🌸ولدتني_عاهرة 22🌸
🌸تفاعل ونزل الحلقة 23❤🌸❤
روحنا الحوش .. لقيت حناي راقده ..خشيت لداري و خليت إيمان و محمد برا ..
غيرت ملابسي و خشيت للفراش طول غميت راسي .. نمرر في صوابعي ع فمي .. فمي يرجف .. رجليا مصقعات .. نلف ايديا حواليا نحضن حنيني .. نحضن مشاعري .. نحضن قبلتي البكر ..
خشت إيمان تغني .. قتلي خيرك بترقدي ؟؟
قتلها ايه ..
قتلي غير نحي البطانيه و انتي غامّة روحك .. قتلها ما خاطريش في دوتك و بنرقد ..
قتلي أسمعي احترميني انا مرت خوك الكبير ايووه 🤭🤭
غيرت ملابسها و جت رقدت جنبي .. قتلي تعرفي .. و راس حميدة الغالي الا في بينكم حاجة و ما تبيش تقولي ..
ما بيتش نرد عليها ..
قتلي به شنو بنمشوا غدوة للحفله 🤭🤭
ما بيتش نرد عليها ..
اتصل بيها محمد و قعدت تحكي في التليفون .. و الحمدلله ارتحت من دوتها ..
قلبي يقولي شوفي التليفون اكيد سيف باعتلك حاجة .. و عقلي يقولي لا ما تشوفي منه شي ...
نضت الصبح خشيت الدوش .. و صليت و جهزت الفطور .. قتلي حناي خيرك ليك فترة ما مشيتي للمكتب .. قتلها استغنى عن خدماتي ..
فتحت تليفوني ..
لقيت مكالمات فائته و رسالتين .. كيف بنفتح الرساله اتصل بيا ..
رديت .. قالي ليش نتصل من مبارح ما ترديش ؟ قتله و تسأل فيا ليش ؟؟
صكرت عليه الخط .. و خشيت للحمام نبكي .. أنا ليش حظي هكي ..
أنا كل يوم نحبه بعمق أكثر من اليوم الي قبله .. ليش مبارح دارلي هكي !
ليش ذوقني فمه !! .. ليش اعطاني نفسه !! .. ليش نظرته ليا هكي !!
على قد ما كان راحة ليا على قد ما نحس بوجع لانه مش ليا ..
غسلت وجهي و قررت نتعامل معاه بحزم و معاش نعطيه مجال بكل ..
العشيه جى نزار .. قال في ناس شافوا الحوش و ممكن ياخدوه .. و قعد يهدرز عليا .. قالي انا جمعت مبلغ و بنمشي لي ( .......) قتله ليش ؟ قالي من غادي يطلعوا جماعة الهجره غير شرعيه .. قتله ليش ما تسافرش انت عندك جواز سفر .. قالي المشكله في التأشيره ..
قتله انا مش ح نخليك تركب البحر .. شوف الاخبار كل يوم يموتوا في البحر .. قالي كان متت هذاكا قدري وين بنهرب منه .. لاني معاش نقدر نقعد في البلاد ..
قتله تو يطلع بابا و نسكنوا مع بعضنا و انت تخذم مع محمد ..
قالي في امور انتي ما تعرفيهاش .. نسافر نقلب وجهي خير ..
قتله متعارك مع امك ؟ قالي لا لا ..
قتله وين بتقعد هي لو نباع الحوش ؟ قالي ما فكرتش فيه الموضوع و ما يهمنيش مصيرها .. قربت منه اتكيت ع كتفه .. قتله انا خايفه عليك تمشي من البحر ..
قالي كبرت و بديت راجل و ما عمري سمعت كلمة انا خايفه عليك .. ما عمري سمعت كلمة في حفظ الله ..
قتله انا خايفه عليك و نحبك و نتمنى من الله يحفظك ♥️ ..
قالي المهم اعطيتك علم .. خوك محمد ما نبيش نقوله .. كان بنقوله بيديرلي في الرز عظام .. لما نوصل ايطاليا نكلمكم و نطمنكم عليا ..
حسيت بغمه .. و كأن مكتوب عليا الحزن .. و كأن مكتوب عليا الشعور بالأمومه اتجاه خوتي .. قعدنا مع بعض نهدرزوا و جى محمد لان ايمان عندنا قاعده .. سهرنا كلنا مع بعض و محمد جاب معاه دجاج و لحم و درنا شواء مع بعض .. جت عمتي و تعشت معانا و روحت هي و إيمان .. خشيت فراشي و نزار خش فراشه ..
في فكري عدة ملفات .. هذا ملف بابا مُحزن .. هذا ملف الماضي مؤلم .. هذا ملف سيف على قد ماهو حلو على قد ماهو مخيف ...
رقدنا و نضنا الصبح .. فطرنا و قالي نزار انا بيجيني صاحبي و بنمشي ..
حضنته سلمت عليه و بكيت .. قتله توعدني ترد بالك على روحك ع خاطري ؟
قالي نوعدك ♥️
شديت في رقبته .. نبكي و نقوله انا محتاجتلك نزار ما تمشيش ..
يبكي و يقولي انا كان بنقعد هنا بنضيع يا ماريا بنضيع ..
طلع و طلعت معاه روحي ..
قلبي كل مرة يموت جزء منه ... قعمزت نبكي .. حناي تنادي فيا تبي سبحتها .. تليفوني يرن .. قلبي مع نزار .. شبح البحر و الغرق و الموت ملازمني .. و كأن أحنا عيلة مكتوب علينا الشتات ..
به مش مفروض المرأه الي خانت زوجها و دمرت بيتها هي الي تحصد الدمار هذا كله !!!
ليش احنا كنا الضحيه !! أو إن الله عز و جل حطنا في هالأختبارات هادي كلها باش يصقل نفوسنا ؟؟ ....
جت منار لقتني متضايقه و نبكي .. قتلي خيرك شن في ؟ قتلها شي متضايقه بس ..
قتلي علاء طالع زرده و قالي نرفعك حوش امك .. قتلي معاش عرفت شن نرد .. قتله اماليه بيبيعوا الحوش و امي قاعده في حوش حناي .. مشى جيت هنا ..
قتلها احسن ما درتي .. قعدنا نهدرزوا عادي و طيبنا غداء و فكري كله مع نزار ..
بعد الغداء اتصلت بيه .. قالي وصلت من بكري و قاعدين في حوش ولد صاحبنا .. قتله تغذيت ؟ قالي تغذينا في مطعم في الطريق ..
قتله به رد بالك على روحك في حفظ الله ♥️
قالي حاضر ماما 😄
قعمزنا و حطينا العاله ع خاطر حناي .. و جت جارتنا تهدرز ..
و من كثر أزدحام المشاعر و الافكار الي في بالك يجيك شعور تقولي للناس الي تهدرز جنبك اسكتوا دقيقة صمت لو سمحتوا ..
و كل ما نسرح بفكري شويه توقظني بوسة سيف ... كل ما نفكر في نزار توقظني بوسة سيف .. كل ما نهدرز على منار و حناي و جارتنا توقظني بوسة سيف .. نحسها من أول و جديد .. و في عز هدرزتي نسكت .. عيون الناس تقولي كملي شن بتقولي .. ناخد وقتي من الهروب منها و نرجع نهدرز تاني .. اتصل بيا سيف ما رديتش عليه .. بعتلي رسالة ردي ضروري .. عاود اتصل و رديت عليه .. قالي ليش تعاملي فيا هكي ؟؟
قتله شن تبيني ضروري ؟
قالي امس استدعيت جاركم مصطفى و امك .. الضابط علي برا ليبيا اول ما يوصل يشدوه في المطار ..
قتله يقدروا ؟ قالي و علاش ما يقدروش !!
قتله امي امس استدعيتوها ؟؟ قالي ايه .. حققوا مع جاركم و امك مزال .. قتله ليش ؟
قالي امور ما تفهميش فيها انتي ..
قالي بكرة ح نمشي نفتش الحوش .. و قلت نعطيك علم .. ما حبيتش نخش حوشكم من غير علمك .. مرات تزعلي ..
قتله تمام به ..
صكرت الخط و خشيت داري .. روحت جارتنا و جت منار جنبي .. قعدت نفكر نقوللها او لا ... بعتت رساله لي سيف ..( نطلب منك طلب )
اتصل بيا طول .. قتله بعتلك رساله رد عليا برساله .. قالي و ليش نحرم روحي من الصوت هذا ! قالي قولي شن طلبك ؟
قتله نبي نمشي معاك بكرة لي حوشنا .. قالي امممممممم هكي معناها مش ح نخلي حد يمشي معاي .. قتله ليش ؟ قالي ما نبيش حد يشوفك ..قتله به تمام شوف خدمتك معناها .. قالي خلاص بكره تعالي و نمشوا مع بعض .. قتله تمام ...
تاني يوم نضت الصبح لبست و طلعت .. كلمته قتله انت وين ؟ قالي كيف طالع من المكتب .. قالي و انتي وين ؟ قتله واقفه في الشارع الرئيسي بناخد تاكسي .. قالي خليك تو نجي انا ..
قتله لا مش ح نركب معاك تو نجي بتاكسي لي قدام حوشنا .. قالي تمام ..
مشيت لقيته قدامي .. نزلت من التاكسي لقيت باب حوشنا مفتوح .. قتله عندك مفتاح ؟ ضحك عليا قالي مفتاح شنو 😀
قتله كيف فتحت الباب ؟ قالي خشي هيا .. خشيت ..
بالرغم الألم و الحزن و هلبا مشاعر تنحس ما تنكتبش الا إني حسيت بحنين للحوش .. حسيت بيه خداني في حضنه لما خشيت .. حسيت بيه يقولي وينك .. حسيت بيه فاقدني هلبا .. نزلت دمعتي ..
هنا بابا كان يتكى ..
و هنا كان يتفرج ع التلفزيون ..
و هنا كان يلعب في الكارطه ..
و هادي دالية العنب الي كنت انقطع في العنب و هو قارص اخضر مزال مش طايب ..
هذا التلفزيون عمره سنين نتفكر فيه .. و هذا الصالون .......
كلمني سيف قاطع حبل افكاري .. قالي مدام انتي جيتي .. شوفي اوراق او تليفون قديم او اي شي داساته امك ..
خشيت شفت ما لقيت شي .. قعدت ندور في الحوش و نتأمل في كل زواياه .. على قد ما كنت نتمنى نطلع منه على قد ما عندي ليه حنين عجيب .. نشوف فيه في صورة بابا .. ذكرياتي مع نزار .. شارعنا و صغار جيرانه الي كنت نلعب معاهم .. هلبا حنين لي هالجدران ..
قرب مني قالي أسف ع الي صار في حوشنا .. قعدت ساكته ما تكلمتش ..
قالي أنا مش قاصد يصير هكي .. و لا قاصد نخليك تجي للدار .. يعني كله صار في نفس الوقت .. قتله نوريك لعبتي و انا صغيره ؟
قالي وريني ..
قتله تعالى دارنا .. مشينا خشينا دارنا .. قتله هذا سريري ..
و فتحت الدولاب قعدت ندور في لعبتي .. ما لقيتهاش .. زعمه وين ؟؟
قتله شوف فوق الدولاب في ؟
شاف قالي لا ما فيش ..
قتله زعمه لوحتها امي !!
قعدت ندور .. دورت في كل مكان ما لقيتهاش .. قالي ليش تتهربي مني ؟
قتله ما فهمتش !
قالي ليش تتهربي مني !!!!!!
قتله لاني ما نحبش نخش في قضيه خاسره .. قالي تشوفي فيا قضيه خاسره ؟؟
شديت إيده .. كنت نبي نوريه دبلته و نقوله طول ما هادي هنا تعتبر قضيه خاسره ..
ما لقيتش الدبله .. قمت عيوني فيه .. و من غير ما نسأله قالي مش متعي ..
قتله كيف !
قالي الدبله كانت لي صديقي استشهد و جابولي اغراضه و من ضمنهم الدبله .. و تصادف حطيتها في صبعي يومها ..
قتله يعني انت مش خاطب ؟؟ 😳😳
قرب مني و لف ايديه عليا .. قالي يعني لو خاطب بنحضنك ؟ بنقرب منك ؟ بنبوسك ؟
تعرف سيف 🤨🤨🤨
صدقت فيك إيمان 🤨🤨 قالي خيرها ؟؟
قتله بجد صدقت فيك 🤨
معقوله تقولي خاطب ؟ تعيشني في الحزن الفتره هادي كلها ؟
زاد حضني لدرجة اني باعدت رقبتي للخلف .. قالي زي ما انتي كنتي مخطوبه .. و فجأه بديتي مش مخطوبه 😉
قتله للدرجة هادي 😳
قالي لو تعرفي قداش كرهته لما طلعتي معاه من مكتبي يومها .. لو تعرفي قداش استفزني ..
قتله ارخيني نبي نروح ..
طلع من جيبه سلسال ذهب .. قالي لفي نبي نلبسهولك .. قتله لا نتحشم ..
قالي به شن رايك فيه ؟
قتله حلو 😌
قالي خذيتهولك يوم حفلة هياتم توقعتك تجي و نعطيهولك .. بس يا فوشيكتي ما اقسى قلبك حتى تليفون ما تبيش تردي عليا ..
قتله يعني شنو !! قول و ريحني ..
قالي انا نحبك .. نفكر فيك كل وقتي .. قلبي يعصرني لما تبكي .. كان نلقى نشيل همومك كلها .. كلها نحطها ع اكتافي .. نزعل لزعلك .. و نفرح لما تفرحي .. كان نلقى ندير كل شي ع خاطرك ..
في البدايه كنت نقول خلاص معاش بنفكر فيها و البنت صغيره عليا .. لقيت روحي مش قادر نباعدك على عيوني ..
قربت منه .. و في داخلي إحساس نبي نعاود نعيشه .. نبي نعاود نحسه ... اصلاً البوسه يومها كانت بسرعه و ع غفله .. بس الأمر مش بي إيدي .. بي أيده هو ..
قتله تعرف اني نشوف فيك شي بعيد .. بعيد هلبا .. تعرف انك سبب فرحتي .. تعرف انك عندك القدرة تمتص حزني .. تحسسني بالأمان .. بالحنان ..
تعرف اني في عرس اختك كل بنت حلوة نقعد مركزة معاها و نحس بالغيره .. نحس بالغيره سيف هلبا ..
شديت في رقبته و باسني .. لحضه .. لحضات .. لحضااااااااااات ..
حسيت فيهم بأنوثتي .. في مشاعر تفجرت لي اول مرة .. إحساس أول تجربه غير ..
تحسي بخشونة رجولته في أنفاسه .. في لحيته .. في لهفته .. تحسي برجولته في ضمك لي حضنه بقوة .. تحسي برجولته في ريحة عطره ..
أشياء تدمرك .. تستسلمي طول ..
باعدت منه .. و فمي غارق بريقه .. طلعت من الحوش .. شدني في الجنان .. قالي اركبي معاي نروح بيك ..
طلعت ركبت السياره .. جارنا واقف يشوف ..
ركب سيف .. مشينا و شد إيدي في الطريق .. وقف على شاب يبيع في الورد .. و خدالي ورد .. قالي اول مرة في حياتي ناخد ورد 😉
قالي شن رايك نمشوا نتغدوا .. قتله لا بنروح .. قالي نروح بيك للحوش ..
طول الطريق ساكته .. هو الي صار صح صار و لا انا نتخايل ؟؟
نمرر لساني ع فمي .. ايه ايه صار .. نمسح فمي بي ايدي ..
قبل ما نوصلوا ضغط ع ايدي .. تلفتت له .. قالي نحبك ..
أويل قلبي 🤦🏻♀️💔
