🌸ولدتني_عاهرة 17🌸
قالي الي جى معاك يومها شكون ؟ قتله ولد عمتي .. كلم أمه عليا بس ما صارش نصيب .. قتله هما أصلاً ما جوش خطبوا يعني كلام و بس ..
قالي و الفترة هادي كلها أنا نحساب إنك مخطوبه 🙄 ..
قتله إنت ما سألتنيش و لو سألتني كنت قلتلك اني مش مخطوبه ..
قتله في إجراءات مطلوبه مني ؟؟ قالي كتيب العايله و جواز سفرك او جواز سفر خوك .. قتله آمته تبيهم ؟؟ قالي لو تقدري اليوم كويس او بكره الصبح بكري .. قتله تمام تو نجيبهملك ☺️ نستاذنك أنا توا ..
و انا طالعه شدني من إيدي و قعد يتلمس فيها بي صوابعه .. لدرجة إني ارتبكت ..
قالي مش ناقصك شي ؟ ما تبي شي ؟؟
قتله نبي ☺️
قالي قولي ..
قتله نبي يوم الخميس يجي بسرعه .. ضحك قالي بكره الخميس .. قتله نستنى فيه و فيك ..
قرب مني و قالي فيه فهمتها .. بس فيك لا 😉
..... تحشمت أنا و قتله مش سايعتني الفرحة و نستنى فيه امته يكون بيننا .. نتخايل في رد فعل حناي .. نتخايل في رد فعل منار و نزار .. و عمتي .. قتله أنت فرحتني أنا .. و أنا ح نفرحهم كلهم ..
قرب مني و كأن عيونه يقولولي نبي حضن .. ابتسمت و قتله خلي نروح انا لان حاسه ان اليوم ح يكون عندي هلبا حاجات نديرهم ..
صغط على إيدي و قالي تمام ردي بالك على روحك يا عنيده 😉
قتله هي هكي العذراء 😉 .. قالي برجك العذراء ؟ قتله إيه ..
قالي انا ما نعرفش برجي شن هو 😅 ما نفهمش فيهم الحاجات هادي ..
ضحكت و قتله شهر شنو انت ؟ قالي امته اول مرة شفتك فيها ؟
قتله من 5 شهور .. يعني شهر 2 ... قالي معناها شهر 2 أنا ..
تفاجأت .. تحشمت .. فرحت .. هلبا مشاعر حسيت بيها ..
قتله ماهو في أبراج ترابيه ما تنسجمش مع الأبراج المائيه ..
قالي نخلوها تنسجم بالسيف .. قربت منه قتله مرات في أبراج تانيه تنسجم معاها أكثر .. أبراج قررت إنك تكمل معاها حياتك ..
لف أيديه عليا .. قالي تعرفي قداش فرق العمر بيني و بينك ؟ قتله لا ..
قالي أنا أكبر منك بي عشره سنين .. يعني شيباني عليك 😉 ..
قتله أنت هكي تحسب فيها ؟ قالي لا .. زاد قربني منه .. حطيت ايديا ع صدره .. قالي انتي تعرفي إني معجب بيك هلبا .. و إنك تهميني ..
قتله لا ما نعرفش ..
قالي تعرفي .. و لو مش حاسه بيا ما كنتيش رميتي نفسك في حضني بكل ..
قتله ما يهمش الكلام هذا توا .. انت إنسان مرتبط ....
قالي و تعرفي إني مرتبط و انتي بين ايديا توا 😉 .. قتله باعد حول .. قعد يشد فيا .. قتله سيف ارخيني .. قالي و تقوليلي ارخيني و انتي تبيني نضمك اكثر .. بديت انحيله في ايديه و نقوله ارخيني سيف ..
قالي به نرخيك ما نبيش نعكرلك مزاجك قبل طلعة بوك 😉
شدني من أيدي و قالي تعالي قوليلي شن بديري ؟؟ قتله بنمشي لي محمد ناخد فلوس 🙈 و بعدها بنمشي ناخد كل شي .. أنا نفكر اني نديرله عصبان ؟ او نديرله بازين .. و بنشري حلويات .. و بنشري سوريه عربيه .. و شن تاني و شن تاني و شن تاني ..ايه ايه و بنشري شبشب .. و شن تاني !
دماغي نحس فيك واقف توا نسيت كل شي ..
يضحك عليا سيف و يقولي به نساعدك ؟ قتله شنو ؟ قالي أغراضه القديمه كلها جيبيهاله .. مهما كانت مش مهمة جيبيها خليه يرجع لنفسه القديمه ..
قتله أمي لوحت كل شي حتى ملابسه 😔💔 .. انصدم سيف بس حاول ما يبين شي .. قالي قداش كان عمرك وقتها ؟ قتله 8 سنين ..
حط إيده ع خدي و قالي يكفي وجودكم انتو جنبه .. قتله صح و فرحتي بطلعته أكبر من اني نتفكر الماضي و نبكي عليه .. قرب مني هلبا و همس في وذني و قالي يكفي إنه طلع و لقى بنته كبرت و زي القمر ..
قتله سيف تقدر تقولهالي من غير ما تقرب مني هلبا هكي 🤨
قالي من كثر ما فرحان ان خطيبك طلع مش خطيبك 😉
قربت منه و قتله امته بنفرح انا ان خطيبتك ح تطلع مش خطيبتك 😉
قالي ماريا تقدري تقوليهالي من غير ما تقربي مني 😉😉
قتله تعرف انا نروح خير 🤨..
و خديت شنطتي و بنطلع .. قالي بنقولك حاجة .. تلفتت له .. قالي مستعد ندير كل شي باش نشوف الفرحه هادي ..
ابتسمت ☺️ و طلعت نجري 🙈 ..
فرحتين في نفس الوقت .. يا ربي اوزعني ان اشكر نعمتك علي يا رب ♥️♥️
فرحانه .. فرحانه .. فرحانه ..
روحت للحوش .. و لقيت إيمان منظفه الحوش كله .. شديتها قتلها تعالي بنقولك خبر مزال ما يعرف بيه حد 😍
قتلي محمد بيخطبني ؟ 😍😍
قتلها تي لا 🤦🏻♀️
قتلي ها شنو 🙄🙄
قتلها بابا طالع بكرة الخميس الصبح ..
قتلي لا 😳😳 لا يا ربي لا 🙈🙈 و حضنتني و قعدت تبكي و بكيت معاها .. قتلي به شنو بنديروا ؟ قتلها بنكلم محمد ناخد منه فلوس .. و بناخد كل شي ناقص .. قتلي به نرفعك ناخدوا الحاجات مع بعض .. 😍😍
اتصلت بي محمد قتله تعالي نبيك .. قالي المغرب لما نصكر المحل نجيك .. قتله لا نبيك توا .. قالي ما نقدرش .. قتله به نجيك انا و ايمان ؟ قالي به تعالوا ..
لبست ايمان و ساعه باش جهزت نفسها .. و انا نقوللها هيااا يا إيمان و هي تقولي شكلي حلو هكي ؟؟
نقوللها اطلعي و لا نمشي و نخليك 😠 .. طلعنا مشينا لي محمد .. و طول الطريق نفكر كيف بنقوله ع الموضوع ؟ و أكيد بيسألني الموضوع كيف و منو الي داره ؟ لانه يبي واسطه قويه .. مشيت و توكلت على الله .. وصلنا و قتله في شخص صديق المحامي سعدالدين بيطلع بابا زيارة من السجن بكره و نبي منك فلوس ناخد حاجات ..و جواز سفرك .. فرح محمد و قالي قداش بيقعد ؟ و من بيجيبه ؟ قتله بيقعد 3 ايام و أكيد انت بتجيبه .. اعطاني فلوس و قالي بعدين نصكر المحل و نجيكم غادي و اعطاني جواز سفره .. طلعنا و مشيت لي سيف اعطيته جواز سفر و كتيب العايله .. و مشيت ندور بين المحلات .. اتصلت بي منار و قتلها و قعدت تعيط في التليفون .. صكرت عليها الخط .. مش فاضيه بيها ..
حاسه ان الوقت ضيق ما يساعدنيش ناخد كل شي .. و في الوقت نفسه اليوم طويل ما باش يتم و انا نستنى في بكره ..
جى المغرب و انا و ايمان ندوروا في الشارع .. اتصل محمد قال وينكم ؟ قتله قاعده برا ..قالي شن مزال ؟ قتله خضره بس .. قالي تو نجيبها أنا .. قتله به أسمع خديت لي بابا زوز سواري عربيات من غير سروال هكي يبيعوا فيهم !! ..
قالي في الي بالسروال عادي .. قتله ما لقيتهمش .. قالي صاحبي عنده محل ناخد منه ديما تو نمشي ناخد منه زوز .. قتله به تمام خلي نروح أنا معناها .. صكرت من محمد و قلت هي نتصل بي نزار .. تليفونه مقفل .. بعتله رساله (( امته تفتح تليفونك تعالى حوش حناك ))
روحنا للحوش و أنا و إيمان تاعبين هلبا و ما كلينا شي .. اتكيت ع المندار نقول لي ايمان نوضي ديرينا حتى سندوتشات .. تقولي لا نوضي انتي .. قعدنا ع الحال هذا في قولة نوضي انتي نوضي انتي لين جى محمد ..
جايب معاه خصره و فواكه و عشاء و خدا لي بابا سواري عربيه ..
خشيت انا و ايمان نحطوا في العشاء .. قتلها شوفي محمد حبيبي حس بيا جعانه هذا علاش جاب عشاء 😍😍
قتلي لا و الله حس بيا انا جعانه 😂
قتلها كيف ! 🙄
قتلي انا بعتله رساله قتله جيب عشاء 😉 ..
قتلها ما شاءالله الامور متطوره و انا ما نندري على شي .. و انا الي كنت نحساب محمد جايبلي عشاء 🤨 ..
قتلي به ما يوجعكش خاطرك جايبهولك انتي العشاء 😅
حطينا تعشينا مع بعض و حناي تقول علاش الخضره هادي كلها غير فساد .. اتصلت بي عمتي قتلها الصبح بكري ضروري تعالي .. قتلي به ..قتلها و جيبي معاك سُفر الفضه و طواسي شاهي هلبا و شوكات صغار .. قتلي غير علاش هذا كله ؟ قتلها بكره نقولك ....
روح محمد و خشينا فراشاتنا .. إيمان تحكيلي في دوة مش وقتها .. و انا مش منتبهة معاها ..
حاسه بهلبا فرحات ..
فرحة طلعت بابا بكرة .. فرحتي بكلام سيف و الي صار بكري .. فرحتي اني خديت لي بابا لبسه عربي .. اول مرة في حياتي نشريله حاجة .. فرحتي و انا نستنى في بكرة ..
الحمدلله رب العالمين حمداً كثيراً طيباً مباركاً فيه ♥️🌺
نضت الصبح من الفجر .. خليت ايمان راقده ..ضميت الصالون و بخرته .. لقيت حناي تصلي و قايمه ايديها قدام القبله .. درتلها فطورها و بوستها على راسها و خشيت للمطبخ ..
شن اندير ؟؟ امممممم نبدا بي المبطن ؟؟ و لا ندير المحشي قبل ؟؟
وتيت خضرتي و نظفتها و درت المبطن .. ناضت ايمان .. و خشت معاي للمطبخ .. جت عمتي .. لحضات و جت منار .. لحضات و جى محمد .. اتصل بيا نزار .. قالي شن في ؟؟ قتله بوك طالع اليوم تعالى حوش حناك توا .. قالي بجد 😳😳 .... خش عليا سيف انتظار ... قتله ايه ان مش فاضيه توا بنصكر ..
كيف بنعاود نتصل بي سيف ناداني محمد .. قالي كيف يصير نمشي للسجن و لا كيف ؟ ..
عمتي تبكي و تقوله نبي نمشي معاك .. قتلها عمتي خليك انتي طيبي معاي ..
قتله لحضه و نقولك ..
طلعت كلمت سيف .. قالي من بيروح بيه ؟ قتله محمد خوي .. قالي خليه يكلمني لان كل شي جاهز و انا في السجن توا ..
قتله تمام به ..
مشيت لمحمد قتله هدا رقم الراجل صاحب المحامي سعدالدين .. اسمه سيف .. كلمه و تو تلقى بابا يستنى فيك ..
خدا مني الرقم و طلع طول مشى للسجن ..
عمتي تبكي .. منار تبكي ... حناي في الدار تنادي .. ما تقولولي خيركم كلكم في المطبخ ؟. شن في ؟؟
عمتي لا ما فيش شي غير قلنا نتلقطوا ع الغداء اليوم كلنا ...
جى نزار .. يسأل فيا كيف و شن صاير فهميني !! .. قتله انا مش فاضيه ..
قالي وين محمد ؟ قتله مشى بيجيبه .. قالي ياريته استنى شويه مشيت معاه ..
عمتي بدت في تطييب الكسكسي .. منار و ايمان يديروا في المحشي ..
انا نجهز في سُفر الشاهي و القهوة و متارد الحلويات ..
خشيت للدار نحدد في السواري العربيه و علقتهم كلهم و هو بعدين شن يحب يلبس .. رجعت بحداهم في المطبخ ..
ايمان بكل برادة : شن إحساسك منار ؟ 😁
منار : و النبي فكيني منك ..
إيمان : به شن إحساسك ماريا 😅
قتلها إحساسي إحساس عروسه اليوم زفتها بعد صبر سنين ♥️🌺
وتصبحوا ع خير ونتلاقوا غدوة ان شاءالله نبيكم نتفاجأ بتفاعلكم ولايكاتكم
❤🌸❤
