🌸ولدتني_عاهرة 15🌸
خشيت دوشت .. و الدموع الي نزلوا من عيني تعادل مية الدوش .. قعمزت في الدوش و الميه تصب عليا ..
يا ترى شن نهايتي !!
شن نهايتنا كلنا !!
ليش ما نكونش زي منار او محمد او نزار ؟؟ عايشين حياتهم من غير ما ينشبوا في الماضي ؟؟
ليش أنا مُصره نعيش في الماضي !!
علاش كمية الوجع هادي كلها !!
شن الي قدرت امي تزرعه فيا و مزال ما عرفتاش ؟؟
نضت طلعت من الدوش .. لقيت سيف متصل بيا .. قعدت نشوف لي مكالمته و نبكي .. إرحل عني سيف الي فيا سادني ..
روحت منار و قعدت انا و حناي .. حناي ضعفت هلبا بعد ما جتها جلطه .. كنت نتمنى لو أن عندي أم زيها ..
ريحتها أخلاق .. بي رداها الباصمة الزمني .. بي حديدتها الي ليها سنين ما تنحتش من إيدها .. بالوشم الي في إيدها و في كل مرة تقولي زعمه هذا كيف ينحوه ؟؟ ..
طعمة خبزتها حياة .. طاسة السحلب من إيدها تفائل ..
.....
جى محمد خوي .. جايب معاه خضرة .. و لحم و كل شي ..
قالي خيره عيونك هكي ؟؟ كنتي تبكي ؟؟
قتله متضايقه شويه بس .. حطني تحت ذراعه و قالي شن الي مضايقك ؟؟
قتله منار روحت و حسيت روحي ح نستاحشها .. خشينا لي حناي .. سلم و قعد يهدرز شويه .. بعدين قال لي حناي بناخذ رأيك في موضوع ..
قتله حناي إن شاءالله خير !
قاللها شن رأيك نتقدم رسمي لي إيمان ؟؟
أنا تفاجأت 😳😳 .. قاللها أنا البنت ما عندي ما نقول فيها .. لكن لو بوها بيعارض أنا مش ح ندير أي خطوة ..
قتله حناي خليه عليا أنا الموضوع هذا .. درت قهوة و فعمزت جنبهم و قتله إيمان عندها علم ؟؟ قالي لا مزال ما قلتلهاش ..
قعمز شويه محمد و طلع .. مشيت خديت تليفوني و اتصلت بي إيمان .. قتلها انتي وين ؟
قتلي برا طالعين ناخدوا في حاجات فضانية أمل الجمعه ..
قتلها تقدروا تخطموا ؟ قتلي به شويه و نجوكم ..
و بعد شوي جت إيمان و عمتي و أمل .. خشوا قعمزوا و عمتي كانت تاعبه من دوران المحلات .. أمل كالعاده لازم تحسسك إنك أقل منها و مش من مستواها ..
قعدوا يوروا فيا في بوكسات هدايا لي أهل العريس .. قتلهم شن بتحطوا فيهم البوكسات ؟ قالولي عطر من عبدالصمد القرشي و مصحف و سبحه ..
قتلهم علاش هذا كله 😳😳
قتلي أمل انتي شن عرفك يا ماما اصلا هذا يعتبر شي عادي جدا .. لان بسلامته مستعجل و ما عنديش وقت بكل نحجز و ناخذ الحاجة الي ترضيني ... قتلها عادي مدامه مستعجل ديري حاجة بسيطه ما فيش داعي لي هذا كله .. ضحكت أمل و قتلي شن تقولي انتي ؟ تي هادوا تعرفي عيلة شكون ؟؟ عيلة (.......) راهو ..
أنا : إيه به ان شاءالله ربي يهنيك 🙄 ..
تلفتت لي ايمان قتلها تعالي نبيك .. نضت خشيت الدار و لحقتني إيمان ..
قتلي شن في !
قتلها محمد كان هنا ..
قتلي به !!
قتلها كلم حناي عليك و قاللها نبي نخطبها ..
عيطت إيمان من الفرحه و حضنتني طول .. قعدت تبكي و تقولي بجد بالله عليك ؟
قتلها ايه بجد ..
قتلها لكن ما تقوليش انتي .. لانه خايف من ردة فعل بوك يرفض ..
قتلي به شن الحل ؟ قتلها هو قال لي حناي تصرفي .. قتلي حناي زعلت من بابا ع خاطر موضوع اياد و جتها جلطه .. ما اعتقدش بابا يرفضلها طلب توا ..
بعدين بابا يحب محمد هلبا ..
قتلها حتى انا بوك يحبني هلبا و مع هذا رفضني .. قتلي لا أنا مش إياد خوي .. نقتل روحي كان يقولوله لا ..
قتلها خلاص انا اعطيتك علم .. و انتي تصرفي مع اماليك .. لان محمد قال لو رفضوا مستحيل مزال نفتح الموضوع .. قتلي حي عليا 😰 لا لا مستحيل يرفضوا ..
طلعنا قعمزنا جنب عمتي و امل ..
بالرغم إني خلوقه أكثر من أمل .. و احلى منها .. و انا خريجة قانون و هي معهد ..
لكن نحس بنقص قدامها .. لانها عندها الي ما عنديش أنا .. عندها أم و أب و سمعه كويسه و حب و حنان .. عندها ترابط أسري .. عندها أرشيف رائع من طفولتها ..
هنا مكمن الثقه بالنفس 👌🏻👌🏻 هنا أصل إعتزازك بنفسك ..
روحت عمتي و بناتها .. و خشت حناي رقدت و خشيت أنا فراشي ..
... كان في قلبي رسالة لكل أم ..(( إنتي الي تصنعي مستقبل بنتك .. انتي تعرفي وين تحطيها .. انتي الي تبني فيها طموحها .. راحتها .. استقرارها .. بنتك تواجه في مشاكل في حياتها ؟؟ راجعي اسباب المشاكل هادي ح تلقي انتي السبب فيها .. ما علمتيهاش تواجه صعوباتها .. ما زرعتيش فيها ثقتها في نفسها .. كل عُقد طفولتك حطيتيها فيها ... و كأن عندك طاقه وحدة بس .. بتحطيها في زوجك .. و بتهملي صغارك .. او بتحطيها في حوشك و بتهملي زوجك .. او بتحطيها في صغارك و بتهملي حوشك و زوجك .. و في جميع الأحوال انتي الخاسره ))
رقدت بعد جهد و صداع رهيب في راسي .. تاني يوم نضت و جهزت نفسي للطلوع .. في صوت في داخلي رباني من الله عز و جل .. يقولي نوضي امشي لي بوك ..
رباني لان عندي طاقه رهيبه و قوة عزم و إصرار عجيب .. في معيَّه من الله عز و جل ..
طلعت و مشيت للسجن .. سجلت إسمي و قعمزت نستنى .. مشوا بيجيبوه ..
كيف بنشوفه .. كيف شكله .. شن الي تغير فيه .. كيف ح يكون رد فعله ...
زعمه يخونني عزمي لما نشوفه ؟؟
قلبي خلاص بيطلع .. ما أعتقدش اللحضات هديكا مرت بدقائق او ثواني الي احنا نعرفوهم .. لا لا كانوا بتوقيت زمني غير ..
الدقيقه بي ساعه .. الساعه بيوم .......
كل شخص يخش لصالة الزيارات نقول هذا هو .. و ياخد طريق تانيه و يسلم على عيلته .. نشوف لي ظل شخص يقترب من الباب .. هذا أكيد بابا .. و اول ما يخش يسلم ع ناس تانيه ..
و نرجع نراقب الباب .. أهو في ظل جاي .. قرب الظل هلبا .. قلبي بيوقف ..
خش شخص قمحي .. لحيته خفيفه كلها شيب .. لابس سوريه عربيه .. في ايده في ساعه قديمة جدا .. شعرة حواجبه طويله نازله على عيونه .. قعمز الراجل ..
أها .. معناها عنده زيارة مسكين يستنى فيها ..
رجعت عيوني للباب نراقب .. كل مرة يخش حد .. ليش عطلوا هكي .. فات 10 دقايق .. فاتت ربع ساعه .. فاتت ثلث ساعه ...
أفراد السجن كلهم عيونهم عليا و على الراجل .. و يتكلموا و يشبحولنا ..
ناض الراجل يسأل في أفراد السجن من شكون الزيارة ؟ .. كان واضح عليه كسرة الخاطر ..
شاورلي الشرطي بي أيده .. تلفت لي الراجل .. جاني الراجل قالي انتي طالبتيني للزياره ؟؟؟
............ آآآآآآآه يا وجعي ..
نضت وقفت .. فمي يرجف .. كلماتي متقاطعه .. نضغط بسنوني ع فكي بقوة ..
رقبتي في حد يخنق فيا منها .. نبي نتنفس .. دموعي نزلوا ..
بصعوبه قتله ايه ..
عيونه دمعوا ... ااااااه ما احلى هالعيون .. قالي انتي بنتي ؟؟
هزيت براسي و كسرة خاطري أكبر من كسرة خاطره .. خذاني في حضنه ... و انهرت بالبكاء .. بكيت بكاء طفله عمرها 7 سنين .. اااااااه يا بابا ااااااااااه ..
قعدت شاده في رقبته بقوة .. و لما شافوا وضعنا افراد السجن طلعونا و حطونا في حجرة بروحنا ... يا عشقي .. يا فخري .. يا سندي .. يا راحتي .. يا ضهري ..
حضنته .. حضنته .. حضنته ..
هادي من ريحة الجنه .. هادي ذاتي الضايعه مني من سنين .. هذا نبضي ..
قمت راسي نشوف لعيونه .. لي شعره .. لي لحيته .. هنا تحت عينه اليسار في شامه .. هات إيدك نبوسها .. هات نشمها ..
مسحتله دموعه .. لا ما تبكيش أرجوك .. ارحم قلبي يا بابا ..
حضني و قالي سامحيني يا بابا ..
ايه ايه تكلم .. تكلم .. هذا الصوت يرن في آخر ملفات ذاكرتي .. تتفكر لما سجلتلي شريط كاسيت و انت تعلم فيا في أسمي ؟؟
كنت تقولي قولي ماريا .. و انا نقول يايا .. يايا ..
زيد تكلم بابا .. رجعني لي إيام نجري نجري و نرتمي في حضنك ..
هذا الصوت مزمار من مزامير الجنه ..
تتفكر في الفيديو الي صورتهولي ؟ و انا نتعلم نقضي حاجتي ع المحبس ؟؟
كنت تغنيلي (( هات المحبس تعالى وريني ايش عملت اليوم يا حسين عارفك شاطر و مهنيني ديما معبي المحبس زين ))
تتفكر ؟؟
يهز راسه و يقولي نتفكر .. حضنته ..
و حضنته ...
و حضنته ...
خديت منه قوة .. خديت منه صلابه .. خديت منه هواء ..
