هالة :ايوه يا منة عمر ابن سيف ابن عمك عندنا ومش راضى ياكل اى حاجة خالص لا راضى ياكل عندنا ولا رضى ياكل فى بيت عمك
منة :طيب ما يمكن الأكل اللى عاملينه مش عاجبه طيب جربتو تسألوه يحب ياكل ايه
هالة :ريقنا نشف معاه مش راضى يقول ياكل ايه ولا راضى ياكل من اللى فى البيت
منة :خلاص يا ماما انا هتصرف كويس انك لحقتينى قبل ما ارجع البيت هو فى شقتنا صح ولا نزل شقة عمى
هالة :لا فى شقتنا
منة :تمام جدا انا هتصرف
بعد ساعة
عمر :على فكرة انا مش هاكل برضه معاكى زى ما مكلتش معاهم
منة وهى بتحط كاتشب على الكريب :ومين قالك انى هقولك كل معايا من الأكل الحلو اللى انا جايباه ده
عمر :هو انتى جايبة ايه
منة :جايبة كريب وسندويتشات كبدة وتومية علشان بحبها ومخلل وكاتشب كتير وجايبة كمان تشيز كيك
عمر :جايبة كل ده ليكى لوحدك
منة وهى بتاكل :اه طعمهم حلو اوى...تحب تجرب...بس تجرب بس انا مبحبش حد ياكل اكلى
عمر :هجرب بس انا اصلا اساسا مش عايز اكل
منة وهى بتضحك :اصلا اساسا ده انت مش عايز تاكل جدا ماشى تجرب ايه الاول
عمر :الكريب علشان مكلتوش قبل كده
منة وهى بتديهوله :ده ازاى ده انا لازم اكله على الاقل مرة فى الاسبوع وفى العادى باكله اربع خمس مرات كل اسبوع
عمر :للدرجة دى طعمه حلو
منة بابتسامة :جرب وانت تعرف
واكل يومها الكريب واكل سندويتش كبدة واكل كل التشيز كيك اللى كنت جايباها لوحده
ومن يومها وحياتى اختلفت او بتعبير أدق كانت بداية ان حياتى تختلف لحد ما خدت شكل انا مكنتش اتخيله ومشيت فى طريق مكنتاش رسماه لنفسى
هو اينعم انا مكنتش راسمة لنفس اى طريق ولا كنت متخيلة شكل حياتى هيبقى ايه فى المستقبل
بس مهما كنت فكرت ولا تصورت ولا حتى شطحت بخيالى مكنتش هتخيل ان سيف ابن عمى يتقدملى
واتقدملى ليه
هل علشان بيحبنى هل علشان انا جميلة جدا وجمالى لا يقاوم هل علشان فى بين بابا وعمى عداوة مش هتنتهى غير بأننا نتجوز هل طمعان فى مرتبى مثلا
الاجابة ولا اى حاجة من دول
سيف اتقدملى علشان انا الوحيدة اللى بعرف اتعامل مع عمر ابنه
بس كده
مش فاهمين حاجة صح
هحكيلكم واحدة واحدة وركزو معايا
من اربع سنين نانسى مرات سيف ماتت
ولا لا استنو ده مش الاول
من حوالى تسع سنين نانسى بنت خال سيف اتطلقت من جوزها معرفش ليه
وبعدها بكام شهر سيف اتجوزها معرفش ليه
نانسى الله يرحمها كانت اكبر منه بخمس ولا سبع سنين مش عارفة
ومطلقة يتجوزها ليه يا ترى علشان فلوس خاله علشان يعيش فى شقة غالية ويركب عربية ويبقى فى مكانة عالية فى شغله
معرفش حقيقى معرفش
المهم يعنى ان سيف اتجوز نانسى وبعد جوازهم بسنتين خال سيف اللى هو ابو نانسى مات وورثته نانسى بنته الوحيدة طبعا هى مكنتش بتفهم فى شغلهم واللى مسكه سيف
وعلى كلام اهلى سيف كبر شغلهم لأن سيف ذكى جدا وخاله علمه كل حاجة اتعلمها اداله كل خبرته فسيف بقى معاه الخبرة والذكاء والحداثة لأنه صغير فى السن وفاهم اكتر السوق اللى اختلف والتكنولوجيا اللى اتطورت
بعد ما خال سيف مات بحوالى سنة ونص خلفو عمر ولما عمر بقى عنده سنة او سنة وشهرين نانسى ماتت
ومن بعدها سيف ركز فى شغله اكتر ما هو مركز وبس كده متجوزش رغم زن عمى ومرات عمى واخواته وكل العيلة عليه
وفجأة كده رأيه اتغير وقرر انه يتقدملى
