ايمان :تعالى شوفى يا وعد انا وعمتك جبنالك ايه
وعد وهى بتسلم على عمتها :وحشتينى يا عمتو
سحر :وانتى اكتر يا قلب عمتو
ايمان :جبنالك بطاطين وكوفيرتات وفوط
وعد :فوط تانى يا ماما انا بقى عندى ولا مية فوطة هو انا هفتح صالون حلاقة بكل الفوط دى
ايمان :اسكتى انتى هينفعوكى جبنالك كمان شوية بيجامات شتوى خدى جربيهم وفرجينا شكلهم عليكى وعلشان نتأكد من المقاس برضه
وعد :حاضر يا ماما
بعد خمس دقايق
وعد وهى بتدخل عليهم :ايه رايك يا ماما حلو لونها دى
رامى بابتسامة :حلو جدا
سحر :ما شاء الله عليكى يا وعد الحاجات بتحلو وهى عليكى
ايمان :يحرسك ربنا من العين يا حبييتى قمر
بالليل
فى الموبايل
رامى :يعنى مش كفاية جريتى على اوضتك ومخرجتيش تسلمى عليا قبل ما امشى وماما اللى دخلت تسلم عليكى فى اوضتك كمان ارن عليكى خمس مرات ومترديش يا وعد
وعد :انت شايف ان اللى حصل عادى يعنى
رامى :وايه اللى حصل يعنى موقف بالصدفة ومش مقصود
وعد :اللى حصل ده غلط يا رامى ماما كانت المفروض تنبهنى انك جيت مش تسبنى زى الطربشة كده اخرج بالبيجامة وبشعرى كمان
رامى :البيجامة شتوى يعنى كمان مضايقة من ايه اومال لو كنتى مسرحة شعرك كنتى عملتى ايه بقى
وعد :على فكرة هو كده متسرح
رامى :لا متقوليش ده انا بينى لبست بقى اومال وهو مش متسرح بقى بيبقى عامل ازاى زعافة سقف
وعد وهى بتضحك :انت بتهزر يا رامى
رامى :متكبريش الموضوع يا وعد
وعد :الموضوع كبير لوحده ماما مفكرتش تنبنهى وشايفة انه محصلش حاجة ما انت ابن عمتى وخطيبى معتبراك بقيت جوزى خلاص وده مش صح
رامى :نعم يا اختى هو ايه ده اللى مش صح احنا هنتجوز ده بموتك انه ميحصلش
وعد :مش قصدى على جوازنا انا بتكلم عن ان هى وعمتو شايفين ان مش مشكلة انك شوفتنى من غير الحجاب وعلشان كده منبهونيش انى مخرجش من اوضتى كده
فكرونى بواحدة صاحبتى شايفة انه عادى تخرج لواحد متقدملها بشعرها علشان يشوفه بتقولى حقه اذا كانت المنتقبة بتخرج من غير النقاب حاولت افهمها ان دى مش زى دى المنتقبة بتخرج من غير نقاب علشان هو حقه يشوف شكلها علشان لازم يكون مرتضيه لان دى حاجة مهمة انما المحجبة متخرجش من غير حجابها هو مش من حقه يشوف شعرها ده حرام
رامى :واقتنعت بكلامك
وعد :لا فضل اللى فى دماغها فى دماغها هى مش صاحبتى اوى احنا كنا قاعدين فى الجامعة يوميها بنات كتير مع بعض
الفكرة انى اتصدمت من وجهة نظرها البتنجان دى
رامى :موجود للاسف فى دماغ الناس افكار زى دى كتير
وعد :ماما وعمتو النهاردة فكرونى بيها وهما مش شايفين ان فى مشكلة انك شوفتنى كده
رامى :لا دى حاجة ودى حاجة هى مقتنعة ان ده صح وهتخرج كده بمزاجها انما انتى مكنش قصدك
اه صحيح انتى لما شوفتينى غمضتى عينك ليه شكلك كان مسخرة وانتى مغمضاهم كده
وعد :كان عندى امل افتحهم الاقيك مش موجود وانى بيتهيألى الصراحة اتصدمت لما لقيتك وفضلت بتاع دقيقة بستوعب انك موجود وانى المفروض امشى من قدامك
رامى :كنت بطلع البطاطين اللى اشتروها
وعد :قولتلهم يستنو اتخرج وافضى وانزل معاهم بس هما مصرين يتعبو نفسهم وينزلو لوحدهم
رامى :لو استنو لما تتخرجى كده هياخدو وقت اكتر لا خليهم يجيبو اللى يقدرو يجيبوه من غيرك علشان نخلص بسرعة
انا كمان شغال فى الشقة مش عاتق الصنايعية عايزهم يخلصو باسرع وقت تتخرجى تانى يوم نتجوز
وعد :تانى يوم تانى يوم
رامى :ايوه تانى يوم تانى يوم اعترضى بقى علشان اخليه بكرة وتقضى اخر ترم ليكى عندى
وعد وهى بتضحك :هنتجوز فى الشقة وهى على المحارة وتشطيبها مخلصش ومفيهاش عفش
رامى :مش مهم المهم نبقى سوا ولو كده نأجر شقة لحد ما شقتنا تخلص او حتى نقعد مع اهلى الكام شهر دول
وعد :حيلك حيلك انت بتفكر فى حلول علي اساس ايه مفيش جواز غير بعد ما اتخرج واخلص من الكلية
رامى :ما انتى على قلبك مراوح وعادى عندك نستنى انما انا اللى بحبك طول عمرى ونفسى نتجوز امبارح اصلا مش بكرة ولا بعد خمس شهور
وعد :انا مش على قلبى مراوح انا بس مش هعرف ابقى بدرس ومتجوزة ومسئولة عن بيت وزوج فى نفس الوقت ولو انا وافقت بابا مستحيل يوافق بس مش عادى بالنسبالى زى ما انت بتقول ولا حاجة
عارفة انك صبرت كتير واتحملتنى كتير بس خلاص هانت اهيه
رامى :انا اصبر علشانك خمسين سنة مش خمس شهور ومستعد اتحملك العمر كله يا وعد
وعد :كل ما افتكر انى كان ممكن اضيعك من ايدى علشان فكرة هبلة فى دماغى بحس انى عايزة اضربنى بالنار والله
رامى :انتى لما رفضتينى لما اتقدمتلك اول مرة مش كان علشان انا اكبر منك بعشر سنين وشايفانا اخوات
وعد :لا الفكرة انى كنت مفكرة انى المفروض احب من اول نظرة مستنية اللى من اول مرة اشوفه فيها يخطفنى كده ودقات قلبى تزيد بقا وحركات
كنت مفكرة ان لو ده محصلش من اول مرة اشوفه فيها يبقى عمره ما هيحصل عمرى ما هحبه
وعلشان كده رفضتك وقتها لانك كنت طول عمرك قدامى وعمرى ما حسيت كده تجاهك
وانت وقتها قولت لبابا اننا اخوات وده عمره ما هيتغير واننا اهل وانى حقى ارفض وخليت عمتو تتصرف معايا عادى ومتزعلش منى
مع انك كلامك ليا كان عادى بس دايما كنت بشوف فى عينيك عتاب ليا بس عمر لسانك ما عاتبنى
فاكرة ساعة فرح ايمن ابن عمى كنا هنتحرك بالعربيات ومستنين علشان انا كنت لسه بلبس لانى خدت وقت على ما رجعت من الكلية وغيرت هدومى
الكل كان مضايق منى ولما نزلت زعقولى بس انت سكتهم وقولت ان لسه بدرى واحنا كده كده هنروح القاعة نستنا ايمن وعروسته هناك ومفيش اى داعى لضيقهم ده
فضلت طول الطريق بفكر فى كلامك ودفاعك عنى وفضلت طول الفرح افتكر ذكرياتنا سوا واحنا صغيرين ولما كبرنا حرصك على الكلام معايا فرحتك لما جبت مجموع كلية اسنان ودخلتها انت كنت فرحان يمكن اكتر منى انا نفسى
يمكن انت وقتها كنت عمرك ما قولتلى انك بتحبنى بس افعالك كانت بتقولها انا اللى كنت تافهة ومفكرة ان الحب نسمة هوا بنحس بيها اول مرة نشوف فيها شخص معين
رامى :واكتشفتى انه ايه
وعد :اكتشفت ان الحب شجرة بتزرعها وبترويها باهتمامك وحنانك وتفهمك وكل ما سقيتها واهتميت بيها كل ما قويت وكبرت وجذورها تبتت فى الروح والقلب وبقت مبتتهزش مهما مرت بعواصف فى الحياة ده الحب اللى بجد ده الحب اللى اكتشفته على ايدك وبسببك
الحب هو كل حاجة حلوة بتعملها علشانى الحب هو صبرك عليا الحب هو احترامك ليا الحب هو انك بتقبل اعتذارى لما بعتذرلك وانك بتراضينى لما انت تغلط فى حقى
الحب هو المواقف اللى حصلت بنا اللى خلتنى من غير ما احس الاقى شجرة ليك بتتزرع جوا قلبى وروحى شجرة كل يوم بتكبر وتقوى اكتر من اليوم اللى قبله
يالله بقالى كتير بتكلم رغيت كتير صح
رامى :فرحان برغيك كملى انا عايز اسمعك
وعد :حب النظرة الاولى والقلب اللى بيتخطف من اول مرة ده مش حب ده اعجاب او افتتان وممكن جدا يتنسى ويروح لحاله
انما الحب اللى بجد فى العشرة فى الذكريات اللى بنا فى انى شوفتك وانت فى اصعب حالاتك شوفتك وانت متعصب وحزين ومحبط وخايف وشوفتك فى احسن حالاتك وانت فرحان ومرتاح ومطمن ده الحب اللى مبيتنسيش ده الحب اللى بيكون زى شجرة مزروعة فى القلب وجدورها فى الروح وطلوعه من القلب بيكون بطلوع الروح حب زى ده ممكن عمرك كله يخلص وانت بتحاول تطلعه من قلبك ومش عارف لانه زى ما قولتلك جدوره فى روحك متبت فيها
عارف يا رامى انت اولى وانت اخرى زى الدايرة ببدء وبنتهى عندك
رامى :وانتى كل ده واكتر بالنسبالى يا وعد عارفة بحسك حتة منى لما رفضتينى مبقتش عارف اعمل ايه قلبى كان بيموت وعقلى بيقولى حقك الحب مش بالعافية والجواز قبول ورفض ولا عارف اتخيلك مع حد غيرى ولا عارف اتخيل نفسي مع واحدة غيرك انتى كبرتى قدام عينى انا فاكرك فى كل مراحل حياتك
رغم كل الوجع اللى حسيته بسبب رفضك مقدرتش اقسى عليكى قلبى مطاوعنيش وعقلى قالى يمكن عشر سنين فرق كبير بالنسبالك ويمكن مش شايفانى غير اخوكى
وعد :حتى لو كنت اكبر منى بعشرين سنة مش مهم انت تتحب زى ما انت يا رامى
رامى :مصدقتش نفسي لما جيتى ورايا بره القاعة فى فرح ايمن وسألتينى هو لو واحد اتقدم لواحدة ورفضت مش هيتقدم تانى علشان كرامته وكبرياءه صح وانا جاوبتك انه مش علشان كرامته علشان هى هترفض تانى زى ما رفضت اولانى طول ما هو خايف ترفض تانى يبقى مش هيتقدم وانتى قولتيلى عارف يا رامى اوقات بناخد قرارات فى لحظة ونقضى بقية عمرنا ندمانين عليها خصوصا لو مكنش فى ايدينا حاجة نعملها علشان نصلح القرارات الغلط دى انا خدت قرار غبى ونفذته وندمانة عليه بس مفيش فى ايدى حاجة اعملها بس انت فى ايدك ممكن تعملها وتنقذنى من انى اقضى بقية عمرى ندمانة على قرارى
وعد :انت فاكر كلامى بالحرف
رامى :علشان ده احلى كلام سمعته فى حياتى مكنتش مصدق نفسى انك ندمتى وانك عايزانى اتقدم تانى ولولا انى اتقدمت وانتى وافقتى على طول مكنتش صدقت وقولت انى كنت بحلم ولا بيتهيألى
وعد :خوفت يجى يوم واقعد نفس القاعدة دى فى فرحك زى ما يومها كنت قاعدة فى فرح ايمن
الكلام كان صعب اقوله وكنت مكسوفة الصراحة وخايفة انك ميبقاش فارقلك كلامى ده او انه ميكنش كفاية ينسيك انى رفضت بس قررت انى مش هفكر فى كرامتى وشكلى قدامك وانك حتى لو مفرقلكش كلامى ومتقدمتش تانى يبقى انت سمعت منى اللى يعوضك عن رفضى وعدم تقديرى لطلبك وحبك انت تستاهل انى اعمل كده علشانك خصوصا انى رفضت من غير ما اقعد معاك وبعدها احنا متكلمناش عن الموضوع خالص انت كنت بتتصرف كأن مفيش حاجة حصلت معايا ومع بابا مكنش فى غير نظرة العتاب اللى فى عينيك
قولت حتى لو مش هتدينى فرصة تانية على الاقل كلامى يمحى النظرة اللى فى عينيك دى
رامى :كانت مضيقاكى
وعد :كانت بتوجعنى بسببها وبسبب انك مغيرتش معاملتك بالعكس دافعت عنى وقولت انه حقى ارفض
فكرت مين ممكن يعمل كده مين غيرك ممكن يعمل كده
ولقيت ان محدش غيرك ممكن يعمل كده يا رامى لان مفيش منك وقررت انى هتمسك بيك لانك تستاهل
بس عارف بعد كده حبيتك الحب اللى بيجى بالوقت ده الحب اللى بيكون اساسه مواقف كتير ومعرفة قوية وذكريات متتنسيش الحب اللى يخلينى بثق فيك وامشى معاك متغمية ومسألكش واخدنى فين
رامى :مش مصدق انى بسمع منك كل ده
وعد :انا بس مكنتش عارفة اعبرلك عنه ازاى..مبعرفش اعبر عن اللى جوايا يعنى ممكن كلامى وافعالى يبقو حرفيا عكس اللى جوايا متفهمش بقى تخلف ولا سوء تصرف ولا مش فاهمة نفسى اصلا..بس والله انا بحبك وحبك ليا احلى حاجة حصلتلى فى عمرى كله وحياة ربنا انا بحلم بيوم فرحنا ومستنياه ومفيش على قلبى مراوح ولا حاجة
رامى :مصدقك وانا كمان بحبك كمان هى الجملة زعلتك اوى كده خلاص مش هقولها تانى متزعليش
وعد :مش زعلانة انك بتقولها انا زعلانة انى مخلياك حاسس بيها وعلشان كده قررت اتكلم بس مكنتش بعرف ابدء الكلام ازاى واقول ايه فمتكلمتش قبل كده بس متوقعتش اقولك كل ده النهاردة بعد ما كنت مكسوفة منك ومش عارفة ارد عليك اصلا
رامى :مكسوفة منى مش فكرة انه حرام بس
وعد :حرام وانا مكسوفة كمان عارف انا مبقتش بعرف ابصلك فى عينيك عشر ثوانى على بعض
رامى :وده ليه بقى
وعد :دقات قلبى بتزيد وبحس انى مش مجمعة الكلام ومتلغبطة الخطفة اللى كنت مستنيا تحصل فى اول مرة اشوف فيها اللى هحبه بتحصلى معاك فى كل مرة اشوفك فيها من وقت ما حبيتك يا رامى
رامى :هو احنا فرحنا كمان خمس شهور صح
وعد :اه
رامى :هما لازمينك اوى
وعد وهى بتضحك :لازمين خالك كمان انت حاجز قاعة ولا عايز نتجوز من غير فرح ومن غير ما البس فستان ابيض لون قلبك الحلو ده
رامى :هو انتى يا متقوليش كلام حلو خالص لدرجة انى احس انك هتتجوزينى شفقة يا تقولى كلام حلو كتير يخلى قلبى هيقف ومش مصدق انى سامعه منك اصلا معندكيش وسط يعنى
وعد :معنديش غيرك
رامى :هاجى اطلب من خالى نكتب الكتاب دلوقتى لو مبطلتيش تتكلمى بالطريقة دى انتى حرة
وعد :اسكت يعنى
رامى :والله ما عارف كنت مضايق الصراحة من انى حاسس انى مش مهم عندك زى ما انتى مهمة عندى
بس ما هو بكلامك ده الخمس شهور هيعدو عليا بصعوبة اكتر ما هما صعبين وطوال
وعد :خلاص هرجع لقديمه انا بس كنت عايزاك تعرف ان مفيش على قلبى مراوح وتعرف انك غالى عندى جدا
رامى وهو بيضحك :والله يا وعد هو انا اللى محتاج مراوح على قلبى علشان استحمل الخمس شهور دول
وعدو الخمس شهور واتجوزنا انا ورامى وخلفنا سارة ويوسف
بسبب رامى فهمت ان الحب مش من نظرة واحدة بتخطف القلب
الحب نظرات كتير نظرة امتنان وشكر نظرة امان نظرة سعادة نظرة احتياج نظرة غيرة نظرة اشتياق نظرة ثقة نظرة تفهم واحتواء نظرة رضا
النظرات دى كلها واكتر مش بس بتخطف القلب دى بتطمن الروح
الحب مش بيحصل من اول نظرة ده بيبقى اعجاب مجرد بداية الحب اللى بجد بيبقى عن معرفة انت تعرف الشخص ده عارف مميزاته وعيوبه ومتقبلها شوفته وهو فى احسن حالاته وشوفته وهو فى اسوء حالاته وعرفت تتعامل معاه فى حالاته دى عارف عنه الوحش كله والحلو كمان ولسه عايز تبقى معاه
وقتها بس تقدر تقول عن نفسك بتحب الشخص ده غير كده يبقى انت مش بتحبه انت بتحب فكرة فى دماغك عنه صورة راسمهاله فى خيالك وممكن جدا لما تقرب تكتشف انه حرفيا عكس الصورة دى وانك كنت بتحب وهم ومعيش نفسك فيه
الحب مش نظرة واحدة بتخطف القلب الحب معرفة ونظرات كتير متتعدش هو ده الحب اللى بجد💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
