عايزة فى غضبك غيرتك خوفك ضيقك اعرفك
علشان عقلى يستوعبك وقلبى يقدر ينصفك
بلاش اخليك جنب نجوم السما عالى
وأفعالك فى نظرى بالارض تخسفك
ضغطت دعاء نشر يا ترى هيفهم ان الكلام ليه
اكيد هيفهم الكلام واضح جدا انى اقصده بالكلام
تليفونها رن
منى :يبنتى حرام عليكى كفاية تلقيح عليه انتى اللي غلطانة وانتى اللي بتلحقى الاتنين
دعاء :مين قالك ان الكلام ليه
منى :دعاء
دعاء :تمام الكلام فعلا ليه شفتيه يعنى عبرنى امبارح ولا النهاردة
منى : اه صحيح يخربيت جنانك ايه اللي كنتى كتباه امبارح ده
دعاء :قصدك على
كل حاجة حواليا ناقصة ورخمة
وانا مش عارفة هي كده فعلا ولا علشان
انت مش موجود
النوم زى الصحيان امبارح شبه بكرة
فى بعدك روحى مخنوقة وتايهة وقلبى
رافض يكون مبسوط
انت ازاى عايش فى بعده كده ؟!!
ليه نصيبى منك نصيب عصافير ونصيبك
منى نصيب اسود
لا عادى حاجة جت فى دماغى فكتبها
منى :دعاااااااء
دعاء :كنت متنيلة متضايقة انو مبيكلمنيش ووحشنى فكتبتها استريحتى كده
منى :اه استريحت وبعدين لما انتى بعده بيعمل فيكى كده بتتخانقى معاه ومزهقاه ومزهقانى انا شخصيا ليه
دعاء : عمر مبيقدرنيش يا منى وبيهون عليه زعلى
عارفة امبارح حتى بعد مكتبت الكلام ده وواثقة انه قراه برضه معلقش ولا اتصل صالحنى
خلانى كتبت اللي كتبته النهاردة استفزه يمكن يكلمنى
وبرضه مكلمنيش
حياته بتمشي من غيرى عادى ولا بفرق معاه
منى :ده مش حقيقي يا دعاء عمر بيحبك وكتير اوى كان بيعديلك ويصالحك حتى لو انتى اللي غلطانة
بس انتى سوقتى فيها وزودتيها جامد
خلى بالك كتر الخصام بيعلم الجفا عمر كده هيتعود على غيابك ومش هتفرقى معاه بجد
دعاء :المرة دى هو الي غلط
ده متضايق ان رامى ابن خالتى عندى في الاصدقاء وبيعلقلي على بوستات ومصر انى اعمله بلوك
منى :يا سلام وكابتن رامى ده مش هو السبب انه عمر يخلي خطوبتكم كتب كتاب لانه كان مخلى امه اللي هي خالتك تزن علي دماغ والدتك انها تفسخ خطوبتكم ورامى اولي بيكى وهيحافظ عليكى اكتر من الغريب
ومش مراعى انه لا يخطب احدكم علي خطبة اخيه
ومش بس كده لا كمان كان دايما يقولك انك تستاهلى حد احسن من عمر بكتير وطبعا قصده نفسه انه الحد الاحسن ده هو نفسه بسلامته مفكر نفسه رئيس مراجيح مولد النبى
وهو برضه الوحيد اللي محضرش خطوبتكم واللي تعامله مع عمر ناشف ورخم زيه الكائن المغرور عدو نفسه ده
دعاء:هههههه حرام عليكى يبنتى شردتى الواد
منى :مش محتاجة هو قايم بالواجب وزيادة افعاله تتحدث عنه بصراحة
طيب مش الكابتن رامى ده معلقلك علي التلقيح اللي انتى كتباه ده وبيقولك
ايوه بقي اضررررررب يا دعاء ادى جامد ومترحميش
دعاء :عادى يعنى بيهزر
منى :لا مش بيهزر اللزج ابن خالتك ده مش بيهزر
ده ييصطاد في الميا العكرة وبيشعللها
ومش مراعي انك خلاص بقيتى مكتوب كتابك علي عمر وكلها شهرين تلاتة وتتجوزو
عمر عنده حق وعداه العيب كفاية انه استحمل الحجج الهبلة الي انتى بتقوليها دى كتير انما ابن خالتك زودها وزودها جامد كمان واصلا كان لازم سيادتك اللي تاخدى موقف ومن غير ما عمر يطلب منك
دعاء :كده خالتو هتزعل ورامى كمان
منى :ميزعل رامى ميزعل يعنى لو رامى مزعلش امال مين اللي يستاهل يزعل في الدنيا
وبالنسبة لخالتك فلو زعلت من وضع هي متقبلوش علي دكر البط ابنها ده لو كان مكان عمر
يبقي زعلها مش مهم يا دعاء
عمر بقي جوزك يعنى لازم تراعى شعوره قبل اي حد خصوصا لما يكون غيره ده فعلا غلطان وبيستعبط
دعاء :خلاص انا هفكر في كلامك وهشوف ممكن اعمل ايه مع السلامة هكلمك بعدين
منى :تمام هستنى اتصالك مع السلامة
دعاء خرجت من اوضتها راحت لوالدها الصالة
دعاء :ممكن اسال حضرتك سؤال
عادل :اسالي يا دعاء
دعاء :هو ليه عمر مبيعملش معايا زى ما حضرتك بتعمل مع ماما
عادل :وضحى قصدك
دعاء:يعنى مثلا حضرتك وماما مهما اختلفتو عمركم مفضلتم ولو نص يوم حتى مبتكلموش بعض
بتخانقو بس مجرد ما تخرج وترجع حضرتك بتكلمها كان مفيش حاجة حصلت وهى بتصفالك
عادل :امك هي السبب
هي اللى عودتنى مقدرش علي زعلها ومستحملش انها تكون مبتكلمنيش
في اول جوازنا كنا زى اي زوجين بنتخانق وخدنا وقت علي ما عرفنا طبع بعض
امك بقي لما كنت انا اتخانق وازعق هى بتسمعنى بس ولما اخلص تقولى متزعلش نفسك مش هعمل كده تانى
ولما اهدى خالص تفهمنى كان قصدها ايه وانا فهمته غلط توضحلي بهدوء تعاتبنى بذكاء يخلينى اتكسف من نفسي واعرف قد ايه هي كتير عليا
امك بتهتم بكل تفاصيل حياتى حتى الجرنال بتقراه معايا فانا مقدرش اتخيل يومى من غيرها ممكن يبقي عامل ازاى
بتشترى خاطرى دايما وجات علي نفسها كتير علشان راحتى لحد ما بقيت مقدرش على زعلها
كمان امك عمرها معملت زيك كده وراحت قالت لجدك حاجة وحشة عنى او حاجة متضايقاها بالعكس جدك مكنش بيعرف غير اللي يطمنه علي بنته وهي فى بيتى
وبالتالي انا كمان بقيت مبعرفش ستك حاجة عن امك غير اللي يخليها تحبها لانها شايلانى في عينيها
انا وامك مسيرنا نهدى وننسي اللي كان مضايقنا من بعض انما اهالينا مش هينسو
امك فهمت ده وفهمتهولي بافعالها فبقيت انا كمان اعمله زيها
فقبل متسالينى ليه عمر معاكى مش زىى مع امك
حاولتى انتى تعملي معاه زى ما امك عملت معايا
قدمتيله في الاول اللي انتى مستنياه منه
فكرتى فيه زى ما فكرتى في نفسك كده يا دعاء
دعاء بحرج :بصراحة لا يا بابا
حضرتك معاك حق قبل ما اتمنى ان عمر يكون زي حضرتك
المفروض اكونله انا زى ماما بالنسبالك الاول
بعد اذنك
عادل:اتفضلي ربنا يصلح حالك يا رب يبنتى
دخلت اوضتى وفضلت افكر انا عملت علشان عمر ايه
هو اتقدملي بدل المرة اتنين
اول مرة وانا في الجامعة لما بابا قاله انى مش هتخطب غير لما اتخرج استنى واتقدم بعد ما اتخرجت باسبوع واحد
ساب شغله اللي كان بيحبه واشتغل في القطاع الخاص علشان يقدر يوفرلي حياة احسن
جابلي موبايل جديد مجرد معرف ان موبايلي وقع وهاخده اشوف حد يصلحه
بيسمع كلامى باهتمام حتى لو كان تافه بيقولى مدام يهمك يبقي مهم بالنسبالي
منى عندها حق عدالي كتير وصالحنى كتير حتى لو كنت انا الغلطانة
حتى موضوع رامى ده ناقشنى كتير في حكاية انى اقلل تعامل معاه وانا اللي وصلته لمرحلة انها تبقي خناقة وانه ياخد موقف
مسكت موبايلى مسحت البوست اللي كنت منزلاه وكتبت واحد جديد وعملت لعمر فيه اشارة
