🌸ولدتني_عاهرة12🌸
صكرت الخط من سيف و أنا نفكر .. شن قصده بخوك الكبير !!
يلا خوي الكبير خوي الكبير ...
طلعت قعمزت مع مرت عمي و عمي ..منار مقعمزه بس العقل مش معانا .. سرحانه و مره مره تنزل دمعتها من غير إرادتها ..
كلام مرت عمي يومها كان مش مفهوم .. صعب عليا انا و منار إدراكه .. و كأنها تتكلم بلغه تانيه ما فتحناش عيونا عليها ..
قالت إنها تبي الارض تنباع باش ادير مشروع لي ولدها و باش تزوج بنتها ... و كلام تاني ..
العشيه جت عمتي و إيمان .. جابهم إياد .. خش سلم على حناي .. و عيونه هاربات مني .. و كأني مش موجودة بكل ..
خشيت قعدت في الدار دماغي مشغول .. ليش نلوم على الناس ؟؟ إذا أحنا ولدنا في مستنقع قذر .. انا متأكدة إن الناس تسمع و تشوف حاجات احنا ما نعرفوهاش ..
اتصلت منار بي محمد و جى لحوش حناي .. خشيت انا و منار و محمد للصالون و صكرناه .. حكت منار لي محمد انها تبي تمشي تقعد عنده في الشقه .. قربت منه .. قتله محمد نسألك ؟ قالي قولي ..
قتله بصدق شن رأيك في إيمان ؟؟ استغرب و قالي من أي ناحيه ؟؟
قتله من كل النواحي .. قالي بنت ماشاءالله عليها و ان شاءالله ربي يحفظها ..
قتله محمد انت فاهم عليا و فاهم ع البنت ..
قالي و أنا راجل مش متع زواج ..
قتله ليش !!
ليش مش متع زواج ؟؟
يعني احنا مكتوب علينا نكونوا عيله فاشله ؟؟؟ اذا زواج امك و بوك فاشل هذا يعني ان حتى احنا نفشلوا في حياتنا ؟؟؟
محمد انت بي شقتك .. فتحت محل بروحك و دخلك كويس ... انساه الي فات .. انساه الماضي و انطلق .. تزوج .. افتح حوش .. أنا متأكده انك ح تكون احسن زوج و أروع أب .. بس 🤚🏻 أختار صح .. أختار صح باش ما تظلمش اطفالك .. قالي حتى لو فكرت نتزوج مش ح نختار إيمان .. قتله ليش ؟؟
قالي العيله لا .. انا راجل نبي امرأه تحترمني و تقدرني .. مش امرأه تعرف كل شي و غدوة بعد غدوة تبدا تعاير فيا ..
قتله إيمان مستحيل ادير هكي و انت تعرف تربية عمتك كويس ..
قالي نعرف تربية عمتك كويس لكن لما جى إياد و خطبك مني و بعدها بي اسبوعين قالي ما فيش نصيب معاش عرفت وقتها تربية عمتك ..
تفاجأت أنا .. قتله إياد خطبني منك !!
قالي ايه و قداش من مرة مكلمني عليك .. بوه أثر عليه ما تبيشي يأثر على بنته !!
فوتيه الموضوع ماريا ..
قالت منار به بتظلم البنت ع خاطر خوها ؟؟ يعني احنا ما نلوموش الناس الي ظلمونا ع خاطر أمنا .. قاللها محمد كيف نظلم فيها انا لا كلمتها لا عمري حتى وقفت عليها بروحنا ..
قتله منار البنت تبيك و إياد من يومه قلبه رهيف و يمشي بكلام بوه مش جديد يعني ..
قاللها محمد تبيني أنا !! 😳
قتله منار امالا علاش نكلموا فيك عليها ؟؟ طبعا تبيك انت .. قاللها ان شاءالله خير ..
هذا كله و أنا عقلي مشغول في كلمة محمد .. إياد مشى كلم محمد عليا و بعدها قاله ما فيش نصيب !! يعني الموضوع منتهي خلاص .. ما فهمتش به ليش كلموني ؟؟ ليش ما كلمش بوه قبل ؟؟ ليش ؟؟
خليت منار مع محمد و طلعت .. إيمان عقلها رايح منها تبي تشوف محمد بأي طريقه .. انا فكري مشتت بين موضوع الضابط علي و موضوع منار و الكلام الي قاله إياد توا .. خشيت للدار بنغم راسي و نرقد بالك تنتهي كل هالافكار ..
لحقتني إيمان .. قتلي خيره محمد مع منار في الصالون بروحهم ؟
قتلها تعرفي إن محمد خوي ما يبيش يتقدملك لانه خايف من رد فعل بوك ..
انصدمت إيمان 😳😳 قتلي كيف !! قتلها توا كنا نحكوا عليك ..
قتلي ايه 😨
قتلها قال اكيد بوها ح يأثر عليها زي ما أثر على إياد .. قتلي حي عليا 😰 شن اندير انا توا ؟؟ قتلها بصراحه عنده حق ..
قال حتى لو فكرت في الزواج ح ناخدها برانيه مش من العيله ..
قتلي ليش ؟
قتلها يعني تجي برانيه ما تعرف شي خير من قريبتك ترخي بيك ع خاطر امور تافهة ..
قتلي ماريا انا ما عمري فكرت في محمد هكي .. بالعكس نحترمه هلبا ..
قتلها عاد هذا الي صار قلتهولك ..
قتلي به نتكلم معاه ؟ قتلها شن بتقوليله 😳 ..
قتلي ندير اي لقطه باش نحكوا و نعرف كيف نقنعه أنا بعدين ..
قتلها ما افلحك 🙄🙄
قتلي به نوضي نقعمزوا في الجنان باش كان طلع ما يحسش اني نستنى فيه برا ..
قتلها لا ما خاطريش الي فيا سادني .. قتلي نوضي ع خاطري ..
طلعنا قعمزنا في الجنان .. شويه و طلع محمد وقف سلم .. مش عارفه ليش حسيت ان اول مرة محمد يسلم على إيمان .. تليفوني يرن .. اييه هذا سيف مش وقته بكل قدام محمد خوي .. ما بيتش نرد عليه ..
إيمان الخجل الي في الدنيا كلها نزل عليها .. طلع محمد و طلعت معاه إيمان يهدرزوا ..
أنا 😳😳 شن السرعه هادي !! إيمان ما شاءالله عليها طول اغتنمت الفرصه ..
ايييه هادوا البنات المرتاحات هكي .. ما في شي يشغل بالهم الا الحب ..
بس الي زيني حتى تجيها فرصه تضيعها 🤦🏻♀️ .. ركبت للدار و ركبت ايمان بتطير من الفرحه .. قتلي قولي شن صار 😍
قتلها شنو !!
قتلي خديت الفيس متعه 😍
قتلها هذا هو !! 🙄🙄
قتلي و شويه هذا 😀..
هكي ح نزيد نتقرب منه و نهدرز عليه و نلخبطه .. قتلها أها به ..
خديت تليفوني و اتصلت بي سيف .. رد عليا .. قتله آسفه بكري كان جنبي خوي الكبير ما قدرتش نرد ..
قالي لا عادي .. قتله في دوشه جنبك !! قالي ايه شويه ..
حسيت يومها و كأنه كان في عرس .. فاتحه .. دوشة فرح يعني ..
قتله ليش كلمتني شن في ؟؟ قالي نبيك تفتحي محضر بأعادة فتح التحقيق و تجيبيلي أفادة .. باش يكون الأجراء رسمي ..
قتله أنا ؟؟
قالي إنتي او أي حد من خوتك او كان تقدري من بوك نفسه .. قتله به تمام ان شاءالله ..
تاني يوم على طول مشيت فتحت محضر و قالولي المفروض المتهم نفسه يطالب بأعادة التحقيق .. و قالولي الأفادة تاخديها تاني يوم ...
كلمت سيف و قالي خلاص تمام ابعتيلي في أما مركز فتحتي المحضر و تو نبعت حد ياخدها .. قتله تمام ..
روحت و قعدت إيامي كلها تمر زي بعض .. إيمان كل مرة تبعتلي حاجة ع الفايبر بخصوص محمد و الباين انها قدرت تخليه يهتم بيها .. و قي يوم جت عمتي و قالت انها تبي ترفع حناي لحوشها لان في ناس جايين بيخطبوا أمل ..
مشت حناي .. و قعدت إيمان تهدرز عليا فايبر .. قتلي لو محمد يتقدم رسمي توا نديروا العرس في يوم واحد أنا و أمل 😍😍 ...
اتصل بيا سيف و قالي بكرة نبي نشوفك .. قتله تمام .. قالي تعالي للمكتب متع الشركة مش مكتب البحث ..
تاني يوم جهزت نفسي .. حطيت ميك اب خفيف .. و لبست و طلعت .. مشيت للمكتب .. قالي انا كلمتك لاني بنحطك في الصورة .. قتله شنو ؟
قالي انا قداش ليا نبحث ع القضيه .. و بصراحه لو بنشد الموضوع رسمي أمك اول وحدة بتجي للتحقيق .. و الضابط علي بينحجز للتحقيق .. و أحتمال يقول معلومات على أمك و تنفتح مواضيع تانيه احنا في غنى عنها ..
قتله يعني شنو ؟؟
قالي عندك خيارين ✌🏻✌🏻
الاول ينفتح التحقيق و كلهم يتم استدعائهم هنا .. و من ضمنهم بوك ..
التاني : تصكري الملفات هادي كلها و تنسي الي فات و نوعدك ندير جهدي بوك يطلع و نحقق في القضيه التانيه الي اتهم بها و هو في السجن ..
ماريا فكري في خوتك .. فكري في بوك لو عرف ان مرته هي سبب سجنه .. فكري في اختك المتزوجه و لو عرف راجلها .. خوتك رجاله خدوا سنين من عمرهم باش نسوا الي فات ما تفتحيشي انتي و تزيدي تفككي العيله ..
نضت من الكرسي .. و الدموع في عيوني .. به و انا ؟؟
انا منو يفكر فيا ؟؟
ليش هي فكرت فينا لما دارت هكي ؟؟
كيف تبيني نفكر فيها ؟؟
فكرت فيا لما كانت ترفع فيا لي استراحة علي هذا ؟؟
فكرت فيا و في خوتي لما دسوله المخدرات في سيارته و نحكم السنين هادي كلها !!!
فكرت فينا لما حرمتنا من بونا ؟؟ فكرت في الراجل المسكين الي عدا عمره في الحبس محروم من اطفاله !!!
فكرت في نفسيتي انا و منار و نزار و محمد !!
قربت منه .. قتله الانسانه هادي لازم ينحطلها حد 🤚🏻
شدني من إيدي و قالي أهدي أنا حاس بيك..
قتله لا انت مش حاس بيا .. انت بالنسبه ليك قضيه زي اي قضيه .. لو حاسس بيا ما اقترحت عليا هكي ..
شدني من خصري حضني بقوة .. و قعد يشم في ريحتي .. همس في ودني .. و توا حاسس بيك او لا ؟؟
نحيتله ايديه قتله انت شن ادير !!
قالي اسف بجد اسف ..
كان في صوت في داخلي يقوله لا ارجع احضني .. انا من صغري ما احضني حد .. ما طبطب حد ع كتفي .. ما اهتم بيا حد ..
قالي ماريا أناااا .....
أنا مش مستغل ظرفك او نفسيتك بكل ..
و لا أنا من النوع الي ندخل في خدمتي في حياتي الشخصيه نهائي ..
لكن مش عارف ليش حاس بالمسؤوليه اتجاهك .. انتي بديتي قضيتي أنا .. و انا بنفكر بعقلك .. غلط تفتحي اوراق قديمه .. فكري في نفسك .. فكري في بوك و خوتك ..
ليش مُصرة تعيشي روحك في نفس الدوامه .. انا نعاهدك ان بوك يطلع بشرط تنسي الي فات كله .. ..... اعتبريني خوك .. اعتبريني صديق .. اعتبريني أي شي ..
ضعفت .. و قعدت نبكي .. شدني و قالي مش ح تمنعيني من حضنك توا .. حضنته .. شديته من رقبته .. قتله أنا محتاجتلك هلبا سيف هلبا .. زاد حضني و قالي و أنا معاك ... معاك ..
ما كنتش مصدقه إن أنا في حضنه و ماسكه في رقبته .. هكي تحسي و كأنك في حلم .. مش من الساهل ابداً أبداً تكوني بين ايدين راجل زي هذا ........
