عمار :السلام عليكم
المحور كان واقف واقفة سودا النهاردة كنت حاسس انى هكمل بقية حياتى محشور هناك فى الميكروباص
وقاعدة جنبى ست معاها سمك ريحة الزفارة كانت هتموتنى
امتى بقى ربنا يتوب عليا من الهم ده واجيب عربية ولو حتى مستعملة
انتى مالك قاعدة كده ليه
لا استنى قبل ما تجاوبى وانا عارف الإجابة هتطول كالعادة
انا هاخد دش سريع كده علشان حاسس ريحة السمك مسكت فيا
على ما تحطى الغدا لحسن هموت من الجوع
نوران روحتى فين نوراااان
نوران :انا كلمت شيماء الدسوقى النهاردة
عمار :طيب ممكن تحكيلى عن مكالمتك دى واحنا بناكل هموت من الجوع يا نوران
نوران :هو انت امتى هتهتم باللى بقوله ومش هتفه منه ومنى
عمار :بقيت بتفه منك ومن كلامك علشان عايز اكل لقمة
خلاص يا نوران ولا تزعلى نفسك قبل ما اكل احكيلى حصل ايه فى مكالمتك مع شيماء
نوران :انت عارف انها اتطلقت من حسين
عمار :لا معرفش بقالى كتير معرفش عنهم حاجة
نوران :اتطلقو علشان خانها
خانها قبل ما يكملو ست شهور جواز تخيل
عمار :متخيل عادى
نوران :ليه بقى ان شاء الله متخيل عادى
ايه مشكلة شيماء علشان يخونها فى اول جوازهم كده
عمار :حسين كان بيخونها من وهما مرتبطين فى الجامعة وبعد ما اتخطبو برضه كان بيخونها
متوقعة انه هيعمل ايه بعد الجواز هيصلى الفجر حاضر فى المسجد ما اكيد هيخونها
نوران :وليه ميقدرش حبها ليه وتمسكها بيه السنين دى كلها
عمار :علشان نمرود عادى وعلشان عينه زايغة
وهى كانت عارفة وقبلت
نوران :كانت مفكرة انها هتقدر تغيره
عمار :طبعه اللى عايش بيه سنين هتيجى هى تغيره فى شهور ده ايه السذاجة دى
نوران :يا سلام واشمعنا انتم بتغيرونا
ولا هو حلال ليكم وحرام لينا
عمار :مين اللى بيغير مين
بقى احنا بنغيركم ده فين ده ان شاء الله
لا يا حبيبتى محدش فينا بيغير حد لا احنا بنغيركم ولا انتم بتغيرونا
واللى هتتجوز واحد تعمل حسابها انها هتعيش مع عيوبه قبل ما تعيش مع مميزاته
فتصحصح كده لنفسها وتشوف الكلام على ايه
انما بقى هتفتكر نفسها متجوزة عيل هتربيه على مزاجها
وجو I can fix him
وانا شايفه فيه حاجة حلوة هو مش شايفها فى نفسه ده مبيأكلش عيش وفى الأخر هتروح تعيط فى محكمة الأسرة
واهى شيماء اهيه اكبر مثال
حسين كان زير نساء سينجل ولما اتجوز بقى زير نساء متجوز
محدش بيغير حد اسمعى منى
نوران :بس هو مكنش المفروض يخونها
عمار :وهى مكنش المفروض تتجوز واحد عينه زايغة
احنا مش كلنا حظرناها وقولنالها بلاش هى اللى قالت مقدرش اعيش من غيره
وانتم متعرفوهوش زيى وانا شايفة اللى انتم مش شايفينه
اديها عرفت بنفسها ان هى اللى مكنتش شايفة الحقيقة اللى كلنا شايفينها
واديها هتعيش من غيره بس بعد ما اتطلقت
مش كانت سابته من زمان احسن
يلا ربنا يعوضها بالأحسن منه
المهم انتى عاملة غدا ايه النهاردة
نوران :سيبك من الأكل وركز معايا فى موضوع شيماء وحسين
عمار :عايزانا نصالحهم على بعض ولا ايه
لا شيماء خدت القرار الصح لما اتطلقت منه
يا رب انتى كمان تاخدى القرار الصح وتحطيلى اكل انا جعان يا نوران
نوران :حسين خان شيماء مع انه كان بيقول انه بيحبها
ايش ضمنى انك متخونيش
انت زيك زيه راجل وملكش امان
عمار :يا الله يا ولى الصابرين
انا مليش فى الحرام يا نوران
انا حياتى داخلة فى حيط لوحدها هروح اغضب ربنا كمان ليه هو انا ناقص لا اعوذ بالله من غضب الله ربنا يبعدنى عن الحرام
نوران :مش لازم تعمل كده فى الحرام ممكن تكون متجوز عليا مثلا
عمار :منين لا بجد منين
ده انا عامل جمعية علشان فلوس المستشفى لما تولدى
علشان اولدك عامل جمعية علشان ماخدش فلوس من اهلى ولا من اهلك
ده انا معنديش رفاهية انى اطلب دليفرى علشان اكل بدل ما انتى مجوعانى كده
فاتجوز تانى ازاى ومنين
نوران :يعنى هو ده بس السبب اللى مانعك انك معكش فلوس يعنى لو كان معاك فلوس كنت اتجوزت عليا عادى
تلاقيك مستنى لما يبقى معاك فلوس علشان تروح تتجوز عليا
عمار :لا يا حبيبتى انا من بعد ما اتجوزتك ماتت فى عينى كل النساء انتى كرهتينى فى الصنف كله والله العظيم
نوران :نعم
عمار :ما عدا انتى طبعا
انا مبحبش فى جنس حوا كله غير امى واخواتى البنات وانتى بس
ما تحطيلى اكل بقى
نوران :اه قول كده بقى انت متجوزنى علشان احطلك تاكل
عمار :لا علشان مغفل
نوران :نعم
عمار:بهزر بهزر
طبعا يا حبيبة قلبى متجوزك علشان بحبك
فين بقى المشكلة لما تحطى لعمار حبيبك اللى طلعان عين اهله فى الشغل ياكل
يا نوران هو انتى كل ما تعرفى عن حد مصيبة تتهمينى انى عملت كده او بفكر اعمل كده او هفكر اعمل كده
دليلة بنت خالتك جوزها بعد عشر سنين جواز يسيبها هى وولادهم علشان مش قد المسؤولية
تقوليلى انت ممكن تعمل زيه وتسيبنى انا وولادنا علشان مش عايز تشيل المسؤولية
ما انا لو مش عايز اشيلها اتجوزك واخلف منك ليه مش فاهم
هو انتى جبرانى اتجوزك ما انا اتنيلت اتجوزتك بمزاجى
واحدة زميلتك فى الشغل جوزها يقولها لو مخسيتيش هطلقك
تيجى تقوليلى هو انا لو فى يوم طخنت هتطلقنى
واطلقك ليه ما اشجعك تخسى وخلاص انما ليه طلاق وخراب بيت طلع عينى ودفعت دم قلبى علشان ابنيه
استاذ رشدى جارنا يسيب مراته علشان واحدة اصغر من بناته
تيجى تقوليلى هو احنا لما نكبر ممكن تعمل زيه
اعمل زيه ليه يعنى ابقى فى اواخر ايامى بدل ما اطلع عمرة ولا اشارك فى بنا جامع ولا مدرسة
اروح اتجوز عيلة اصغر من عيالى ايه قلة القيمة دى
وبعدين ليه راعبة نفسك كده ما ممكن اموت صغير ومكبرش زى استاذ رشدى
ليه بتشوفى الوحش اللى حوالينا وبتخافى اعمله فيكى
نوران :انا مش مطمنالك وحاسة انك هيجى يوم وتخونى
عمار :وليه بس النظرة التشاؤمية للمستقبل دى يا حبيبتى
متخافيش انا مش هتجوز تانى فى المستقبل
انا لو عليا مكنتش اتجوزت اصلا فى الماضى بس قدر الله وما شاء فعل
نوران :شوفت اديك طلعت مش بتاع جواز
عمار :نوران احنا متجوزين وانتى حامل
عايزة ايه اكتر من كده يثبتلك انى بتاع جواز
انا كده عملت كل حاجة مفيش حاجة تانية اعملها
نوران :ما هى اكيد مش صدفة انى اكلم شيماء النهاردة علشان جت على بالى الاقيها اتطلقت من حسين
عمار :هى يعنى اتطلقت من حسين فهمى ما فى داهية
دى فاقت متأخر اصلا
نوران :لا ده مش عادى دى علامة
عمار :لا ده حظى الاسود انا عارفه
نوران من غير لف ولا دوران انتى معملتيش غدا وعلشان كده بتتوهى بموضوع شيماء وحسين ده صح
مش مشكلة اقلى بطاطس واعمليلى بيضتين بسمنة وافتحى علبة تونة
نوران :انت همك على بطنك وبس
مش فارق معاك المصيبة اللى شيماء فيها
عمار :وانا مالى هو انا اللى قولتلها تتجوز واحد عينه زايغة
شيماء اختارت غلط واديها دفعت تمن غلطها
ربنا يهون عليها وكل حاجة
بس انا مال امى انا جعان خلصينى وحطيلى لقمة اطفحها دى مش عيشة دى
نوران وهى بتعيط :انت بتتعصب عليا يا عمار شوفت بقى ان فيك حاجة متغيرة انا كنت حاسة لحقت تخليك مش طايقلى كلمة
عمار :لا حول ولا قوة الا بالله
يا نوران استهدى بالله ومتعيطيش الدكتورة قالت الحزن والنكد غلط عليكى وانتى حامل
هى مين دى بس اللى لحقت وملحقتش
والله العظيم انا مفيش فى حياتى غيرك
نوران وهى بتتشحتف :يعنى...يعنى انت لسه بتحبنى انا وبس
عمار :وانا ايه يجبرنى اتحمل زفت trust issues وهرمونات الحمل اللى ممرمطاكى وممرمطانى معاكى دى غير انى بحبك
نوران :يعنى انت مش هتعمل فيا زى ما حسين عمل فى شيماء
عمار :الله يحرقه على القرف اللى انا فيه بسببه ده
لا يا حبيبتى مش هعمل زيه علشان لا انا زيه ولا انتى زى شيماء
شيماء اختارت غلط انما انتى واعية وعاقلة واختارتى صح
وبعدين حد يبقى معاه القمر ده ويخونه برده
روح قلبى اللى معاه الملكة لا تغريه الجوارى اه والله لا تغريه الجوارى
نوران بسعادة :ايوه صح انا مش زى شيماء
انا متخانش ومالية عينك ومالية عليك الدنيا
عمار :لو تملى بطنى وتحطيلى اكل هتبقى كفيتى ووفيتى وكتر خيرك والله
نوران :بس برضه لا انتم صنف خاين اصلا فى كل وقت وكل مكان
دى شاكيرا اللى هى شاكيرا اتخانت والأميرة ديانا القمر اتخانت
واسراء بنت طنط عنايات جارتنا جوزها خانها برضه وحسين اهو خان شيماء
عمار :الله يخربيتك ويخرب البيوت اللى جنب بيتك يا حسين
نوران :انت رايح فين وسايبنى
عمار :رايح اتغدا عند امى اهى لا تعرف شيماء ولا حسين ولا شاكيرا ولا الأميرة ديانا
نوران :ماشى
هاتلى طيب معاك حاجة اكلها وانت راجع لحسن انا الحمل تاعبنى ومش قادرة اقف فى المطبخ وموضوع شيماء ده سد نفسى بس على ما ترجع هتكون نفسى اتفتحت ان شاء الله
عمار متنساش تجيبلى حاجة اكلها
عمار هاتلى حاجة اكلها متجوعنيش زى ما جوز فاطمة جارة جيهان بنت خالتى مجوعها يا عمااااار
الدنيا حوالينا مليانة حاجات تخوف
بس مينفعش نركز مع الوحش وبس
الدنيا زى ما فيها الوحش برضه فيها الحلو
والحلو يستاهل اننا نقدره ونديله قيمته ومناخدوش بذنب الوحش اللى فى الدنيا
علشان منحولش الحلو لوحش من كتر ضغطنا عليه واننا مدينالوش قيمته
وعلشان كمان احنا نفسنا منتعقدش من كتر الحاجات الصعبة اللى بتحصل حوالينا ومخوفانا
لازم نفكر نفسنا ان الدنيا فيها الوحش وفيها الحلو
ولو النهاردة قابلنا الوحش بكرة ربنا يعترنا فى الحلو
لازم نعدى الوحش ومنقفش عنده ولا نوقف حياتنا عليه
لأن الدنيا فيها وفيها💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر
