#ولدتني_عاهرة / 9"
قعدت في مكاني نسمع فيهم .. قلبي ينبض بقوة .. هو مش إحساس بالخوف لا لا .. لكن في شي مس كيانك .. شخصيتك .. كرامتك .. مشاعرك ..
لملمت نفسي و قعمزت في فراشي .. أياد يتصل .. معناها يعرف شن صاير هذا علاش يتصل !! ..
ما بيتش نرد عليه .. نسمع فيهم يتناقشوا برا .. راجل عمتي يقوللها نوضي روحي حوشك .. عمتي ما تبيش تروح .. روح راجل عمتي و قعدت عمتي و حناي ..
أول مرة من 33 سنة عمتي تبات برا حوشها حرجانه.. و السبب أنا ... حسيت بخجل من قعدتي معاهم .. حسيت إني عبأ عليهم .. و تمنيت لو عندي مكان تاني نمشيله .. بالك وقتها يرجعوا زي ما كانوا ..
رقدت هديكا الليله و انا عيوني مفتوحات .. مزال ما نعرفش شن بيصير او شن صاير ... تاني يوم نضت الصبح و خشيت دوشت و لا كأني سمعت حاجة في الليل .. لقيت عمتي ادير في الفطور .. صبحت عليها و بوستها و قتلها آمته جيتي ؟ قتلي بكري شوي جيت ..
قعمزنا فطرنا مع بعض و كل واحد ياكل في اللقمه بالسيف و يساير في التاني و يحاول ما يبينش الحقيقه ...
ضميت الحوش و ما مشيتش للمكتب و قعدنا درنا الغداء و تغذينا .. جى إياد و كان يبي يتكلم مع أمه .. و قعدوا في الصالون بروحهم يحكوا .. خشيت للدار لقيت حناي تبكي .. قربت منها حضنتها قتلها حناي خيرك شن في ؟؟
كانت دمعتها من القلب طالعه .. تبكي بوجع .. قتلي ما في شي خاطري ضايق و خلاص .. اااااااااااااااااااه يا وجعي ... و كأنه مرض خبيث عافانا و عافاكم الله ينتشر في كل مكان .. زواج فاشل دمر حياة إنسان و هو في السجن من سنين ... دمر أطفال كل ذنبهم انهم جو من إمرأه مزال تبي تعيش مراهقتها .. دمر أم محرومة من ولدها سنين و تدعي في كل صلاة ربي يفرج عليه .. أم كل ما تتمناه ان ولدها المسجون يحضر جنازتها لو الله خدا أمانته ...
إحساسي بأن كل الي صار بسببي ملازمني .. ناضت حناي توضت و بتصلي و خشت عمتي قالت انها بتروح مع إياد ..
الملفت للنظر ان إياد فجأه بدا كأنه ما يعرفنيش ..كأني مش بنت خاله اصلاً .. مشيت كلمته نبي نوصل لحقيقه ملموسه معاش نبي نتوقع شي خلاص ..
قتله في شي ! قالي ليش ما ترديش ؟ قتله متضايقه منك و من تصرفك يومها ..
قالي بصراحه ما نقدرش نرتبط بأنسانه متجاهلتني و مش عاطيتني قدري و ما تردش على أتصالاتي .......
أنا هنا ضحكت بدهشة .. ضحكت ضحكة و كأني نقوله مبدع انت في الحجج .. انصدمت من الرد الي ما كانش متوقع نهائي بالنسبه ليا ...
وخرت خطوتين و صفقت عليه 👏🏻👏🏻 قتله برافوا برافوا ولد عمتي .. كنت نبي نقول هلبا كلام بس للاسف خشت عمتي ..
قالت ان ام صديق إياد توفت و بيمشوا يعزوا ...
قلت أهااااااا ربي يتغمدها برحمته ان شاءالله ☺️ .....
و في داخلي نقول انا نعرف و فاهمة كل شي .. روحوا و قعدت مقعمزه سرحانه في كل شي صاير .. مش قادرة نفهم شي ...
خشيت للدار لقيت حناي طايحه ع صلايتها .. جيتها انوض فيها حناي ... حناي ... حناي .... فايقه بس حركتها رزينه .. مش قادرة تتكلم .. خفت هلبا .. قعمزتها و شربتها اميه.. لسانها رزين مش قادرة تتحكم في الميه في فمها ..
نضت اتصلت بي عمي عبدالرؤوف .. راقد ما يردش عليا ... مرة .. 2 .. 3 .... ما يردش ..
اتصلت بي محمد خوي .. ما يردش ...
اتصلت بي نزار .. رد عليا .. قتله تعالى حناك مريضه .. جى نزار و بسرعه رفعناها للمستشفى و قالوا انها جلطه في الدماغ ...
انا و نزار برا مقعمزين بروحنا ... بياكلنا الحزن .. بياكلنا التفكير .. الألم ...
كانت ليله طويله ..
الصبح اتصل محمد خوي و قتله شن صار و جى للمستشفى ..
اتصل عمي و جى حتى هو و كل مرة يسمع حد و يجي ... روحت انا للحوش نبي نرتاح شويه و خليت عمتي و بناتها عند حناي .. اول ما خشيت الحوش اتصل بيا سيف و قالي نبي نشوفك ضروري .. قتله وين ؟ قالي في قهوة في المكان الفلاني نتلاقوا فيها .. قتله لا ما نخشش قهاوي أنا .. قالي اهاا و تخشي بحث جنائي عادي !!!
معناها امشي مكتبك و تو نجيك غادي .. قتله تمام ...
دوشت و لبست و طلعت مشيت للمكتب .. قعدت نستنى فيه .. و من كثر التعب و قلة النوم غفيت شوي ..
خش للمكتب لقاني راقدة .. طق ع الباب فقت انا طول ..
قتله اسفه تفضل .. قالي ليش وجهك هكي !! قتله حناي مبارح جتها جلطه و قعدت معاها في المستشفى و لما روحت بنرتاح شوي .. كلمتني أنت و طلعت جيتك ...
قالي ألف لا بأس عليها .. مفروض قلتيلي راهو خليت موضوعي مرة تانيه .. قتله لا عادي انت أهم .. قصدي موضوعك أهم ..
قعمز ع الصالون و قعمزت جنبه .. قالي أنا نفضل انك تروحي توا و مرة تانيه نتلاقوا و نحكي معاك .. قتله ارجوك ما تشغلنيش قولي شن في ..
قالي قريت ملف القضيه قريب 5 مرات و عندي إحساس ان في حد حاط الهيروين في سيارة المتهم ..
تفاجأت انا .. قتله كيف !!
قالي نبي نمشي للضابط الي كان ماسك القضيه و حوله للنيابه وقتها ح نفهم كيف جى البلاغ و كيف تم القبض عليه .. الضابط هذا تقاعد بس نقدر نوصله عادي ..
بس نبي نعرف منك شي و ياريت تكوني صادقه معاي .. قتله قولي شن تبي تعرف و وعد ح نكون صادقه ..
قالي من يمشيله زيارة بوك ؟ قتله ما نعرفش .. قالي في شخص مشاله زيارة بتاريخ 12/6/2009 و أعطاه ملابس و مواد غدائية و لما خش غرفته و تم التفتيش لقوا عنده حشيش ..
يعني يا ماريا .. في شخص ما يبيش بوك يطلع من السجن و كل ما تقرب موعد الافراج عليه تنحبك ليه قضيه جديدة و يحكموا عليه تاني ..
كان كلامه صدمة من ضمن صدمات الي في حياتي ... قتله كلامك خطير .. منو الي بيدير هكي !!
قالي انا نبيك تساعديني .. لان ادارة السجن شهدت ان بوك ما يتعاطاش و سلوكه كويس و من الناس المحترمة جدا ..
في ثغرة كبيره في القضيه و في ناس مش من صالحها بوك يطلع بكل ..
قتله سيف انت هكي خوفتني .. قالي بالعكس مفروض تفرحي لان لو وصلنا لي رأس الخيط و فهمت انا كل شي من بكرة بوك يطلع ..
تفاجأت و حطيت ايديا على فمي و قعدت نبكي .. قرب مني و قالي نوضي روحي ارتاحي .. هزيت براسي به و مش قادرة نتحكم في دموعي .. قالي خلي حد يروح بيك .. خطيبك اكيد ما عنده ما يدير توا ..
قتله لا تو نروح بروحي ... طلعنا مع بعض هو ركب سيارته و انا قعدت واقفه نستنى في تاكسي .. روحت و طول الطريق نفكر في كلامه و كل شوي يزيد وجعي .. امته بيتم الكابوس هذا !!
اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي، وأبوء بذنبي فاغفر لي فأنه لا يغفر الذنوب الا انت ...
خشيت للحوش غيرت ملابسي و رقدت ساعتين .. فقت من النوم لقيت اتصالات من منار اختي و سيف و نزار و عمتي ...
كلمت نزار و سألته على حناي و قال انها كويسه .. و قالي تو نجيبلك عشاء و نجي نبات معاك لين تطلع حناي من المستشفى ..
جى نزار و تعشينا و قعمزنا نهدرزوا .. قالي انا لما تبدا حناي كويسه بنطلع نسافر .. قتله وين 😳 ؟ قالي ايطاليا و منها نمشي لي اي دوله تانيه .. قلت يا ربي انا خيرني اليوم شن صاير كل مرة خبر .. نزار انت تعرف ان انا متعلقه بيك و ما نقدرش نخليك تسافر .. قالي انا معاش يمشي معاي الوضع هنا نسافر ع الاقل نبدا حياة جديدة .. انا لو قعدت هنا ح نضيع ..
قتله به و أنا ؟ قالي ماريا انتي امورك طيبه .. قريتي و تخرجتي و تو يجيك ولد الحلال و تعيشي متهنيه زي اختك منار .. قتله امته بتسافر ؟؟
قالي ح نطلع عن طريق البحر يعني ما فيهاش موعد بكل .. امته ما يكلموني يقولولي تعالى اركب بنمشي ..
سكتت برغم تعلقي و حبي لي نزار لكن الافضل ممكن انه يسافر و يبدا حياة جديدة بعيد ع الوجع هذا كله ..
قعدت كل يوم نمشي لي حناي في المستشفى و يوم عن يوم يتحسن حالها اكثر .. لين دارولها خروج .. و طلبوا عليها علاج طبيعي ..
روحنا و قعدت عمتي عندنا و مرت عمي و منار مرة مرة تجي و بنات عمتي يجو العشيه و يروح بيهم إياد في الليل ..
فجأة إياد بدا معاش حتى يبي يخش حوش حناه .. يسأل من برا لي برا بس ...
بالرغم اني كنت معجبه بيه .. أنا مش واجعني هو نهائي ..
____________
( الي يوجع بجد انهم يديروا كل شي باش يخشوا حياتك .. يسمح لي نفسه بكل شي .. يجيبلك شكلاطه .. يتودد بنظراته .. يوحيلك بحركاته انه مغروم و هايم .. و بمجرد ما تفرحي .. تحلمي .. تتمني .. تبني مستقبلك كله على نظرة منه .. تعطيه وجه .. هووووووووووووبا ينسحب ... )
___________
قعدت حايسه في حوش حناي .. بين ماشي و جاي .. و حوسة حوش و حلويات و عشاء و غداء .... و في ليلة الجمعه كانوا بنات عمتي إيمان و أمل بايتين عندنا .. سهرنا و هدرزنا و كنت في اغلب الاوقات نكون مستمعه اكثر من اني نهدرز معاهم ...
رقدت أمل .. و قعدت إيمان تهدرزلي على إياد و ان بوها قاله معاش تخدم معاي في المحلات .. و من يومين بس رجع إياد يخدم مع بوه .. قتلها هذا كله ع خاطر بيخطبني !!!
قتلي إيمان ليش انتي شن دخلك ؟ قتلها إياد و أمك كلموني المدة الي فاتت و بيخطبوا رسمي و بعدها صارت مشاكل مع بوك .. تفاجأت إيمان بكلامي 😰 قتلي شنو يعني كان محمد خوك تقدملي بيرفضوه !!
قتلها تو وقتك انتي و محمد 🤦🏻♀️ .. قتلي ماريا أنا معجبه بيه و ديما نحكي لي أمي عليه و لو أهتم بيا حتى شويه بس ح نجبرهم يوافقوا عليه .. قتلها يلا اهو اعطيتك علم بلي صار و خلاص ..
و انا نحكي معاها وصلتني رساله من سيف ...
