🌸ولدتني_عاهرة 28🌸
طلعوا بابا و محمد و إيمان مشوا يتعشوا .. و قعدت اناشب في نزار لين فاق من النوم .. نحضن فيه و نغنيله🙈🙈 ..
جهزت له سفرة ياكل .. و خش للحمام و بعدين صلى و قعمز جنبي ..
حطيت إيدي على رأسه .. قالي وين الحاج ؟ قتله مشى مع محمد و إيمان يتعشوا برا ..
قالي يا أما أنا مزودها شوي يا أما انتو ماتت في قلوبكم الرحمة ..
قتله احكيلي خيرك ؟؟
قالي أمي محبوسه .. و خنقاته العبره قعد يبكي .. أنا تمنيت الأرض تنشق نصفين و تبلعني ..
درت روحي ما نعرف شي و تفاجأت 😨
قتله كيف صار ؟
قالي صار و خلاص و لازم يصير حل خير ما نقتل روحي و لا تصير حاجة ..
قتله أهدأ شويه و إحكيلي ..
قالي به ما تعرفيش هكي محامي شاطر يقدر يدير حل ؟؟
قتله نعرف أكيد ..
قالي به هيا نمشوله و من بكرة نمشي نبيع السياره و نجيبلك حقها ...
أنا هنا تعلمت درس .. و درس قاسي .. أن قراب الدم لا يمكن أبداً تجازيهم أو توقف موقف المتفرج و هما يتأذوا ..
مشاعر نزار أوقظت فيا مشاعر مدفونه اتجاه امي .. ذكريات تختبي وراء كومة آلام تراكمت مع مرور الزمن ...
قتله به هيا تغدى كول حاجة و بكرة نشوفوا شن بنديروا ..
قالي تعرفي يا ماريا .. أنا ما نحبهاش أمك .. و قداش من مرة نحس برغبة إني نقتلها ..
لكن لما عرفت انها طلعت من الحوش .. و بعدها لما عرفت انها موقوفه .. تمنيت الموت ..
تمنيت ما جيتش للدنيا هادي مرة وحدة ..
كبرت و بوي في الحبس .. و يوم الي طلع بوي نحبست إمي .. رحمتك يا رب 💔
قعدت ساكته في جنبه .. معاش عرفت شن نقول .. قالي بنوض نطلع انا نشوف بيعة السيارة ..
قتله به كول حاجة قبل .. قالي ماكلة شنو بالله خلي نطلع ندرق وجهي خير ..
طلع نزار .. و أنا جامدة في مكاني .. اتصل بيا سيف .. قالي وينك من بكري نستنى فيك .. قتله توا كيف طلعوا كلهم ..
قالي شن صار في ولد عمتك ؟ قتله ما قالي شي بابا ع الموضوع ..
قالي كيف !!
قتله ما فتحليش الموضوع بكل .. قالي و لما يفتحه شن بيصير !!!
قتله ع حسب رأي بابا .. كان موافق عليه ما نقدرش نقوله لا ..
قالي معناها انا مهمتي تمت ؟؟؟
قتله كيف ؟
قالي بوك طلع .. بالك ارتاح .. هذا الي كنتي تبي توصليله ...
قتله مستحيل انا مش هكي 😳😳 ..
قالي تمام تمام .. نستاذنك انا .. صكر الخط عليا ....
تفاجأت 😨 هذا كيف يفكر فيا هكي 🤦🏻♀️🤦🏻♀️
كالعاده .. كل أموري الخاصه نحللها بروحي .. لا صديقات لا في من تشاوريه ..
عاودت اتصلت بيه ما ردش عليا ..
بالي مشغول في كل شي .. يعني حتى الأمر الكبير جداً عندي أنا هين و صغير ..
قعدت مقعمزه بروحي لين جى بابا .. هدرز جنبنا شويه أنا و حناي و خش رقد ..
حناي رقدت ..
خشيت فراشي .. عاودت اتصلت بي سيف ما ردش عليا .. رد يا راحتي رد 😔
اتصلت بيا إيمان .. قتلي أمي فتحت الموضوع لي خالي متع الزواج و خالي مش رافض الفكره 😍 ..
قتلها ليش هي عمتي وين تلاقت مع بابا ؟؟
قتلي ماهو تعشينا مع بعض احنا ..
قتلها شكون انتم ؟
قتلي انا و محمد و خالي و امي ..
تفاجأت حقيقة من تصرف إيمان .. شن السرعه هادي !!
و ليش تتصرف من غير علمنا احنا بناته !!
و ليش تتصرف و كأنها صاحبة الشأن !!
و ليش مستعجله !!
قتلي الوووو وين غطستي ؟؟
قتلها لا غير متفاجأه حقيقةً .. قتلي في شنو ؟؟ قتلها حسيتك انتي بنته و انا الكنه الي ما تعرف شي .. طبعاً ما نبيش نتكلم على منار الي مزال ما تعرف شي ..
قتلي أنا مش قصدي و الله و ...
قاطعتها و قتلها نستاذنك انا بنصكر ..
صكرت الخط .. ما فهمتش شن الثقه الي عند بعض الناس في تصرفاتهم !!
تلقي روحك انتي صاحبة الشأن ساكته و متحشمه و الناس تتكلم و تخطط لمصيرك !!
بجد ظاهرة غريبه ..
عاودت إيمان اتصلت بيا .. ما رديتش عليها ..
الحمدلله كل مرة يصير موضوع يضاف لي المواضيع الي قبله في قائمة تفكيري ..
رقدت و تاني يوم الصبح بابا قالي شن بتمشي للخدمة الجديدة ؟؟
ما عرفتش شن نرد عليه .. قتله اليوم نحس روحي تعبانه .. قالي معناها نمشي انا و نشوف المقر وين و نقابل المدير ..
أنا 😳😳 خليها مرة تانيه نمشوا مع بعض خير .. نضت قعدت نضم في الحوش .. و نسمع في بابا يكلم في حناي ع اياد ..
لحضات و نادوا عليا .. عرفت وقتها انهم بيفتحوا معاي الموضوع ..
بدا كل شي عكسي .. كل شي طلع من سيطرتي .. مشيت جنب بابا و حناي .. قالي بابا عمتك و راجل عمتك كلموني عليك ..
قتله به !!
قالي انتي شن رايك ؟
و قبل ما نرد أنا قالت حناي ما نبوش نعطوهم احنا .. بنتي تستاهل ما خير منه ..
ما كنتش متوقعه رد حناي بكل 😳😳 ..
بابا ساكت .. انا ساكتة ... قتلي حناي خيرك ساكته ؟ قتلها شي 😰😰
قتلي تو نتكلم معاها انا عمتك مش لعب فروخ هو يوم يبوها و يوم ما يبوهاش ...
قاللها بابا كيف يوم يبوها و يوم ما يبوهاش ؟
سيف بتصل بيا ..😰😰
قتله حناي انا تو نعرف كيف نتصرف فيه الموضوع هذا بالذات ..
قاللها بابا غير شن في قولي ؟
سيف بعتلي رسالة ( حتى الخدمة معاي معاش تبيها ؟ )
اول ما قريت الرساله اتصلت بيه و خليت الخط المفتوح ..
حناي تقول لي بابا انت تبي تعطيها هادي بنتك و انت حر .. لكن انا مش راضيه عليها .. ماريا بنت ولدي .. و اياد ولد بنتي .. لكن الزواج قدر و احترام و كان كلموني بنقوللهم بروا شوفوا بنت تانيه ..
صكرت الخط على سيف و حناي قاعده تحكي .. كنت نبيه بس يعرف اني عالقه في موضوع .. دوة حناي و بابا ما انتهتش و انتقلت لي مواضيع تانيه .. جت منار و نصت فتحت الحوش و قتلها باهي الي جيتي ع الاقل انوض من جنبهم .. قتلي شن في ؟ قتلها يحكوا ع اياد ..
خشينا قعمزنا جنبهم .. بابا كل كلامه يشكر في إياد .. طلع بابا فم الحوش ..
حناي قالت لي منار بوك يبي يخطب هاليومين .. منار تفاجأت 😳😳
قتلها حناي بجد ؟ قتلها ايه ..
قتلها من بيمشي يخطبها ؟ قتلي انا و عمتك ..
به و احنا !! احنا صغاره !!
نزار وين من امس طلع بيبيع سيارته و ما روحش .. قاعد عند صاحبه ...
امي شن مصيرها !!!
كل المواضيع عالقه و مشاكل .. مش وقت خطبه بكل ..
نضت انا و منار خشينا المطبخ .. قتلي شن الي صاير هذا !!! 😳😳
قتلها ايمان فتحت الموضوع و كلهم ما صدقوا .. طلعوا متفقين حتى بيمشوا يخطبوا و هو ما ليشي 10 ايام بوك طالع بس ..
مزال حتى كلمة بابا مش متعودة عليها و بيخطبوله !!!
قتلي هكي من غير حتى ما ياخذوا راينا ؟؟؟ ما فيش حساب لي مشاعرنا ؟؟؟
قتلها مشاعر شنو بالله ..
بابا بيتزوج و بتجي إمرأه تاخد كل شي .. يبدا من حقها كل شي ..
عشت عمري و انا نستنى فيه .. عديت عمري و انا نبكي على غيابه ... الجرح الي في قلبي ما يداويه شي .. نزار شن دنبه !!! أنا شن ذنبي !!!!!!
الانسان الي صبرنا على خاطره سنين و ضحينا بي أمي و خشت السجن باش نثبتوا براءته بيمشي يتزوج !!!
به اعطونا فيه شوية وقت نستوعبوا ع الاقل الي صاير .....
به انتي يا منار متزوجه .. محمد متزوج .. خود رأي نزار و رأيي ...
بس هي هكي 🤷🏻♀️ .. من حقه يفتح حوش و ياخد امرأه تونسه .. و احنا مش من حقنا شي 💔
