حكايات منار

حكاية "اجابة سؤال"

اسيل :مازن قوم مازن كفاية نوم بقي مااااااااااااااااازن
مازن بفزع :ايه اللي حصل مين مات ايه اللي جرا
اسيل وهى بتضحك :قلبك ابيض من اللب الابيض قوم يا حبيبي كفاية نوم الساعة بقت تسعة
مازن :يعنى مش كفاية مصحيانى مخضوض كمان بتقلشي عالصبع اسيل يا عملى 
اسيل :ها عملك ايه بقي
مازن بابتسامة :عملي الابيض عملي البمبى يا حبيبتى
اسيل :اه بحسب حبيبي يا ميزو وانت عارف مصلحتك كده
مازن :يا ستى عارفها بس يرضى مين تصحينى مفزوع كده انتى حرة هتعود وهتستنجدى بيا في حاجة بجد ومش هصدقك ولا هتقلب حتى عالسرير مش بس مش هقوم من النوم
اسيل :حاجة بجد زي مثلا انهيار المبنى او ان المبنى ينهار
لا يا حبيبي انا عارفة قلبك هيحس بيا لو في خطر ومن قبل مستنجد بيك حتى
مازن :وثبتينى كالعادة
ها يا ستى مصحيانى ليه
اسيل :بقالي ساعتين صاحية ومستنياك تصحى
قوم فرجنى علي بلدكم انا مصدقت تجبنا هنا تقوم تقضيهالي نوم
مازن :افرجك علي ايه هي فيها غير زرع انتى مفكرة نفسك في الجونة يا اسيل
اسيل :يا عم انا بحب الزرع قوم فرجنى علي الاراضي ورينى كنت بتلعب فين وانت صغير ورينى المدارس اللي رحتها خدنى في جولة وسط ذكرياتك يا ميزو
مازن وهو بيضحك :حماسك عاجبنى بس يا خوفي تتحبطى من اللي هتشوفيه
تعالي نفطر مع اهلى طيب وبعدين اخدك في جولة الذكريات اللي انتى عايزاها دى
اسيل :موافقة جدا يلا قوم بسرعة
مازن :ما خلاص يا ست المستعجلة اغسل وشي طيب واتوضى واصلي الضحى
انزلى صبحى علي اهلي لحد ما انزل طيب
بعد الفطار
مازن :دى يا ستى ارضنا واللي جنبها دى ارضى عمى
والي بعدها دى ارض ابن عم ابويا
بصي الارض اللي علي مدا شوفك دى كلها تبع عيلتى عيلة رشدان
اسيل :ما شاء الله حلو اوى المنظر يفتح النفس عالحياة والله يعنى يا ظالم سنة وشهرين متجوزين وحارمنى من المنظر الحلو ده
مازن :حارمك يا اوفر وبعدين مش انتى كان عندك كلية وانا مكنتش هسمح تقديرك يقل زى ما وعدت والدك لما كنت بقنعه نتجوز وتقضي اخر سنة ليكى في الكلية عندى
انا كلمتى واحدة ومرجعش فيها خصوصا مع عمى عادل انتى عارفة انا بحبه وبحترمه قد ايه
اسيل :خلاص يا هندسة غلبتنى انا محقوقالك
بس بجد المنظر حلو اوى
مازن :انتى عجبتك القاعدة عالارض وسط البرسيم
قومى طيب افرجك علي بقية البلد
دى يا ستى شجرة التوت بتاعتى ابويا زرعها مخصوص علشانى لما اتولدت احلي توت ممكن تاكلي في حياتك يبقي منها هجيبك في الربيع تاكلي وتدعيلي
ودى مدرستى في ابتدائى واللي بعدها دى مدرستى في اعدادى وثانوى مكنش في بلدنا ثانوى فكنت بروح في مدرسة موجودة في بلد بعدنا
اسيل :بلدكم حلوة بجد وماليانا خير انا حبيت المكان اوى
خلاص ضميته لقايمة الاماكن اللي بحبها في الدنيا
مازن :يبخت بلدنا والله اغير طب ولا اعمل ايه
بالنسبالى بقا ايه ظروفي مضموم لقايمة اللي بتحبيهم ولا متجوزانى شفقة
اسيل بابتسامة :ده انت قايمة لوحدك يا مازن
قايمة كاملة مفيهاش غير اسمك
انت اجابة لأسئلة كتير اوى كانت عندى
اجابة حلوة ومريحة
مازن :هو الكلام حلو جدا وثبتينى كالعادة
بس يعنى ايه اجابة لاسئلة كانت عندك واسئلة ايه اصلا اللى انا جاوبتها
اسيل :بص يا سيدى انا مقتنعة ان الناس اللي في حياتنا بيكونو اجابة لاسئلة عندنا وعلي اساس كده يبيفضلو فى حياتنا ياما مبيكونش ليهم فيها مكان
ماما مثلا اجابة لسؤال هو ممكن حد يحبنى اكتر من نفسه والاجابة طبعا اه ربنا يبارك في عمرها يارب
بابا اجابة لسؤال هو ممكن حد يخاف عليا اكتر من نفسه
والاجابة اكيد بابا مبيخافش على نفسه نص الخوف اللي بيخافه عليا ولا بيهتم بنفسه نص الاهتمام اللي بيهتمه بيا ربنا يخليهولى ومتحرمش منه ابدا
امنية صاحبتى اجابة عن سؤال يا ترى ممكن يكونلى اخت مجبتهاش امى
والاجابة واكتر من اخت كمان والله
مازن :مفيش اجابات وحشة كل الإجابات في حياتك حلوة
اسيل :لا طبعا في كتير اجابات وحشة
سارة صاحبتى مثلا كانت اجابة لسؤال يا ترى ممكن حد يكرهنى في يوم من الايام ويبقي بيعاملنى كويس في وشي وفي ضهرى بيقول عنى كلام زفت
ولانها كانت اجابة وحشة مفضلناش صحاب خرجت من حياتها بهدوء حتى اللوم والعتاب استخسرتهم فيها
سلمى بنت خالتى اجابة لسؤال ممكن حد ميحبنيش ومقدرش اخليه يحبنى
والاجابة كانت اه سلمى مبتحبنيش ومبطقنيش كمان خالتى دايما تقارنها بيا في كل حاجة دراسة اخلاق تعامل مع الناس حتى الشكل بتقارن فيه كأن دى حاجة بايديها وسلمى بقت فعلا مبتحبنيش ويمكن بتكرهنى ومهما حاولت اقرب اللي خالتى زرعته جواها ليه اقوى بكتير من محاولاتى وعلشان كده طول عمرنا بعاد عن بعض
ياسمين جارتنا كانت اجابة لسؤال هو انا ممكن اغير من حد والاجابة اه انا كنت بغير منها لانها عندها اخوات بنات وانا لا
مازن :وسليم خطيبك الاولانى كان اجابة لسؤال ايه
اسيل :مش ناوى تنساه بقي
وعموما هجاوبك يمكن ترتاح
سليم كان اجابة زفت لسؤال هو انا كفاية
والاجابة لا انا مش كفاية لسليم
بدليل انه كان بيبص برا كتييييير
وبيقارنى بقرايبه وزميلاته في الشغل واي بنت عايشة علي كوكب الارض حتى الست والداته كان بيقارنى بيها تخيل
مكنتش كفاية بالنسباله في اى حاجة وعلشان كده فسخت الخطوبة بعد شهر ونص بس
وقبل متسال السؤال اللي شايفاه في عينك
مندمتش لحظة علي قرارى ده سليم كان اجابة غلط هتعب طول عمرى لو اخترتها
وملحقتش احبه ولا اتعلق بيه الفترة اللي اتخطبناها كانت قصيرة وكمان هو ميستاهلش بصراحة
مازن بابتسامة :وانا بقي اجابة لسؤال ايه
اسيل :ياه اجابة اسئلة كتير اوى
ورقة وقلم واكتب معايا يا سيد الكل
اجابة سؤال هو انا اتحب استاهل حد يحبنى ويختارنى ويفضلنى علي كل بنات الدنيا
وسؤال هو انا هفضل وحيدة طول عمرى
وسؤال يا ترى مين ممكن يتقبل عيوبى ومش بس يهتم بمميزاتى
وسؤال هو انا ممكن اتكلم مع حد واحكيله كل حاجة عنى كأنى بكلم نفسي في مراية
وسؤال يا ترى اللي هحبه هيبقي عامل ازاى
وسؤال يا ترى الحب موجود بجد ولا بس في الروايات زى ما الناس بتقول
اسئلة كتير اووووى متتعدش انت بالنسبالى اجابة ليها يا مازن وجودك وصفاتك انت كده كلك علي بعضك اجابة لاسئلة كتير عندى
اجابة صح مية في المية ومش ممكن تكون غلط
اجابة اخترها وانا مغمضة عينا وانا واثقة انها صح وانى مش هندم ولا هخسر لما اختارها
مازن بابتسامة شديدة :هو تقريبا كده انا متجوزك علشان تثبتينى بس يا اسيل
اسيل :والله انا بقول اللي في قلبي واللي بيطلع من القلب بيدخل القلب دوغرى يا ميزو
قلي انت بقي انا بالنسبالك اجابة لسؤال ايه
مازن :امممممم هو سؤال واحد
هو انا ممكن حاجة تحصلي تغير كل حاجة للاحسن
اسيل :لا وضح علشان حسا ان الكلام هيعجبنى
مازن :انا كنت لوحدى يا اسيل قبل ما اعرف مصطفي كنت لوحدى وبعد ما مات رجعت تانى لوحدى
ميغركيش انى اعرف ناس كتير دول منظر عالفاضي
بس مصطفي الله يرحمه كان صاحبي بجد
لما شفتك يوم ما روحت البيت اتطمن علي اهلك
لما رجعتى من الكلية وانتى مش عارفة انى في الصالة
ودخلتى تهزرى مع والدتك ووالدك حسيت نفسي شايف مصطفي قدام عينيا روحه وروحك كانها روح واحدة واتقسمت نصين مع انكم مش تؤام ولا حاجة
انا كنت متردد كتير قبل ما اجى لاهلك فضلت وقت طويل مأجل زيارتى ليهم
كنت خايف ومش عارف هتعامل معاهم ازاي
بس كنت عايزهم يعرفو انى مصطفي مراحش
وانى مكانه في اي حاجة يحتاجوها قررت اعمل اللي مصطفي كان هيعمله لو كان مكانى
بس كنت خايف مقدرش وخايف والدك ووالدتك يتعبو لما يشوفونى بس لقيتهم فرحانين بوجودى لانى من ريحة مصطفي وهو كان بيحكلهم عنى كتير
لقيت نفسي في بيتكم وسط اهلي
وانتى حسستينى ان مصطفي في حياتى ومخرجش منها
لقيت نفسي بزوركم كتير وبضايق لو رحت ملقتكيش
وطبعا مش اخت مصطفي اللي افكر فيها كده وخلاص
اصلا ده مش انا انا عارف ان البيوت ليها حرمتها
بس كمان مصطفي بالنسبالي خط احمر واي حاجة تخصه يبقي تخصنى ومحدش يمسها بسوء
مبالك باخته الوحيدة لما لقيت تفكيرى فيكى زايد
وبينى وبينك مش تفكير بس مشاعرى كمان لقيتها بتتحرك نحيتك بقوة وسرعة غريبة عليا انا مكنتش شخص رومانسي ولا عاطفي خالص في حياتى
بس معاكى وعلشانك بقيت
فقررت اتقدملك احتراما لنفسي وليكى ولاهلك ولمصطفي الله يرحمه
قلت لاهلي ووافقو وخدت من والدك ميعاد وهو قالي هيسالك قبل ما يرد عليا وان بالنسباله هو موافق هو مش هيلاقي احسن منى بس دى حياتك والراى رايك
دعيت كتير اوى توافقي خفت ترفضي مكنتش عارف هعمل ايه لو ده حصل
وانتى وافقتى والحمد لله واتخطبنا بس انا كنت عايز اقرب منك اكتر واعرفك اكتر فطلبت من والدك نكتب كتاب
والحمد لله وافق بس حتى بعد كتب الكتاب
حسيت انى عايزك اقرب عايزك معايا دايما
كل ما اقرب منك اكتر واعرفك اكتر احس انى عايزك اقرب واقرب لحد ما طلبت من والدك نقدم الفرح سنة ومنستناش لما تتخرجى
كنت حاسس ان سنة كتير اوى والدك كان متردد بس انا وعدته ان دراستك مش هتتأثر وهو الحمد لله وافق
بوجودك في حياتى انا مبقتش لوحدى يا اسيل
انتى اجابة لاسئلة انا مسالتهاش لنفسي
هو انا اتحب هو انا استاهل حد يتعب علشانى هو انا ممكن يكونلى نص تانى نص حلو زى ما بيقولو ولا هتجوز جواز تقليدى مفيهوش مشاعر وزيى زى غيرى
انتى كنتى اجابة جميلة للاسئلة دى
انا مسألتهاش لنفسي قبل ما اعرفك بس بعد ما عرفتك سألت نفسي الاسئلة دى ولقيت ان حياتى كانت هتبقي مختلفة كتير عن دلوقتي لو انتى مش فيها
اختلاف وحش اختلاف ممل وكئيب اختلاف معناه انى هفضل وحيد
وجودك في حياتى غير كل حاجة للاحسن غيرنى انا نفسي للاحسن بقيت مرتاح اكتر ومبسوط اكتر بكتير عن زمان
امى دايما كانت بتدعيلي وتقولى ربنا يرزقك باللى تصونك وتريح قلبك
انتى بقا استجابة دعوتها واكتر كمان
انتى مش بس صينانى ومريحة قلبي لا كمان انتى مفرحة قلبي ومطمنة روحى ومونسانى انتى ونسي في دنيتى يا اسيل
انا مستحيل اكون وحيد وانتى في حياتى
حتى وانا في الشغل انتى موجودة بمكالماتك ورسايلك موجودة في تفكيرى طول الوقت
انتى عاملة زى شباك ليا عالدنيا بشوفها منه بشكل مختلف
الدنيا اختلفت كتير لما بقيت بشوفها بعينك بقت احلي كتير
انا نفسي بحس انى احلي بكتير لما بشوفنى بعيونك
بلدنا بقت احلي كتير لما شوفتها معاكى حتى بيتنا اللي عشت عمرى كله فيه بقي احلي كتير لما دخلتيه
شقتنا في مصر بقت احلي كتير لما فرشتيها علي زوقك وبقت احلي واحلي لما سكنتيها معايا
اسيل :وبتقول انى بثبتك
ده انت طلعت دكتور ورئيس قسم التثبيت وانا منك بتعلم
وانا اللي كنت مفكراك متجوزنى علشان انا اخت مصطفي وبس
مازن :انتى كنتى فكرانى اتقدمتلك علشان مصطفي الله يرحمه
اسيل :اه بصراحة اصلك مكنتش بتتكلم معايا كتير
كنت بتبقي ساكت ومبتفتحش مواضيع
هو اينعم انا مكنتش هجاريك في الكلام وكنت هقفل المواضيع بس الفكرة انى مكنش باين عليك إهتمام بيا خالص لما بابا قالي انك متقدملي افتكرتك بتعمل كده وفاءا لمصطفي وانك اولى باخته وهتحافظ عليها اكتر من الغريب
كنت محتارة بين شعورين
متضايقة انك مش متقدملى علشانى
وفي نفس الوقت فخورة بانك متقدم لاخت صاحبك الله يرحمه علشان متروحش لحد تانى متضمنش يعمل فيها ايه
فخورة بيك وبصداقتك بمصطفي
الوفاء صفتى المفضلة وفكرة انك وفى لصاحبك الله يرحمه خلتنى احس انك تستاهل فرصة وان الوفاء الجميل ده ممكن يبقي ليا في يوم من الايام فوافقت
مازن :والله هو انا متقدمتلكيش علشانك ولا علشان مصطفي الحقيقة انا اتقدمتلك علشانى انا
انا اللي كنت محتاج وجودك انا اللي حياتى كان ناقصها انتى
مصطفي الله يرحمه علمنى حاجات كتير صح وقدملي حاجات كتيرة حلوة وحتي بعد ما مات قدملي اهم واحلي حاجة في حياتى انتى نعمة من ربنا عليا وهدية مصطفي الله يرحمه ليا
مصطفي كان مثالي الوحيد عن الصحبة الصالحة والصاحب السند والاخ اللي مجابتهوش امى
انا عندى تلت اخوات صبيان مصطفي الله يرحمه كان اقربلي منهم
اسيل :الله يرحمه
تعالي نرجع لاهلك اتاخرنا عليهم وعندى خبر حلو نقولهولهم
مازن :خبر ايه
اسيل :انا حامل
مازن :بجد
اسيل :وهى الحاجات دى فيها هزار برضه
مازن :الحمد لله يعنى انا هيبقالي طفل منك هنجيب مصطفي انا وانتى
اسيل بابتسامة :اشمعنى مصطفي
مازن بابتسامة :قلبي حاسس ان ربنا هيعوضنا كلنا بمصطفي
انتى عرفتى اهلك
اسيل :لا انت اول حد اقوله وانا وانت بقي نعرف اهلي واهلك
مازن :اللهم لك الحمد ربنا يتمملك علي خير وتقومى بالسلامة ومصطفي ينور الدنيا يام مصطفي
اسيل :اللهم امين يابو مصطفي ويباركلي فيك وميحرمنيش منك ابدا
وبعد تمن شهور خلفت ولد وسميناه مصطفي
مازن احساسه كان صح وبعده باربع سنين جبنا مريم وبعدها بسنتين جبنا تقي
انا ومازن كنا بنحاول نبقي اجابات حلوة وصح في حياة ولادنا
زى ما اهلينا كانو اجابات حلوة وصح في حياتنا
بنحب ولادنا اكتر من نفسنا وبنخاف عليهم وبنراهن عليهم وواثقين فيهم ودايما بنساندهم في اي قرار بيحاولو ياخدو
وعلي قد ما نقدر بنحاول نخليهم اجابات حلوة في حياة اللي حواليهم
ونعرفهم انهم لو قابلو اجابة غلط يعدوها
وان بعدها هتيجى الاجابة الصح اللي تستاهل
انهم يختاروها الإجابة اللي تطمنهم وتفرح قلوبهم
الاجابة الصح الحلوة اللي هتعوضهم عن الاجابات الغلط السيئة اللي قابلوها
الاجابات السيئة الغلط اللي لازمتها انها تعرفهم قيمة الاجابات الحلوة الصح
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا