#ولدتني_عاهرة 42
لبسته دبلته .. و باسني ع راسي .. و قرب من فمي بس أنا باعدته ..
كنت متوتره لدرجة أني إيدي ترعش .. شد إيدي .. قالي عجباتك الدبله ؟؟
قعدنا نشوفوا فيها مع بعض .. قتله قبل ما تعجبني حبيتها هلبا .. مش ح تكون مجرد خاتم إرتباط بالنسبه ليا بكل ..
ح تكون حياة جديدة .. كلها راحة .. حب .. ود .. حنان .. تفاهم .. احترام .. إكتفاء ♥️
حط إيده ع شعري يلعب بيه .. اتكيت ع إيده و قعدت نتأمل فيه ..
قتله تعرف إنك قاسي هلبا ؟ قالي معاك إنتي لا .. قتله حتى أمك و خواتك قالوا إنك عصبي و صعب ...
قالي ما شافونيش معاك .. تعرفي لو يشوفوني معاك .. الأفكار هادي كلها ح تتغير .. ح يقولوا ولدنا طلع طفل ..
قتله ليش ؟ 🤭
قالي عيوني كاشفيني .. و قرب مني باسني بخفه و رقه .. غمضت عيوني .. قام راسه .. ابتلع ريقه ... قالي معاك نحاول نرجع سيف الحقيقي .. بس إنتي تطلعي مني في البساطه .. الحن .. الحب .. اللهفه .. نتغير معاك هلبا .. لدرجة مرات من كثر ضغط الخدمة نبدا نقول انا محتاج حضنها .. حضنها هي بس .. لما تخطري على بالي و أنا نخدم نحس أني نبي نعفو ع الموقوفين كلهم .. نبي نسلم عليهم و نعاملهم كويس .. نحس فيك كل شي .. فيك البراءه .. فيك الإثاره .. فيك الحشمه .. فيك الامومه .. معاش نقدر نقعد بعيد عليك بكل .. قالي مش ح نقابل إماليه و إنتي معاي الا بعد سنه أو سنتين من الزواج ..
حطيت إيدي ع لحيته .. قالي شفتي الشيب ؟
قتله يهبل في اللحيه .. زايدك حلاوة ..
قربنا من بعض .. غمضت عيوني .. حسيت بخشمه ع خشمي .. لحيته ع خدي ..
باسني .. و كنت من كثر ما أنا ذايبه فيه معاش قادره نفتح عيوني ..
قام راسه .. قالي ليش حاطه مكياج ؟
ضحكت و قتله لي حبيبي ..
قالي الي حاطاته على عيونك هذا ليش ؟
قالي معاش تديري مكياج ..
قتله حطيت ع عيوني و فمي بس ..
قرب مني و قعد يبوس في خدي و قالي شن هو الي حطيتيه في فمك ؟
لما قالها حسيت بي إحساس غريب .. جسمي كله قشعر ..
قتله روج .. قالي ليش ترعشي ؟
قتله سيف أنا نبي نروح .. و حاولت انوض و شدني ..
قالي ليش ترعشي ؟؟
قتله نعرفش 🙈
شدني من إيدي و نوضني من الصالون .. و أول ما وقفت قامني ..
و خشينا دارنا .. حطني ع سريري .. و نحى جاكيته و مسدسه و جى جنبي ..
قالي ما تخافيش مش ح نديرلك شي ..
استرخي و بس ..
جى جنبي و قالي تعالي ع صدري .. حطيت راسي ع صدره و حضني .. قعد يلعب بشعري ..
قالي تعرفي شن أروع حاجة يحسها الراجل ؟
قتله شنو ؟
قالي إنه يبدا متأكد إنه هو إول راجل في حياة حبيبته و مرته ..
تتعلم معاه كل شي .. أول إحساس تحسه معاه هو ..
قلبني و جى هو فوقي .. قالي أنا توا متأكد إنك بتدوخي تحتي .. جسمك أول مرة يكون مع راجل .. قلبك الي ما عمره نبض لي غيري بيطلع ..
شوفي عيونك ماريا كيف ..
عيونك سكرانات ..
غمضت عيوني .. قعد يبوس في خدي .. رقبتي .. يبوس في إيدي .. دبلتي ..
كان جسمي تحته .. بس روحي و روحه ترفرف حوالينا ..
و بصعوبه جداً جداً جداً ...
قتله أرجوك سيف باعد عليا ..
كنت زي المتخدره .. إيديا يرجفوا و جسمي يرجف ..
قعد يبوس في إيديا .. و يقولي لو تعرفي قداش نبيك .. لو تعرفي قداش بنهبل عليك ..
متعب جداً من غيرك ..
قعدنا نبوسوا في بعض .. و لأول مرة حسيت بروحي و انا نبوس فيه .. كنت ديما مستسلمه و بس .. و من كثر نار الحب .. و خوفي نستمر لي أبعد من هكي .. باعدته و نضت .. حضني و قالي خلاص خليك في حضني ..
يا دقات قلبه الي خلوا سوريته تتحرك .. يا قوة أنفاسه الي زادت من شوقي حتى و أنا نبلع في ريقه ... يا قوة قبضة إيده و هو لافها عليا ..
و الراجل الحنين رزق و الله رزق ♥️🌺
قعدت في حضنه و رن تليفوني نضت نبي نرد .. لقيتها منار ..
قتلي هيا روحي بوك و محمد ماشيين صلاة الجمعه و انتي تعالي ..
قتلها به ..
قتله نبي نروح .. قالي تو نحطك أنا ..
قالي نتزوجوا في الحوش هذا ؟ و لا تبي في حوشنا ؟
قتله كيف في حوشكم ؟ قالي أنا باني جنبك العيله .. بس الحوش فاضي مش مأثث ..
قتله نتزوجوا هنا ..
قالي معناها نغير دار النوم بس .. قتله به .. و قالي بعد العرس انتي شن تحبي غيري .. قتله به تمام .......
قالي معناها نزوقه و نديرله تشطيبه بسيطه و نغير دار النوم ..
قالي بوك قالي ما يبيش عرس .. معناها نكلم محمد نتفاهم معاه ع الفاتحه و نبعتلك مهرك مع اماليه جهزي نفسك الضروري الضروري بس .. و ناخدك ..
قتله به تمام .. قالي ما نبيش شي يقعد في خاطرك .. نبيك احلى عروسه ..
قتله حاضر ♥️🌺🙈
نضنا طلعنا و ركبنا السياره .. و حسيت بصعوبه إني نرجع لطبيعتي ..
سرحانه .. عيوني دبلانات .. ♥️
روحت و خشيت حوشنا لقيتهم يجهزوا في الغداء .. غيرت ملابسي .. و غسلت وجهي .. و خشيت معاهم للمطبخ ..
عمتي تسأل فيا .. كيف حال أمك توا ؟؟
أنا : أهاا كويسه الحمدلله ..
ما كنتش على بعضي بكل ..
جى بابا و محمد .. حطينا تغذينا .. و بعد الغداء درنا قهوة و قعمزنا نهدرزوا ..
رن تليفون محمد .. ناض محمد يتكلم برا .. بابا قال مشيت للمقبره اليوم ..
قتله أنا يا بابا مقصره 😔💔 قالي ادعي و تصدقي و مش شرط المشي للمقبره ..
قال كل ما نمشي نلقى ستفه جديده جنب نزار .. الموت كل يوم ترفع ..
قتله ناديه المره الجايه نمشي معاك نقرا قرآن على ولدي ..
كلنا تلفتنا 😳😳
قاللها بابا إن شاءالله ..
جى محمد و قال لي بابا بتطلع ؟؟ قاله بابا لا مش طالع بيجي عمك بعدين ..
قاله محمد أنا بنطلع نتلاقى مع سيف الأسلام .. قاله بابا قوله يجي هنا نهدرزوا مع بعض .. قاله محمد تو نشوفه ..
عرفت وقتها إن سيف بيحكي ع الفاتحه ♥️🙈 .. قالت ناديه خلي انوض اندير حاجة حلوه ..
ناضت ناديه للمطبخ .. و طلع بابا و محمد للصالون .. قتلي عمتي شنو في ؟؟
قتلها يبي يقرا الفاتحه ..
قتلي عمتي معناها لازم نبدوا نجهزوا نفسنا .. راهو لازم تاخدي زبون لي بوه .. و تاخدي هدايا لي حماواتك .. و تاخدي حولي قنين لي عزوزتك .. قتلها به كيف بنديروا الردَّه ؟؟
قتلي عمتي مش لازم ردَّه ناخدوله زبون و ساعه و عطور و نحطوهم في سابات وقتلي عمتي مش لازم ردَّه ناخدوله زبون و ساعه و عطور و نحطوهم في سابات و نغلفوه و ارفعيه معاك باش تاني يوم الدخول يلبس زبون ..
قتلي الحاجات هادوا تو ناخدهم أنا كلهم .. انتي ألهي بحاجاتك انتي بس .. قتلي إيمان به و أنا اعطوني حاجة نديرها ..
قتلها أنا بروحي مش فاهمة شي ..
قتلي منار أنا في عرسي شريت بدله البودره و قاعده عندي تو نرفعها للمغسله أنّشيها و نجيبهالك .. و نعرف حنّايه كويسه تو نكلمها تجيك .. قتلها عمتي لا لا علاش حنّايه العفو !! .. توا أنا نحني بنتي ..
قتلها منار تعرفي عمتي انا لما جو أهل علاء أمي بهدلتهم بالشروط .. لين تحشمت انا ..
قتلي عمتي راهو كان جو أمالي سيف و قالوا شن شروطكم .. بنقوللهم احنا شرينا راجل .. و الي بتجيبوه بيرجعلكم .. ما نبيش تصير حساسيات و شروط و دوة فاضيه .. الناس كلها تعرف الاصول علاش هالشروط و الدوة الفاضيه ..
و في كل موقف مفروض تكون فيه امك معاك تلقي روحك تتخطيه بروحك .. و في داخلك فراااااغ كبير ما يملاه شي ..
فاتت العشيه و احنا نهدرزوا و جى سيف قعد مع بابا و عمي و محمد في الصالون ..
و ناديه دارت الحلو و قهوة ..
و جتني قتلي زعمه نديروا عشاء و لا بيروح سيف ؟؟ قتلها مش عارفه .. قتلي خلي نتصل بي بوك نسأله ... و سبحان الله مغير الأحوال ..
و في داخل كل شخص فينا متمرد صغير .. لو لقى بيئته ح يكبر و لو في من وقفه عند حده ح يموت .....
روح سيف و بعتلي رساله ..( لما تخشي فراشك كلميني )
جى بابا و محمد و روح عمي .. قال بابا راهو الناس يبو الفاتحه اليومين الجايات ..
قتله عمتي يومين شنو اللطف 😳😳
قاللها الراجل جاهز و ليش تطويل الحبال ؟
يوم الأحد تمشي ادير تحليلها في المرجعي .. و بمجرد ما يطلع التحليل تقرا الفاتحه و تاني يوم يجي يروح بي مرته ..
قتله عمتي باهي احنا ما قلنا شي لكن عاد مش يومين .. قاللها بابا انتو النساوين حبالكم طويله .. اطلعوا خودولها شن ناقص و ما في داعي للبهرجة الزايده ..
قالي محمد توكلي على الله 😉 تو بكرة نجيبلك فلوس ..
كانوا هما يحكوا و أنا دقات قلبي أقوى من صوت حكيهم .. يا محلاه من شعور ..
ناديه قالت انتو بتعزموا ناس ؟ قتلها عمتي لا لا العيله بس ..
قتلها ناديه معناها الحلويات و العشاء و امور الحوش كلها خلوها عليا أنا ..
قتلي إيمان و أنا من بكرة نطلع انا و اياك نشوفوا ڤيلوات و مزينه ..
قتلي عمتي خلاص و هدايا حماواتك و عزوزتك و شيبانيك و راجلك تو نمشي ناخدهم انا ..
و كل واحد خدا حصته شن بيدير .. قتلي منار أنا مروحه بعدين شوفي شن تبي نجيبلك معاي بكرة و ابعتيلي رساله ..
كلهم يحكوا و يرتبوا في أفكارهم و في داخلي إحساس يقولي إن الله عز و جل عوضني ع كل ألم و حزن و فقدان عشته ♥️♥️
