انغام :السلام عليكم ..الو ..رائد
رائد :
انغام :مش هترد يعنى عموما انا متصلة بس علشان اسألك اعمل بسلة على الغدا ولا اعمل بطاطس
رائد :انتى عارفة انى مبحبش البسلة اعملى بطاطس
انغام :خلاص ماشى هعمل بسلة
رائد :انتى متصلة تهزرى يا انغام
انغام :لا انا متصلة بس علشان اقولك انى اسفة متزعلش منى
رائد :بتتاسفى علشان فارق معاكى زعلى ولا علشان غلطانة
انغام :علشان الاتنين يا رائد انا والله يعز عليا زعلك كمان انا مكنش المفروض اخرج من غير ما اقولك ومكنش المفروض لما تلومنى اقولك انك بتتحكم فيا الصح انى استأذنك قبل ما اروح فى اى حتة الصح انك دايما تكون عارف انا فين وانا بعد كده هعمل الصح ده ومش هغلط تانى حقك عليا انا اسفة
رائد :نغومتى الحلوة خلاص محصلش حاجة المهم متكرريهاش تانى
انغام :عمرى ما هكررها تانى ابدا باذن الله
رائد :مضطر اقفل علشان الشغل خلى بالك من نفسك
انغام :وانت كمان
انا رائد عندى تمنية وعشرين سنة وانغام تبقي مراتى متجوزين جديد بقالنا شهرين
متجوزتهاش لانى بحبها اتجوزتها علشان الاهم والاحلى من كده عارفين ايه هو شكلكم مش عارفين ابدءلكم حكايتنا من الاول علشان تعرفو
فى يوم بدايته مكتتش حلوة خالص بس نهايته كانت حلوة نهايته كانت احلى حاجة حصلتلى فى حياتى
بداية اليوم كانت انى اتخصملى فى شغلى لانى كالعادة روحت متاخر مبقيتش اروح الشغل في ميعادى غير من بعد ما اتجوزت انغام لانها بتصحينى وبتزن اكتر من المنبه لحد ما اصحا
المهم اتخصملى فى الشغل ودى حاجة عادية مش كبيرة الحاجة الكبيرة بقى هى انى اتخانقت مع واحد صاحبى او بمعنى ادق خسرت واحد صاحبي او لا مخسرتوش كبيرة عليه الكلمة وهو ميستحقهاش هو اللي خسرنى ويا ريته خسرنى علشان حاجة تستاهل ده خسرنى علشان بنت ..ولا بلاش اشتمها المهم اللى كان صاحبي جه يتهمنى انى بحاول اشقط منه الحتة بتاعته هى فهمته كده فهمته انى حاولت اخدها منه وهى طبعا بتعشقه ومش عايزة من الدنيا غيره عملتلى فيها خضرة الشريفة وهى اساسا قالتله كده لانى كنت شوفتها وهى قاعدة مع واحد تانى غير اللطخ اللى انا كنت مصاحبه خافت اقوله على اللى شفته فلبستنى في الحوار الحمضان ده وانا اصلا مستنضفش ابصلها
بس اللطخ صاحبى صدقها وجه واتخانق معايا ضربته بوكس فى وشه وقولتله ان اللى يصدق واحدة عارفها من ست شهور وهى بتفترى على صاحبه اللى عشرة خمس سنين يبقي لا راجل ولا انا يشرفنى اعرفه وقولتله كمان ان الواطية اللى هو بيحبها مدوراها من وراه وهو مسيره يعرف بنفسه هى قد ايه زبالة
مستنتش اسمع هيقول ايه مهما قال مكنش هيفرق معايا وحتى مكنتش هحاول ابرء نفسي قدامه هو ميستاهلش
بس روحت بيتنا حسيت انى مخنوق فكرت هو ازاى يصدقها ازاى يصدق انى ممكن اعمل كده ده احنا بنا عشرة وعيش وملح ده انا ياما وقفت جمبه خلاص نسي كل ده علشان بنت ويا ريتها تستاهل دى صايعة وزبالة
حسيت انى مش طايق نفسي طلعت السطح قولت هشم هوا بدل ما انا مخنوق كده
كنت حاسس بحاجات كتير غضب كبير وانى عايز اكسر اى حاجة خيبة امل فى اللطخ صاحبي وجع من ذكريات افتكرتها مع بنت كنت بحبها وخانتتى كانت مدوراها هى كمان كنت تايه جوا نفسي ومش قادر احدد انا حاسس بايه بالظبط
انغام كانت فى السطح هى بنت عمى واحنا عايشين فى بيت عيلة مش اول مرة اشوفها واقفة فى السطح لما بتصادف واطلع وهيا فيه بتنزل على طول من غير ما تقولى اذيك حتى احنا علاقتنا ببعض اقل من العادية
والمرة دى كمان كانت هتنزل بس بعد ما عدتنى لقيتها رجعت تانى
انغام :انت كويس
رائد :
انغام :رائد..انت كويس
لما مرديتش كانت هتنزل وانا مش فاهم ليه بس لقتنى بحضنها هى اتخضت وحسيتها اتخشبت لما انا عملت كده وبعدين حاولت تبعدنى عنها
