#ولدتني_عاهرة 32
قعدنا أنا و منار في دارنا .. و كل شويه سيف يبعتلي رساله ..
و مرات تحسي روحك انتي الأب و الأم .. و رحمك قاعد بكر .. و بدل ما يعانوك تعانيهم .. بدل ما يعيشوا ليك تعيشي ليهم .. بدل ما يمسحوا دمعتك تمسحي إنتي دمعتهم .. و بدل ما يعطوك حبهم و حنانهم تعطي انتي حبك و حنانك ..
و من قال فاقد الشي لا يعطيه !! فاقد الشي هو الي يعطي .. هو الي يعطي .. هو الي يعطي .......
و في الخوضه هادي كلها معاش عرفت وين نفرق تفكيري .. مشغوله على نزار ..
مع الفجر رقدت منار .. بعتت انا رساله لي سيف ( من شواطئ ليبيا لي ايطاليا كم ساعه باش يوصلوا ؟ )
بعتلي .. ( 😳😳 )
بعدها اتصل بيا طول .. قتله قاعد فايق ؟
قالي في الخدمة قاعد .. شن السؤال هذا !! 😳
قتله بنقولك سر 😔 ... قالي قولي ..
قتله نزار ركب قوارب الهجره غير شرعيه بيسافر ايطاليا .. قالي كيف و علاش و امته 😳 !!!
قتله اول أمس .. قعد ساكت سيف .. قتله فهمني شن في ؟؟
قالي المدة من هنا لي غادي 4 ساعات بس ..
قتله يعني هو مفروض يكون واصل توا ؟؟
قالي ايه .. قتله به مش مفروض يكلمنا ؟؟
قالي الله أعلم بس الموضوع مش بالسهوله هادي ..
قتله كيف !! قالي في الي يقعدوا شهور باش يكلموا أماليهم .. قتله سيف أنا نبي نطمن ..
قالي عندي ناس نعرفهم في (.......) تو ندير اتصالاتي نسأل ع المراكب الي طلعت و كان في حد يعرفه ..
قتله به تمام ♥️
قالي بترقدي ؟ قتله لا الصبح بيجي علاء بيروح بي منار و بيحطوني في حوش حناي ..
قالي خليك و تو نجي انا نروح بيك .. قتله تعبانه خليها مره تانيه .. قالي به طمنيني مره مره ♥️
قعدت فايقه للساعه 10 نوضت منار .. نضنا درتا فطور خفيف .. و قمت الحاجات و جى علاء روح بينا .. قتلها ردي بالك حد يعرف بقصة الحوش .. قتلي به تمام ..
روحت و منار ما بتش تخش روحت حوشها طول .. لقيت الحوش فاضي .. حتى حناي مهناش .. ووينهم هادوا ؟؟
اتصلت بي ايمان ما ردتش عليا .. اتصلت بي محمد قتله خيره الحوش فاضي ؟؟
قالي حناك في حوش عمتك .. قتله ليش ؟؟ قالي روحت مع عمتك لما جت المرأه .. قتله من امرأه ؟؟ قالي مرت بوك ...
قتله أهااا 😳
قتله به كويس .. صكرت الخط و خديت فراش حطيته في الصالون و رقدت لاني الليله الي قبلها مش راقده بكل ..
مع العصر و انا راقده نسمع في صوت هدرزه .. نحيت البطانيه تلفتت لقيت زوز نساوين مقعمزين جنبي يهدرزوا ..
شن هذا 😳😳 .. نضت سلمت و أعتذرت .. خشت ناديه لابسه روب ابيض فيه ريش .. أنا 😳😳😳😳😳😳😳 ..
سلمت عليها .. قعدوا شويه النساوين و طلعوا .. قتلي بصراحه جايين يطمنوا عليا ..
قتلها يطمنوا عليك !! 😳😳
قتلي ايه 😌 قتلي لما خشيت الصالون انصدمت لما لقيتك راقده كنت نحسابك نزار .. لكن شفت شعرك عرفتك انتي .. قتلي نستاذنك بنخش الدار انا ..
قتلها اذنك معاك 🙄🙄
و ضاعت الحشمه .. اختفت مع الزمن الجميل .. أيام ما كانت البنت تحمل ما تقابلش بوها بكل .. أيام ما كان الراجل يتحشم يلعب مع صغاره قدام امه و بوه ..
أيام أنا ما عشتهاش لكن فيا منهم هلبا .. و بدل ما هي تتحشم تقابلني بي روب زي هذا .. أنا تحشمت و نخدشت صورة الأب قدامي ..
نضت قمت فراشي و انا مزال خاطري نرقد .. ضميت الصالون و خشيت المطبخ لقيت أماليها جايبيين غداء .. خشت مرت بوي و تجهز في سفرة غذاهم و أنا ندير في القهوة .. السفره فيها قلايه و حاجة مسقيه و نواشف و سلايط .. خششت السفره للدار و صكرتها ..
و انا خديت فنجان قهوتي و قعمزت في الجنان .. اتصل بيا سيف .. يسأل عليا و بعدها قالي كنت مخزن رقم محمد خوك و توا معاش لقيته .. قتله شن في ؟ قالي بنبارك بس .. اعطيته الرقم و صكرت الخط ..
قعدت مقعمزه في الجنان للمغرب .. لا في من طلع و لا في من اتصل بيا و لا في من جى .. لدرجة حسيت روحي مش مكاني هنا و سبب ازعاج ليهم ....
مع المغرب جت إيمان .. وجهها أصفرر .. و جت عمتي و حناي معاها .. سلموا و خشوا و كل وحدة وجهها أسود من التانيه .. جت أمل مش حاطه ميك اب بكل ...
خشينا للصالون و طلعت ناديه سلمت و بابا طلع لي محمد برا من غير ما نتلاقى معاه ..
ناديه فاتحه شعرها .. حاطه ميك اب .. لابسه فستان واسع ..
قعمزنا و نضت انا بندير القهوة .. خشيت للصالون بنحط القهوة .. كانوا يحكوا و سكتوا فجأه لما انا خشيت .. ناديه ناضت غسلت وجهها و غيرت فستانها و قامت شعرها ..
مرت عمي جت .. كل وحدة فيهم مقعمزه عيونها يحكوا مع التانيه من غير ما ينطقوا حرف واحد ....
خش بابا .. ملامح وجهه رجعتني 18 سنه للخلف .. يوم الي شد مقرون على أمي و كانوا يتعاركوا و انا نبكي ..
جى قعمز جنبي .. جى محمد .. عيونه دموع .. حط بابا إيده على كتفي .. حضني ..
عمتي انهارت بالبكاء ..
قتلهم خيركم شن في ؟؟ قالي بابا إن لله ما أخد و لله ما أعطى .. بدوا كلهم يبكوا ..
تي خيركم شن في قولوا و ريحوني ؟؟ أمي صارتلها حاجة ؟؟
و الذي لا إلٰه غيره اللحضات هديكا حسيت بحبل مربوط على رقبتي و كل شويه يزيد يخنقني ..
قالي بابا نزار اعطاك عمره ..
تي لا لا .. لا لا لا لا لا ...
تلفتت لي محمد .. محمد يبكي .. و هادوا الي جنبي يبكوا .. جتني عمتي قعمزت تحت رجليا .. تبكي و تعيط .. بدوا دموعي ينزلوا ..
حطيت إيدي على قلبي .. خداني بابا في حضنه و يبكي .. جى محمد و قعمز جنبي و حضني و يبكي .. تلفتت لي محمد .. قتله بالحق نزاري مات ؟؟ هذا ولدي أنا .. هذا مش خوي هذا طفلي ..
هز براسه ايه .. يا محمد لا انا مش حمل الخبر هذا لا .. قالي نقلب بيهم المركب و غرق في البحر ..
كلهم يبكوا .. يعيطوا في ودني .. يحضنوا فيا يعزوا فيا .. ناديت بعلو صوتي يا نزااااااااااااااااار
معاش واعيه بنفسي .. مفصوله ع الواقع .. روحي تحس بألم بس .. قاموني طلعوني للجنان ..
كل مره تخش وحدة تعيط ..
نرجع انادي عليه .. يا نزار يا حبيبي .. قلبي معاش متحمل نفشل نسكت ...
نتفكر قلبي يفز يعصرني نطلق عيطه تشق باب السماء .. منار خاشه من الباب تعيط .. شفتها حسيت بشي مني .. هادي بس الي تبكي معاي عليه .. حضننا بعض و بكينا .. بكينا بقلوبنا .. بكينا بأرواحنا .. ألم في القلب موجع جداً .. كل مره يخش حد يعيط .. هادي نعرفها و هادي ما نعرفهاش .. طلع علينا الصبح .. و أنا روحي تتعذب .. نار والعه فيا داخل ..
الدنيا زحمت .. صوت الحديد متع الخيمه يخبط برا .. صوت قرآن فتحوه .. الساعه 12 نادى علينا محمد .. قال احنا بنجيبوه تقروا عليه قرآن بنسمع عياط و مناحه بنطلعه طول .. نبكي و نقوله به و الله ما نعيطوا الله ... ااااااااااه يا وجع قلبي ..
جابوه و دخلوه الدار داخل .. الدنيا زحمه ما نشوفش في شي .. قتلي ايمان معاه بوك و عمي عبدالرؤوف و محمد شويه و نخشوا احنا .. منار وينك ؟ اهي في جنبي .. شديت في ايدها .. قعدنا شادين في ايدين بعض .. نسمع في صوت عياط برا جنوني .. بابا طلع .. عمي طلع .. صوت العياط مش طبيعي .. منو هادي الي مكلومه زيني .. جيبوها نبكي انا و اياها .. قالولي هادي أمك ما يبوش يخلوها تخش ..
بكيت بكيت بكيت بكيت بكيت بكيت ..
نضت وقفت .. نجمع في نفسي .. رجليا مش حامليني .. ناضت معاي منار .. مشينا للباب .. لقيت امي في حاله هستيريه .. خديتها من ايدها و دخلتها .. خشيت بيها داخل .. هادي الدار الي فيها نزار ..
خشيت انا و امي و منار و محمد ..النعش مصكر .. ما قدرناش نفتحوه .. محمد مقعمز على راسه يقرا في سورة يس .. حضنت نعشه .. بوست نعشه .. نمسح بي ايدي نحنن عليه .. ناديته .. نزار يا حبيبي انا هنا جنبك .. خش بابا .. فتح النعش .. وجهه ابيض هلبا نزار .. فمه ازرق .. كأنه راقد ..
بوسته على راسه .. حطيت ايدي على خده .. قتله تتفكر يوم الي قتلي أنا واثق إن ح نجتمعوا من جديد ؟؟ أهو اجتمعنا .. انت لميتنا هنا .. بس كانت الضريبه غاليه جداً .. امي هنا يا نزار .. بابا هنا جنبك يقرا عليك في قرآن .. محمد هنا .. منار هنا .... يا قطعه من قلبي ..
امي زي المجنونه .. مش قادره تصبر بكل .. ناض محمد و بابا صكروا مصاحفهم .. خش عمي عبدالرؤوف و إياد ..
عيطت لا ما ترفعوشي .. لا كيف يهون عليكم تدفنوه .. ندف في عمي و اياد و نعيط اطلعواااااا ... امي تحضن في النعش و شاده فيه بقوه ..
أبكي يا أمي .. أبكي على كل يوم ما تندريش عليه وين يبات .. ابكي على كل يوم ضربتيه فيه .. ابكي على كل يوم ما خديتيشي في حضنك و لعبتي معاه .. ابكي على كل يوم ضيعتي فيه حوشك و راجلك و صغارك .. أبكي .. بكاء حسره .. بكاء ندم .. أبكي ..
قام محمد النعش .. و بابا و عمي و إياد .. غطوه بحولي .. حطوه ع كتافهم .. طلعوا بيه ..
الخطوات هادي من الجحيم .. تعرفها كل من فقدت أخ أو أب ..
كلهم يرددوا اللهم ثبته عند السؤال .. اللهم ثبته عند السؤال .. اللهم ثبته عند السؤال ..
عمتي تزغرط .. خالتي تزغرط .. حناي خانها صوتها بس زغرطت ..
نزار .. الله يرحمك و يجعل مقامك الجنه .. { من مات و هو غريق فهو شهيد }
انت بين إيدين الله توا .. أرحم مني و من أمك و بوك و دنيتك ..
أمي روحت بيها خالتي .. حتى عزاء ولدها بدا مش من حقها ..
قعمزت برا .. منار جنبي .. كل مرة يخش حد يعزينا .. نسمع في صوت ضحك نتلفت نلقاهم يهدرزوا و يضحكوا ..
و هادي تبكي بحرقه نار ولدها مزال ما بردت الي ليه متوفي شهرين .. و هادي تقول خيرهم ما خلوش امهم تخش بكري .. ترد عليها التانيه حتى توا قالوا روحت مهناش ..
هادي الي خشت توا حاطه ميك اب .. يعني قالولها نزار ولد الصادق توفى ناضت حطت ميك اب و جت ... هديكا جت و قعمزت و تشوفلي و ما تبيش تعزيني ...
نفاق اجتماعي صرف 👌🏻
عندي غصه في قلبي .. الزحمة هادي كلها مش حاسه بدوشتها .. في داخلي سكون مخيف .. و مرة مرة بركان يفور فيا ..
منار تعيط .. دخلوها داخل .. جتني ايمان قتلي بيرفعوها للمستشفى .. قتلها خيرها ؟ قتلي بتولد .. قتلها به ..
جت اخت سيف و أبله مريم ( أم سيف ) قعدت جنبي هيمانه .. و جت هياتم عزت .. قعدوا مقعمزين جنبي و في الليل روحوا ..
كلمتني إيمان قتلي منار جابت ولد و حماتها معاها غادي و حالها كويس .. قلت الحمدلله أخد و أعطى و قعدت نبكي ..
الليله أول ليله لي نزار في قبره .. يارب يا حبيبي ابدله منزلاً غير الذي كان فيه .. يارب اسكنه فسيح جناتك .. يا رب أريه مقعده من الجنه .. يارب افسح له في قبره يارب ♥️
حاسه بغربه .. نتمنى الناس هادي كلها تروح .. روحوا بلا نفاق اجتماعي ع الاقل الواحد يعيش حزنه ..
تاني الصبح قالي محمد هيا بنمشوا نزوروا القبر ..خشيت نجري توضيت وضوء الصلاه و لبست عبايه ما نعرفش متع شكون و طلعت .. لقيت سيف واقف برا .. شفته انهرت بالبكاء بس خفت محمد يلاحظ عليا حاجة .. جى سلم عليا و قعد شاد في ايدي و ضاغط عليها .. عزاني و من كثر حزني و بكاي ما قدرتش نرد عليه هزيت بي راسي و خلاص .. نحيت ايدي و بنركب في السياره قالي افتحي تليفونك ضروري ..
ركبت في السياره و عمتي معانا و ايمان و بابا .. مشينا للمقبره .. { السلام عليكم أهل الديار .. أنتم السابقون و نحن أن شاءالله بكم لاحقون نسأل الله لكم الثواب و المغفره }
