اصلا ده انا اتحولت مش كبرت اللى هو قمة ليه يا زمان مسبتناش ابرياء بجد
جميلة وهى بتضحك :انتى احلويتى ملامحك بانت اكتر وخدودك مخلياكى قمر
ود وهى بتضحك :ايوه كده طبليلى انا خلاص بقيت عمتك احلى حاجة انك هتتجوزى اخويا مستنية على نار تيجى تعيشى معانا فى نفس البيت
جميلة :ولو دق بابك ابن الحلال هتبيعينى فى دقيقة
ود وهى بتضحك :كتير دقيقة هبيعك فى ثانية بس هو يجى ابو حصان مكسح ده والله انا حسا انه الحصان اتسرق منه وهو يا كبد امه جايلى مشى
جميلة وهى بتضحك :اتقلى تاخدى حاجة نضيفة يا ود
ود وهى بتضحك :اكتر من كده تقل ده انا اكبر منك بتلت شهور وانتى اتخطبتى واتكتب كتابك كمان قبلى وانا حتى متخطبتش مشوفتش شكل الدبلة فى ايدى ايه هيبقى حلو ولا وحش
جميلة وهى بتضحك :بسيطة يا قلبى ابقى جربى تلبسى دبلتى
ود :لا يا ستى انا عايزة دبلة تبقى بتاعتى لوحدى على الله يجى هو ودبلته بقى بدل ما انا حسا مشاعرى حمضت وقلبى باظ من انعدام الاستخدام
جميلة وهى بتضحك :ليه بس ما انتى بتحبينا
ود وهى بتضحك :مين قالك انا متحملاكم غصب عنى بعاملكم شفقة واحسان يا بنتى
جميلة :بقى كده
ود :الصراحة لا بحبكم بس هو هيبقى حاجة تانية هيبقى رفيق الدرب وانيس الروح وفرحة القلب وكل الحاجات الحلوة دى
جميلة :وعملالنا فيها عشر رجالة فى بعض ليه ما انتى بتعرفى تبقى رومانسية اهو
ود وهى بتضحك :كلابى كده المهم فكيتى وضحكتى قوليلى بقى مالك فيكى ايه
جميلة :انا خايفة يا ود الفرح بيقرب وانا خايفة
ود :انتى عارفة ان انس بيحبك وانه طيب ومبيحبش يزعل حد فمبالك بيكى وهو روحه فيكى من واحنا عيال
جميلة :انس ده كل الحلو اللى فى حياتى مش بس ابن خالتى ولا خطيبى او جوزى انس حاجات كتير اوى مقدرش اوصفها صاحبى وحبيبى وسندى
ود :هيييييييييييح بقى وايه كمان حسبى الله فى اللى متأخر عليا وسايبنى سينجل كل ده اما يجى بس ده انا هطلع على جتته البلا الازرق والاخضر كمان
جميلة وهى بتضحك :طب صفى النية خليه يجى
ود :ده شكله مستنى سنانى تقع وشعرى يبيض علشان يجى يشلنى فى اخر ايامى المهم متوهيش وقولى خايفة من ايه لو مش من انس
جميلة :خايفة من نفسى جواز وبيت وزوج وعيال مسئولية خايفة مكنش قدها خايفة افشل
ود :الجواز مش حاجة سهلة بس وهو ايه فى حياتنا سهل الثانوية كانت صعبة وعديناها الكلية كانت صعبة وعديناها والشغل هيكون صعب وهنعديه كل حاجة فى الدنيا مسئولية وخصوصا الحب مسئولية كبيرة بس انتى قد المسئولية دى وبعدين انتى وانس هتبقو شركا وهتشيلو المسئولية سوا
جميلة :عارفة كل الكلام ده بس برضه خايفة...ايه ده انس بيرن عليا انا هقفل علشان ارد عليه سلام
ود وهى بتضحك :طيب ادينى فرصة اوافق او ارفض المجنونة قفلت السكة قبل ما اقولها سلام حتى علشان انس وتقولى خايفة نتجوز قال دى هيجرالها حاجة لو ما اتجوزوش اساسا
