#ولدتني_عاهرة / 41
غيرت ملابسي و طلعت و أنا حاسه بفرحه و متحشمه و داستها في قلبي ..
قعمزنا قعدنا نهدرزوا .. شن بناخد و شن بندير و شن بنشري ..
قتلي منار كلمك سيف ؟؟
قتلها نهائي 😔 و لا كأنه بيخطبني ..
قتلي به كلميه إنتي .. قتلها كلمته بكري و قالي مش فاضي .. يعامل فيا و كأني متهمة عنده ..
أنا ما غلطتش هو الي غلط معاي ..
قتلي منار انتي مش غالطه 😳 ؟؟
قتلها ايه مش غالطه .. يا سيدي يعتبرني حطيته في إختبار و نجح فيه و هكي نبدا حياتي صح ..
قتلي ترفضيه و تقوليلي اختبار !! 😳 .....
قتلها انتي ما تعرفيش كيف عاملني و شن قالي لما قتله ايه ما نبيكش ..
قتلي ماريا سلم وخيتي رضي الراجل و ريحيني ..
اتصلت بيه .. قالي نعم !!
قتله مش كأنك زودتها شويه ؟؟
قالي عندي خدمة مش فاضي .. قتله نبيك في موضوع ..
قالي احكي نسمع فيك .. قتله نبي نشوفك ما نبيش نحكي في التليفون .. قالي أنا برا طرابلس عندي خدمة ..
قتله آمته مروح ؟
قالي ما نعرفش ..
قالي محمد خوك خاش عليا انتضار نرد عليه و نعاود نكلمك .. صكرنا الخط ..
قتلها منار شفتي كيف يعامل فيا ؟؟ 🤨
قتلي عادي ما رضاهاش في روحه انك ترفضيه .......
قعدت نستنى فيه يعاود يتصل بيا .. وبكل برود لا اتصل و لا بعت رساله ..
رقدت من غير ما نعاود نتصل بيه .. و في الصبح نضنا انا و منار و ضمينا الحوش و درنا فطور و جت ناديه فطرت معانا .. و قعدت تهدرز و تبصر .. ناضت ناديه بتحط الغداء ..
و أنا و منار نهدرزوا في الدار جنب حناي .. العشيه جى محمد و إيمان .. قالي محمد أمالي سيف جايين يوم الخميس .. قتله بعد غدوة ! 😳
قالي ايه ..
قتله بس سيف برا طرابلس .. قالي ايه نعرف .. بالك بيجيبهم خوه او بوه ..
اعطاني فلوس قالي خودي شن ناقصك تو ترفعك إيمان .. و كان ما سدوكش بكرة نزيدك ..
قتله لا يسدوني و بزايد ..
قالي خلاص تو تجيك إيمان غدوة الصبح و خودي شن تبي ..
طلع محمد و قعدت إيمان تحكي ع البيبي و كيف مشت للدكتورة و دارتلها جهاز و و و ..
جتني ناديه قتلي انتي اطلعي الصبح و انا نغير بساطات الصالون و نضم الحوش و نرتب كل شي .. قتلها به تمام ..
قعدت نقول توا معقوله متفاهم هو و محمد حتى ع موعد جية إماليه و ما يبيش يكلمني ! 😰
ما بيتش نكلمه .. و تاني يوم جتني إيمان و طلعت خديت شن ناقصني .. و جهزت نفسي ليوم الخميس ..
جت عمتي و من أول ما خشت و هي تبخر في الحوش و تحط في الوشق .. و تهتم بي أدق التفاصيل ..
سشورت شعري و لفيته و حطيت ميك اب خفيف .. جى بابا باسني و حضني .. و صورت انا و اياه و قالي أنا برا مع خوك محمد ..
لبست قفطان .. لبست إكسسوار خفيف .. حطيت مناكير .. حطيت عطر ..
نستنى فيهم آمته يجو .. نتصل بيه ؟؟ لا لا مش ح نتصل .. به نبعت رساله ؟؟ لا لا مش ح نبعت .. معقوله قلبه أسود للدرجة هادي ! 😰
جو أمالي سيف .. جابهم خوه .. استقبلتهم عمتي و ناديه .. حناي في الصالون مقعمزه ..
منار معاي في الدار ترقد في نزار ..
إيمان في المطبخ ..
مشيت لي إيمان في المطبخ .. قتلها شكون جى ؟؟ قتلي مش عارفه ما شفتش .. لكن في 3 كنادر في المدخل 😁😁
جت منار قالت انا بنخش نسلم .. خشت منار و انا و إيمان في المطبخ ..
امته بنخش يا إيمان آمته ؟؟ 😍😍
إيمان تقولي مازال لين تجي أمي ..
قعدت نستنى لين جت عمتي قتلي تعالي سلمي .. قعمزي شويه و لما نشاورلك انا بعيوني اطلعي .. ابتسمي بي رزانه .. ما تاخديش راحتك في الهدرزه .. لما تقعمزي ما تحطيش رجل على رجل ..
قتلي إمشي حطي عطر و بعد ما نخش أنا خشي إنتي ..
خشيت للدار حطيت عطر .. قلبي ينبض بقوه متوتره هلبا ..
خشيت للصالون .. سلمت على أم سيف و أخته هيمانه و مرت خوه الكبير ( نسرين ) و قعمزت جنب عمتي ..
كانت هدرزتهم و كأنهم يعرفوا بعضهم من سنين .. عمتي منسجمه في الهدرزه ..
ناديه كذلك ..
قتلي ابله مريم (أم سيف ) أحنا جايين نتعرفوا و نهدرزوا بس .. مدامكم تعرفوا بعض و سيف يبيك يعني احنا جايين هدرزة نساوين و خلاص 😉
قتلها عمتي البركة فيكم ..
قعدوا يهدرزوا و شويه شاورتلي عمتي بعيونها و إستاذنت و طلعت ..
خشيت للمطبخ جنب إيمان .. و قعدنا نهدرزوا لين نادتني عمتي .. قتلي تعالي سلمي الناس بيروحوا ......
طلعت سلمت .. قتلي هيمانه اعطيني خاتم من خواتمك .. قتلها حاضر .. نحيت خاتمي من صبعي و اعطيتهولها ..
قتلي أبله مريم راهو يتصل و يعاود و يقول خودوا منها خاتم و قولولهم التلبيسه الخميس الجاي ..
أنا تفاجأت 😳😍
قتلها عمتي تشرفونا في أي وقت ..
قتلها أبله زينب ما تكلفوش روحكم في شي و احنا مقدرين الظرف .. غير ولدي مجيوب ني الله غالب ...
قتلها عمتي كلهم هكي الشباب ربي يحفظهم .. قتلها أبله مريم خلاص توا كان نبوا حاجة تكلمك هيمانه تاخد قياسك ..
سلمت عليهم و قرصتني هيمانه و هي طالعه 🙈♥️ و فرحتي كانت بالدنيا ..
روحوا و قعدنا مقعمزين كلما نهدرزوا .. جابولي معاهم ورد و شكلاطه و بكلاوه ..
روحت ايمان .. و روحت منار .. و في الليل جى إياد .. خشيت للمطبخ ما نبيش نحكي معاه .. جى في المطبخ .. قالي تم الموضوع خلاص ؟
قتله إياد أرجوك مش ح نسمحلك تحكي معاي احتراماً للرجل الي بعتلي اماليه ..
قالي و أنا ؟ طلعت من المطبخ و خشيت للحمام .. قعدت في الحمام لين سمعت صوت بابا طلعت لقيت عمتي و ناديه مقعمزين و إياد برا فم الحوش ...
قالي بابا خلاص اتفقتوا يوم الخميس التلبيسه ؟؟ قتله ما نعرفش عليكم انتو 🙈
قتله عمتي ما فيش داعي لي فضانية الرجاله .. يوم الخميس تلبس دبلتها و خلاص ..
و انت اتفق مع الراجل على الفاتحه و خلاص ..
روحت عمتي و خش بابا داره .. و خشيت انا فراشي .. لقيته باعتلي رساله ( الف مبروك عليك أنا )
رديت عليه ( و مبروك عليك أنا )
و ما عرفتش كيف نرضيه ..
خداني النوم و نضت الصبح لقيته متصل بيا .. و باعتلي صورته ع النت ..
اول ما شفت صورته .. حسيت بقداش انا مستاحشاته ..
لهيت في التجهيز و كل يوم نطلع انا و ايمان و مرات انا و منار ندور في قفطان للتلبيسه .. و نحجز في العشاء و ندور في مزين ..
خديت قفطان و ما حما حصلتش مزين .. قتلي ايمان احنا نمكيجوك انا و منار و خلاص ..
جى يوم الخميس .. و جهزت كل شي .. و صورت انا و بابا و انا و منار و انا و حناي .. ندور و نصور .. جو أمالي سيف .. و خشيت سلمت .. لقيت امه و اخته هياتم و هيمانه و هيام و مرت خوه نسرين و وفاء ..
لبستني أبله مريم الدبله و صورنا و غيرت قفطاني لبست القفطان الي جابوهولي هما ..
حطينا العشاء نتعشوا .. سألتني وفاء مرت خو سيف مواليد كم انتي ؟؟ قتلها هياتم ليش تسألي فيها ☺️ ؟؟
قتلها لا غير تبان صغيره عليه هلبا .. قتلها هياتم يبو بعضهم و ان شاءالله ربي يهنيهم ♥️
تعشينا و قصينا الكيكة و ضحكنا و هدرزنا و قعدوا البنات يحكوا على سيف و طبعه .. و بعدين روحوا ..
قعدنا نهدرزوا و نحكوا شن صار و نشوفوا في الحاجات الي جابوهملي .. طلعت لقيت خروفي الي جابوه يبي ميه .. اعطيته ميه و قعدت نقوله اهلاً يا خروفي اهلاً .. صورنا سلڤي و درنا لقطات .. و لما ناض وقف خفت و نضت نجري ..
خشيت نشوف في السوابيت و نشوف في العطور .. الدبله حلوه على إيدي منار صح ؟؟
منار خليها في حالها نخمم في المطبخ شن بيضمه ..
اتصل بيا سيف .. قعدت نشوف في الرقم و نقول لا لا لا مش معقوله تنازل و اتصل 😳
رديت عليه .. قالي الف مبروك .. قتله الله ييارك فيك .. قالي انا كيف طالع من مكاني الصبح نوصل طرابلس ..
نمشي حوشنا ندوش و نغير ملابسي و نتلاقوا في الحوش غادي ..
قتله باهي تمام ..
عجنت حناي الحنه .. و قتلي ضروري تحني .. قتلها حناي نزار كيف متوفي كيف نحني !!
قتلي الله يرحمه ليه اكثر من 6 شهور حتى الحزن هكي حرام .. نوضي حني باش ربي يحن علينا ..
حنتني حناي في ايدي شويه .. و حنت منار .. و حنت عمتي .. و إيمان قالت لا لا لا ريحتها في خشمي كارهتها ..
و بعد هدرزه طويله خشينا رقدنا .. تاني يوم الصبح نضت قلت لي منار بنطلع انا .. قتلي جمعه اليوم كيف بتطلعي !! 😳
قتلها لما ينوض بابا قوليله ان ماريا مشت لي حوش خالتي ..
قتلي ما تعطليش .. كلمت سيف قتله تعالى انت ارفعني اليوم جمعه مش ح نحصل تاكسي .. قالي تلقيني ع الطريق .. لبست و حطيت ميك اب و طلعت ..
لقيته واقف ع الطريق .. ركبت معاه و مشينا لحوشنا ..
خشينا للحوش .. نحيت وشاحي .. قرب مني باسني ع خدي و قالي مبروك ♥️ ..
قعمزنا .. قالي شن الموضوع الي تبيني فيه ؟
قتله توا تفكرته ؟
قالي لا متفكره لكن انتي قلتيلي ما نبيش نحكي فون و انا الصبح بس وصلت ..
قتله انت تبعت في فلوس لي امي مع شخص ؟؟
قالي أبداً .. و علاش بنبعتلها !!
قتله في شخص يمشي لي حوش خالتي يعطي فيهم في مبلغ كل شهر و قاللهم اي شي تستحقوه كلموني .. و اعطاهم رقمه ..
قالي اعطيني الرقم و تو نعرف شكون .. اعطيته الرقم ..
جى قعمز جنبي .. قام ايده حطني تحته .. قالي اوعديني تبطلي خوف و أوهام ..
قتله نفكر 😒😒
طلع دبله من جيبه .. اعطاهالي .. قالي لبسيني ... قتله لا 😒
قالي لا انتي مش نكايديه بكل ..
و علاش لا ؟؟
قتله انا لبستني امك 😌😌
قالي و أنا يلبسني بوك و لا شنو ؟؟
قتله نعرفش 😌
خدا إيدي و نحالي الدبله و عاود لبسهالي .. و أعطاني دبلته .. خديت إيده لبسته الدبله ..
و كانت أحلى لحضه في حياتي ♥️🌺
