🌸ولدتني_عاهرة 24🌸
خديت ألعاب طفوليه كلها و ما أحلاه الشعور لما تحسي إنك مدللة عند شخص .. طلعت بي ألعابي للسيارة و خليته يخلص في المحل ..
بالرغم الي سمعته اليوم من سيف بخصوص امي و قضية بابا كان ممكن يعيشني في إكتئاب و موجة حزن و وجع كبير .. الا إن وجوده معاي شال حزن كبير من قلبي .. لدرجة إني انا ما بكيتش هلبا .. مش بعادتي يعني .. خوتي معاي .. محمد ح يتزوج .. نزار راجع .. بابا ح يطلع .. سيف معاي .. ما نبي شي الا إني نعيش مدللة بينهم ♥️♥️
ركب السيارة و قالي نتغذوا برا ؟ قتله ايه جعانه انا 😌
مشينا مطعم أول مرة نخشله بس الواضح ان سيف زبون فيه لان العاملين كلهم يعرفوه ..
جابوا الغذاء و كان سيف كل شوي يوكلني بي إيده طبعا الحركة هادي فيها تواصل روحي عجيب و كنت نتحشم نفتح فمي قدامه بس كان غداء حلو تغذينا و قتله تعرف عندي رغبه نرقد ..
قالي ع طول 😍😍
قتله روح بيا 😌
ركبنا السياره و في الطريق قعدت نسأل فيه شن بيصير ؟ و قعد يفهم فيا ..
روحت و دخلت العابي و منار متفاجأة 😳😳 قتلي شن هذا الألعاب ؟
قتلها ألعابي 😌
قتلي خديتي مرتبك ؟
قتلها لا 🤭
حطيتهم كلهم ع سريري .. و قتلهم اقعدوا عاقلين 😌 و ما تعاودوا شي لي سيف 🤭 لما نغير ملابسي غمضوا عيونكم باهي ؟ 🤭🤭
منار 😳😳 قتلي خيرك شن صارلك ؟
قتلها شي ..
قتلي محمد كلم حناك بكري .. قتلها ايه !!
قتلي بابا قال به ديروا العرس .. قتلها الحمدلله يارب و أخيراً بنفرحوا 😍😍
قتلي العرس هذا لا ماما و لا بابا ح يحضره 😔😔 ..
قتلها و من قالك ؟ مرات بابا يحضره 😉😉
قتلي ان شاءالله يارب ♥️
قتلها إيمان تعرف ؟ قتلي لا .. مرات يجي محمد يرفعنا لي حوش عمتك و نقولولهم ..
قتلها به تمام ..
خشيت رقدت .. نوضتني منار قتلي نوضي خوك جاي بنمشوا ..
نضت نصارع في النوم .. قتلها امشي انتي و حناك و خليني انا راقده 😴
قتلي نوضي ع خاطر خوك ..
نضت لبست و طلعنا مشينا حوش عمتي و في الطريق خذينا بكلاوة و ورد 🌺🌺
قتلي إيمان شنو !!
قتلها في من يجوه ضيوف يقوللهم شنو !! 😳😳
قتلي مش طايقني صبر 🤭🤭
قتلها حناي تو تقولك ..
طلعت إيمان سلمت على محمد و احنا قعمزنا في الصالون .. و خشت فرحانه و قالت لي أمها شوفي محمد شن جابلي 😍😍
و جت لي حناي تقوللها شوفي محمد شن جابلي 😍😍
قتلها هاتي نشوف .. ورتني حديدة ذهب .. قتلها محلاها تلبسيها بالهناء يارب ♥️♥️
مشت ورتها لي منار و أمل ..
قالتلها أمل وووووك تحسيها زمنيه متع عزايز زمان .. خيره ما مشاش لي ( ..... او ....... ) عنده حاجات تهبل واخدلي منه خطيبي ..
قتلها إيمان أصلا انا أكثر شي نحبه فيه هو ذوقه الزمني القديم 😍😍
شربنا قهوة و فتحتلهم حناي موضوع العرس .. قتلها إيمان عادي ايه 😍
قتلها حناي اسكتي انتي يا قيبوعه و ارزني شويه ..
إيمان : تي مش برانيه انتو يا حناي 🙈
قالتلها عمتي تو نقول لي بوها و يصير خير .. قتلها حناي و ناديه توا أسأليه شن برانيه احنا ؟
جى عمي مصطفى قعمز معانا .. و قعد يهدرز على حناي و قاللها عادي نديروه يوم واحد هي و اختها ..
طبعا ايمان مش سايعتها الفرحه و أمل مش عاجبها شي .. مسكينه النوعيه هادي .. من كثر الحقد الي في داخلها تفوت عليها في لحضات فرح كبيره .. تعشينا في حوش عمتي و روحنا ..
كلمني سيف و قتله عرس محمد تحدد خلاص و قريب ..
كالعاده أنا و حنيني و ذكرياتي في فراشي ..
جى نزار و قعد عندنا في حوش حناي .. لأن حوشنا انباع خلاص بالأثاث الي فيه .. و أغراض امي كلها رفعوها لي حوش خالي ..
فاتت الأيام تجري .. كنت لاهيه بين اغراض العرس و تجهيز شقة محمد .. بين حوش حناي .. بين قفطاني الي بنلبسه .. و كل الحوسه كانت على راسي ..
و في عز حوستي انا و منار في مطبخ محمد نجهزوا فيه .. اتصل بيا سيف .. قتله حبيبي مش فاضيه بكلللل ..
قالي نبي نشوفك .. قتله أبدا مش فاضيه .. قالي ضروري نشوفك .. قتله مش ح نلحق انا في شقة محمد ..
قالي وين مكان الشقه ؟ قتله في (.......)
قالي لما نوصل نكلمك اطلعيلي حتى شويه .. قعدت لاهيه في المطبخ لين اتصل بيا قالي انا قربت في أما عمارة انتي ؟ قتله تو ننزلك ..
حطيت وشاح على راسي و نزلت .. قتله بسرعه قولي شن في نخاف محمد يجي توا .. قالي اركبي بسرعه .. قتله سيف ما نقدرش توا 😳
قالي بسرعه و نردك .. ركبت معاه و انا ريحتي كلها ( وركينه )
أعطاني ورقه و قالي اقريها .. فتحتها لقيتها مطبوعه و مختومة .. من فوق مكتوب أمر بالأفراج ..
في كلام مكتوب ........................
في أسم بابا ...
_________________
تلفتت له قتله شن هذا !!!
قالي أمر بالأفراج عن بوك و تبرئته من التهم الي نُسِبت إليه ..
سيف مزال ما استوعبتش انا 😳😳
شد إيدي و قالي يعني بوك براءه و ح يفرجوا عليه و مسألة وقت بس ياخدوها الأجراءات و يقعد معاكم ديما ..
شديت راسي .. مش مصدقه الي سمعته .. شديت في رقبته و قعدت نبوس فيه من خده .. من راسه .. من خشمه .. من وذنه .. وين ما تجي البوسه تجي ..
بابا ح يطلع سيف .. ح يطلع ..
كنت واثقه اني ح نعيش اليوم هذا و الفرحه هادي ..
يااااااااارب حمدك و شكرك يااااااااااااااااارب .....
♥️🌺♥️🌺♥️🌺
قالي هيا انزلي مرات محمد يجي ..
قتله لا مش قادره ننزل 😍😍 .. طبعاً سيف يضحك عليا و بحجم سعادتي كانت سعادته .. نزلت من السياره و ركبت العمارة ..
إحساس الفرحه غامرني .. حاسه روحي فراشه تطير .. حاسه روحي نشيطه ..
ركبت لي منار .. قتلي شن في ؟
قتلها بابا أفرجوا عليه 😍😍👏🏻👏🏻
عيطت منار و قعدنا نحضنوا في بعض .. فرحانين .. فرحانين .. فرحانين ..
قتلها ما تقوليش لي حد .. أكيد سيف تو يكلم محمد ..
قعدت تدعي لي سيف .. كملنا حوسة المطبخ و احنا نرقصوا و نغنوا 😍😍
جى محمد و جاب معاه عشاء و قعمزنا تعشينا لين حسيت بتخمة .. اتكيت و قعدت نقول لي محمد ساعدني نغسل ايديا 😁😁
منار تقولي هيا نوضي اغسلي ايديك .. و انا نقوللهم ساعدوني يا خوتي ارجوكم اشعر بالتخمة 😄😄
و رجعتلي الفرحة .. و إكتشفت إن روحي مرحه .. و عندي القدرة على الضحك و المزاح و الصبينه 😉😉
طلعنا من شقة محمد و حطينا منار في حوشها و روحت انا حوش حناي ...
خشيت للفراش طول رقدت .. و في الليل متأخر حسيت بحركة فقت .. لقيت نزار في المطبخ يبي ياكل .. قتله نديرلك حاجة تاكلها ؟
قالي خاطري في مكرونه 😅
قتله هيا نديروها 😁
طيبنا مكرونه و قعمزت كليت لين طلعة من خشمي ع قولة نادره 😁
و كل حد فينا خش فراشه الفجر ..
الصبح نضت لقيت مرت عمي عندنا .. و خطمت إيمان و عمتي كانوا ياخدوا في النتيجة من المرجعي للفاتحه ..
قتلي خديتي قفطان ؟ قتلها مزال 🤦🏻♀️
قتلي شفت قفطان يطلع عليك يهبل و ذوقك انتي بالضبط .. قتلها وين ؟ قتلي في (....)
قتلها تو نشوف نزار بالك يرفعني نشوفه ..
حوسه .. حوسه .. حوسه ....
مشيت شفته القفطان و ع طول خديته من غير تردد .. روحنا و تاني يوم كلمني سيف قالي بنتلاقى مع محمد خوك توا .. قتله ان شاءالله ع خير يا رب .. قالي اسمعي .. قتله نعم !
قالي بنبعتلك معاه هديه ..
قتله كيف !!
قالي وصلت انا نحكوا بعدين ..
قعدت نقول زعمه شن يقصد ؟؟ يقصد السلسله زعمه ؟؟.
خديت ورقه و قلم و قعمزت نكتب في أسماء الناس الي بنعزموها ..
كل مرة نتفكر حد .. نكتبه طول ..و نقرا القائمة على حناي و تقولي لا لا امسحيها هديكا معاش بنواصلها ما جتنيش لما جتني الجلطه ..
نمسحها .. و تقولي اكتبي فلانه مسكينه كانت كل يوم تتصل و تجي تسأل عليا لما جتني الجلطه .. و ما بتش تكمل القائمة 🤦🏻♀️
مرة نمسح و مرة نكتب .. لين سمعت صوت سياره .. ما عدلتش قلت هذا اكيد نزار جى .. و فجأه و انا مقعمزه نكتب و نمسح .. نسمع في صوت محمد و معاه حد يكلم فيه .. تلفتت لقيت بابا واقف ع الباب ..
تفاجأت و نضت حضنته و نبكي و نقوله الحمدلله الحمدلله الحمدلله .. و مشى سلم على حناي و قعمزنا و انا و الله مش مصدقه و الله ..
خش نزار انصدم و قعد يحضن في بابا و يبوس في راسه .. قتله حول نزار حول حتى انا بنبوس راسه .. و مشيت بوست راسه ..
نزار قال لي بابا شفتها بنتك كيف تناشب ؟
قاله بابا طفله قاعده ..
جت منار تبي تبات عندنا .. خشت عيطت و سلمت على بابا .. فاتت ليلتنا نهدرزوا و نضحكوا و الفرحه غمرتنا كلنا ..
قال بابا هي الي مش متوضي يتوضى خلي نصلوا مع بعض ..
اووووووووووووووووووووف و كأنه فعلاً لازم من سكون الروح بين يدي الله عز و جل .. لازم من سجدة شكر .. لازم من تلاوة القرآن لي ذات الله عز و جل ..
نضنا توضينا للصلاة ..
وقف بابا في الأمام .. وراه محمد و نزار .. و انا و منار و حناي وراهم ..
(اللَّهُ أَكْبرُ، اللَّهُ أَكْبرُ أشهدُ أن لا إلَهَ إلَّا اللَّهُ ، أشهَدُ أنَّ محمَّدًا رسولُ اللَّهِ ، حيَّ على الصَّلاةِ ، حيَّ على الفلاحِ ، قد قامَتِ الصَّلاةُ ، قد قامتِ الصَّلاةُ ، اللَّهُ أَكْبرُ، اللَّهُ أَكْبرُ لا إلَهَ إلَّا اللَّهُ )
♥️الله أكبر ♥️
