🌸ولدتني_عاهرة 21🌸
خمسة لايك واعجاب بعد القراءة❤🌸❤
قالي معاش تدخلي بكل في شغلي و شن بنديره .. شي واحد بس .. ح نخدم القضيه و نحاول ما نجيبش أمك للتحقيق بكل ..
قتله ليش ؟
قالي إحتراماً لي محمد و بوك .. الموضوع مش بالسهوله هادي ..
قتله سيف رد بالك تخدم القضيه هادي بمشاعرك .. خلي كل شي قانوني حتى لو امي نحبست ما يهمناش .. و محمد مقاطعها ليه سنين أصلاً ..
قالي معناها ح نكلم وكيل النيابه و يديرلهم استدعاء ..
قتله حتى الضابط علي ؟
قالي كلهم .. امك و جاركم و الضابط علي ..
قتله و بابا ؟؟ قالي ما ليشي اي علاقه .. خلي نشوفوا نتائج التحقيق لي وين توصل و بعدين ساهل .. قتله به تمام ..
قالي عرس اختي اليومين الجايات .. لو نعزمك تجي ؟
قتله انا 😳 ؟
قالي ايه ..
قتله نتحشم 🤭🤭
قالي نكلم محمد خوك نعزمه ع الفاتحه و نقوله قول للعويله يتفضلوا ..
قتله بروحي بنجي ؟؟ شن بنقول لي اماليك لو سألوني وين باقي العيله ؟؟
زاد قرب مني و قالي كان عندك نيه ح تجي 😉😉 ... قتله به تمام تو نفكر و نقولك ..
تعطيني الأذن أنا ..
قالي اعتبري من بكرة نبدا في الموضوع ..
قعدت واقفه قدامه .. كان خاطري نقول هلبا كلام .. بس مزال المكان مش مكاني ..
قالي بتقوليلي حاجة ؟
قتله الامور الي حكيتها توا تغير من نظرتك ليا او لي محمد ؟؟
قام حاجبه و كأنه يقولي شن تقولي انتي ؟؟
شد إيدي و قالي لو ما تجيش لي عرس هياتم ح تتغير نظرتي ليك 😉😉
قتله اختك اسمها هياتم ؟
قالي ايه ..
قتله محلاه الاسم اول مرة نسمعه ..
قالي حتى انا اول مرة .. قتله كيف !! قالي اول مرة و خلاص 😉😉
و معاش نبيك تقوليه الكلام هذا يا فوشيكة ... قتله به تمام 🙈 معناها انا ح نروح توا ..
قالي به تمام ..
طلعت من المكتب و انا قلبي يفز من صدري ... و ما نبيش نواجه نفسي بأرتباطه بكل ..
روحت لقيت محمد في حوش حناي .. سلمت و قعمزت معاه .. قالي كلمني راجل عمتك .. قتله كان موضوع إياد صكره خلاص ..
قالي لا .. المحامي الي تدربي عنده كلمه و معاش يبيك تخدمي عنده ..
قتله و الله 😳😳 به أحسن 🙁
قالي في حاجة ؟ قتله لا بس نبي وقت باش نفهم خدمتي ..
قتله غريبه مصكر المحل و طالع .. قالي في واحد في السوق نعرفه بالك بياخد الحوش .. قتله اليوم ؟ قالي لا بيمشي يشوفه قبل ..
قتله و أمك كيف !!
قالي نستنى في نزار باش يخش معاه الحوش و انا بنقعد برا نستنى ..
قعد محمد يهدرز و اتصل بيه نزار و طلع ..
درت الغذاء و حناي تهدرز عليا .. كل مرة تجيب سيرة حد ..
تاني يوم العصر كلمني محمد قالي في ناس عازمينكم على عرس بنتهم .. قتله آمته ؟ قالي بكرة .. قتله بكرة بكرة 😳😳
قالي ايه انا توا كيف طلعت من الفاتحه .. قتله عازميني انا بس ؟
قالي وين نعرف انا هو قالي قول للعويله يتفضلوا .. قتله به تمام ..
اتصلت بي ايمان قتلها تعالوا هدرزوا انتو و عمتي .. قتلي اليوم ما نلحقوش خليها بكرة .. قتلها لا لا ضروري اليوم .. قتلي به حاضر ..
قعدت نقول بالك عرس عيلة تانيه مش نفسهم أمالي سيف ؟؟
جت إيمان و حكيتلها .. قتلي هي نمشي انا و اياك 😀
قتلها بجد تمشي معاي ؟ قتلي و الله نمشي .. تو نجيك الصبح بكري و نجهزوا نفسنا على مهلنا .. قتلي بيرفعنا محمد ؟ قتلها أكيد ..
تاني يوم الصبح جت إيمان و لقتني مجهزة لبستي .. قتلها إيمان شن هذا الي جايبتيه 😳 ؟؟
بتاتك كله هذا ؟؟
قتلي هذا كله لزوم الطلعه بعدين 👌🏻 .. قتلها ما شاءالله عدة مزين هادي 😀
قعمزنا نهدرزوا و سشورنا شعرنا و لفيناه .. و حطينا ميك اب و لبسنا و جهزنا نفسنا ..
جى محمد بيرفعنا .. طلعت ايمان باش يشوفها .. و قعدت تهدرز معاه ...
لبست عبايتي و طلعنا .. اتصل محمد بسيف ياخد منه في نعتة الحوش ..
قتله ليش مدايرينه في حوشهم ؟ توا الناس كلها بدت ادير فيه في الصالات ..
قالي محمد انا ما نفهمش فيها الامور هادي .. وصلنا لحوش سيف و نزلنا انا و ايمان ..
خشينا سلمنا .. قتلها انا اخت صاحب سيف .. قتلي تفضلي مرحبتين بيك و انا اخت سيف 😊😊 قتلها انتي هياتم ؟ قتلي لا انا هيمانه 😊 قلت في خاطري و انا جداً هيمانه في خوك ..
خشينا نحينا عباياتنا و قعدت هيمانه تعرف فينا ع العيله ..
قتلي في الي لاهي فوق مع الحوسه .. قتلها خوي قالي ان اليوم الحفله .. قتلي لا اليوم النجمة و بكرة الحفله .. قتلها اهاااا به كله بالبركة ان شاءالله 🤭🤭
قعمزنا و انا و ايمان شادين ضحكة بالسيف .. قتلي توا يقولوا جايين قبل الشحاته و بنتها 😄
اتصل بيا سيف .. قتله احنا في حوشكم .. قالي من معاكم ؟ قتله هيمانه كانت معانا بس توا ركبت .. قالي تو نكلم هياتم تجيك .. قتله تمام ..
بعد شوي عاود اتصل بيا .. قالي وين مقعمزه ؟ قتله في الصاله .. قالي في دروج مقابلك ؟؟ قتله ايه .. قالي خلف الدروج في دار بري غادي تو تلقي هياتم .. قتله تمام ..
قلت لي ايمان نوضي معاي نمشوا للعروسه .. نضت انا و ايمان و مشينا خلف الدروج .. طبست للدار لقيت سيف .. جبدني من ايدي .. و ايمان شافاته رجعت طول ..
قتله انت شن ادير هنا 😳😳😳
قالي اسسس 🤫🤫 يسمعك حد ..
قتله سيف بنطلع انا .. شدني من خصري .. كانت ايده ع ضهري لان قفطاني عريان .. قربني منه .. قالي كنت حاس انك زي القمر .. قعدت نرجف نقوله سيف انا بنطلع ..
حضني و قالي انتي بين عيوني كل لحضه .. في بالي .. شاغلة تفكيري .. انا ندور في سبله باش نكلمك و نشوفك .. حطيت إيدي على لحيته .. عيوني في عيونه .. قتله تعرف انا زي شنو ؟ قالي قولي ..
قتله زي إنسان مُقعد عزموه على سباق للجري ...
زي بنت يتيمة الأم و تحتفل بعيد الأم ..
زي أعمى رزق بمولود و يوصفوله فيه ..
زي أبكم مطلوب للشهادة ...
قالي ليش تقولي هكي ..
نزلوا دموعي .. قتله انت تبي تخربلي مكياجي صح 😉
زاد حضني .. شديت في رقبته .. قتله ليش سيف ادير فيا هكي ليش !! 💔😢😢😢
حط إيده ع خدي و قرب مني باسني .. كانت أسرع من رمشة العين .. باعدته و حطيت ايدي ع فمي و انا متفاجأه بي الي صار .. حطيت ايدي ع الباب بنفتحه ..قالي انتي متوتره توا ما تطلعيش .. دفيته و طلعت .. كانت الصاله تحت كلها نساوين كبار في العمر و صغار و باقي العيله كلهم فوق يجهزوا في نفسهم
مشيت قعمزت جنب إيمان .. لقيتها تهدرز على امرأة كبيرة في السن .. قتلي خيرك ؟ ليش شكلك هكي ؟
قتلها خيره شكلي ؟
قتلي الحقير هذا في بينك و بينه شي ؟ قتلها لا ما في شي ..
قتلي ماريا فمك يرعش .. قتلها إيمان خيرك شديتي في الموضوع ما في شي بيني و بينه ..
جت هياتم .. قتلي انتي ماريا ؟ قتلها ايه .. قتلي توا بس كلمني سيف و قالي اخت صاحبي هنا ..
قتلها ايمان انا بنت عمتها و خطيبة صاحبه 😌😌 ...
قعمزت جنبنا .. كانت لابسه البودري .. قتلي هيا نخشوا نتعشوا .. خشيت معاهم و عقلي مش معاي بكل .. سيف اتصل بيا ما رديتش عليه ..
قعمزنا تعشينا .. هادي تسشور في شعرها .. هادي تحط في ميك اب .. هادي تلبس في الصدرة .. هادي تلبس في العربود .. الزمزامات بدوا يغنوا برا .. حاسه بدوخه .. نبي فراشي .. نبي مخدتي .. نبي بطانيتي ..
طلعنا قعمزنا برا .. الزمزامات يغنوا .. البنات يرقصوا .. طلعوا هياتم ببدلة الحصيره ..
............
مدي ايدك للحنه نحنيها .. صغيره ونفرح بيهــــــــا 🎶
ومزين الحنــــــــه الحمرا .. في يديهــــــاواجعل السعدِ ايجيهــــا 🎶
ومزين الحنه الحمرا في اليديــــــــا والخواتم ذهبيه 🎶
ومزين الحنه في الصوابع .. والخواتم بــــالطابع 🎶
ومزين الحنه الحمرا .. وقباله ، وبوك عــــز الرجــــاله 🎶
واجعلك ياعروسه بالقداري .. والشبوب الجلوالي 🎶
واجعلك ياعروسه كيف نبيك .. والعدو ما يشمت فيــــك 🎶
جت ام العريس خدت من الحنه و حطتها في ايد هياتم .. و أهدتها شنبير .. و ام سيف ما بطلتش دمعتها و لا انا بطلت دمعتي ...
ودعي امك وخواتك ... صحباتك ... خالاتك وعماتك 🎶
ودعوها يا جيران ... يا قبيلة ... ما تبات غير الليلة 🎶
صبية حوش بوها ، يبو يرفعوها ، تعالو وادعوها
يوم الحفلة 🎶
جت هيمانه و حطتلي حنه في ايدي و عطت حنه لي ايمان ...
كل بنت حلوة نقول هادي أكيد خطيبته .. ركزت ع البنات كلهم بس ما عرفتهاش ..
كلمنا محمد قال انا برا اطلعوا ..
خشينا بنلبسوا عباياتنا .. سلمنا عليهم كلهم و طلعنا .. محمد واقف على سيف .. ركبنا في السيارة و قعدنا نستنوا فيه ..
إيمان : و الله الحقير هذا شكله يحبك .. قتلها الحقير عنده أسم ..
قتلي عينه ننطق أسمه بعد الموقف الي داره .. جى محمد ركب في السياره و روحنا ..
ايمان تهدرز جوها جميل .. محمد يهدرز .. و انا في داخلي دوشه .. دوشه ..
